Omapsalme 89:1-52
Maskil.* Epsalme laEtan, Omuesrahi.
89 Ohandi ka imba kombinga yanghee Jehova a ulika ohole i na oudiinini fiyo alushe.
Ohandi ka shiivifila omapupi aeshe oudiinini woye nokanya kange.
2 Osheshi onda ti: “Ohole i na oudiinini otai kalelele,*Noudiinini woye otau kalelele fiyo alushe meulu.”
3 “Onda ninga ehangano nomuhoololwa wange;Onda anena omupiya wange, David, nda ti:
4 ‘Ohandi ka kaleka po oludalo loye fiyo alushe,Nohandi ka tunga olukalwapangelo loye li kale po fiyo okomapupi aeshe.’” (Sela)
5 Omwene Jehova, eulu otali tange oikumwifilonga yoye,Heeno, oudiinini woye meongalo lovayapuki.
6 Osheshi olyelye e li mewangadjo ta dulu okuyelekwa naJehova?
Olyelye mokati kovanamati vaKalunga e li ngaashi Jehova?
7 Kalunga oye aeke omukumwifi mongudu* yovayapuki;Omunene nomukumwifi kwaaveshe ovo ve mu dingilila.
8 Omwene Jehova Kalunga komatangakwaita,Olyelye omunaenghono ngaashi ove, Omwene Jah?
Oudiinini woye owe ku dingilila.
9 Oho pangele ehandu lefuta;Ngeenge omakufikufi alo tae litumbu, oho a loteke.
10 Owa nyanyaula Rahab ngaashi ovo va dipawa.
Owa halakanifa ovatondi voye nokwooko kwoye ku na eenghono.
11 Eulu oloye, nedu oloye;Edu liwa naaishe oyo i li ko, oove we i shita.
12 Olundume nolukadi, oove we i shita;Tabor naHermon otava tange edina loye nehafo.
13 Okwooko kwoye oku na eenghono;Eke loye oli na omafa;Eke loye lokolulyo ola tumbala.
14 Okulonga ouyuki nokutokola pauyuki oi li ekanghameno lolukalwapangelo loye;Ohole i na oudiinini nosho yo oudiinini oi li koshipala shoye.
15 Ovanhu ovo va hafa ovovo ve shii eingido lehafo.
Ohava ende mouyelele woshipala shoye, Omwene Jehova.
16 Ohava kala va hafa omolwedina loye efimbo alishe,Nomouyuki woye ohava tumbalekwa.
17 Osheshi oove odjo yefimano neenghono davo,Nokekwafo loye, eenghono* detu ohadi tumbalekwa.
18 Osheshi oshikelelifo shetu osha dja kuJehova,Ohamba yetu oya dja kOmuyapuki waIsrael.
19 Pefimbo opo, owa popya novadiinini voye memoniko, nowa ti:
“Onda yandja eenghono komunaenghono;Onda tumbaleka omuhoololwa mokati kovanhu.
20 Onda hoolola omupiya wange, David;Onde mu vaeka nomaadi ange mayapuki.
21 Eke lange otali ke mu yambidida,Nokwooko kwange otaku ke mu pameka.
22 Kape na omutondi te ke mu kondjifa a yandje eemhale,*Nokape na omuhenouyuki te ke mu fininika.
23 Ohandi ka nyanyaula moinhimbu ovatondi vaye moipafi yaye,Nohandi ka dipaa ovo ve mu tonde.
24 Oudiinini nohole yange i na oudiinini oi li pamwe naye,Nomolwedina lange, eenghono* daye otadi ka tumbalekwa.
25 Ohandi ka tula eke* laye kombada yefuta,Neke laye lokolulyo okombada yomilonga.
26 Ota ka tya kwaame: ‘Oove Tate yange,Kalunga kange nEmanya lexupifo lange.’
27 Nohandi ke mu ninga oshiveli,E li pombada elela yeehamba dokombada yedu.
28 Ohandi ka diinina ohole yange i na oudiinini yoku mu hola fiyo alushe,Nehangano lange naye itali ka ponya.
29 Ohandi ka kaleka po oludalo laye fiyo alushe,Nohandi ka ninga olukalwapangelo laye li kalelele, ngaashi eulu.
30 Ngeenge ovana vaye ova efa po omhango yange,Nokukala itava ende metwokumwe neemhango* dange,
31 Ngeenge ova nyono eenghedimhango dange,Nokukala itava diinine oipango yange,
32 Opo nee ohandi ke va handukila nodibo omolwokuhadulika* kwavo,Noku va denga omolwomapuko avo.
33 Ashike itandi efa po nandenande oku mu ulikila ohole yange i na oudiinini,Nohandi ka kala omunashili keudaneko lange.*
34 Itandi ka nyona ehangano lange,Ile ndi lundulule osho omilungu dange da popya.
35 Onda ana mouyapuki wange, lumwe nofiyo alushe;Itandi lombwele David oipupulu.
36 Oludalo laye otali kala po fiyo alushe;Olukalwapangelo laye otali kala po ngaashi etango moipafi yange.
37 Ngaashi omwedi, otali ka pamekwa fiyo alusheNgaashi ondombwedi idiinini mewangadjo.” (Sela)
38 Ashike ove mwene owe mu ekelashi, nowe mu efa po;Owa handukila neenghono omuvaekwa woye.
39 Owa efa po ehangano nomupiya woye;Owa nyateka oshikoroni* shaye, eshi we shi ekela pedu.
40 Owa ngumauna po omakuma aye aeshe omamanya;*Owa hanauna po omakuma aye a ninge oikulukuma.
41 Aveshe ovo va enda po ove mu nyeka;Ovashiinda shaye ohave mu sheke.
42 Owa yandja efindano kovatondi vaye;*Owa hafifa ovatondi vaye aveshe.
43 Owa shunifa mo yo eongamukonda laye,Noino mu pameka molwoodi.
44 Owa xulifa po ewapalo laye,Nowa ekela olukalwapangelo laye pedu.
45 Owa ninipika omafiku ounyasha waye;Owe mu dika ohoni. (Sela)
46 Omwene Jehova, fiyo onaini to hondama? Mbela fiyo alushe?
Mbela ehandu loye otali twikile okuxwama ngaashi omundilo?
47 Dimbuluka kutya onghalamwenyo yange oixupi.
Mbela ovanhu aveshe owe va shita nopehe na elalakano lasha?
48 Mbela olyelye ta dulu okukala nomwenyo, ndele ta kala ina fya?
Mbela ota dulu ngoo okulixupifa ye mwene* keenghono dOmbila?* (Sela)
49 Omwene Jehova, oilonga yoye yonale i na sha nohole i na oudiinini oi li peni,Oyo wa anena David molwoudiinini woye?
50 Omwene Jehova, dimbuluka nghee ovapiya voye va shekwa;Nghee nda li ndi na okulididimikila* omasheko oshiwana ashishe;
51 Nghee ovatondi voye ve ku tuka, Omwene Jehova;Nghee va tuka omuvaekwa woye keshe apa a ya.
52 Jehova na tangwe fiyo alushe. Amen, Amen.
Eshangelo lopedu
^ Tala Omafatululo oitya.
^ Ile “kala po fiyo alushe.”
^ Ile “moshoongalele.”
^ Eln., “oluvinga.”
^ Ile “eefuto odo hadi pewa eehamba.”
^ Eln., “oluvinga.”
^ Ile “eenghonopangelo.”
^ Ile “nomatokolo.”
^ Ile “omolwounashibofa.”
^ Eln., “Noitandi ka kala omunaipupulu koudiinini wange.”
^ Ile “oshikoroni shiyapuki.”
^ Ile “eenhele daye domamanya.”
^ Eln., “yelula eke lokolulyo lovatondi vaye.”
^ Ile “omwenyo waye.”
^ Sha hala okutya, kOufi. Tala Omafatululo oitya.
^ Eln., “okuhumbata monhulo yange.”
