Omayeletumbulo 11:1-31
11 Oshiyelekifo shoukengeleledi* oshi li oshinima shitondifa kuJehovaAshike oshiyelekifo sha yuka* ohashi mu hafifa.
2 Ngeenge ounhwa owe uya, ohoni otai shikula ko,Ashike ounongo ou li povalininipiki.
3 Oudiinini wovayuki oo hau va wilike,Ashike oukengeleledi wovanamakoto ohau va hanauna po.
4 Emona* itali ka kwafa sha mefiku lehandu,Ndele ouyuki oo tau ka xupifa mefyo.
5 Ouyuki waao ehe na ondjo ohau yukililifa elila laye,Ndele omukolokoshi ota ka punduka omolwoukolokoshi waye mwene.
6 Ouyuki wovayuki otau va xupifa,Ndele ovakengeleledi otava ka yulwa komahalo avo vene.
7 Ngeenge omukolokoshi a fi, eteelelo laye ohali xulu po;Nelineekelo laye, olo la kanghamena keenghono daye, ohali xulu po yo.
8 Omuyuki oha xupifwa mo moudjuu,Ndele omukolokoshi oha mono oixuna omolwoudjuu oo.
9 Okanya komushunimonima* otaka nyono po mukwao,Ndele ovayuki otava xupifwa omolweshiivo.
10 Ouwa wovayuki ohau hafifa oshilando,Nongeenge omukolokoshi okwa xulu po, ohapa kala ehafo linene.
11 Omolwenangeko noupuna lovayuki, oshilando ohashi tumbalekwa,Ndele okanya kovakolokoshi ohake shi teyaula po.
12 Omunhu oo ehe na eendunge okwa dina* mukwao,Ndele omunhu oo e na shili eendunge dokuyoolola oha kala a ngungumana.
13 Omulundili oha holola oiholekwa,Ndele omunhu* oo e shii okulineekelwa oha kala e i mwenena.*
14 Ngeenge kape na epukululo liwa,* ovanhu tava mono oixuna,Ndele apa pe na ovapukululi vahapu, oinima otai ende nawa.*
15 Keshe oo ta ane a kalele po omukuli* womunailongo ote litwala moupyakadi,Ndele oo ha henuka* okuninga eudafano la tya ngaho ote lixupifa moudjuu.
16 Omukainhu muwa oha kongo efimano,Ashike ovalumenhu ovakwanyanya ohave likufile oupuna.
17 Omunanghenda* ohe lietele ouwa,*Ashike omunhu omukwanyanya ohe lietele oupyakadi.*
18 Omukolokoshi oha mono ondjabi yoipupulu,Ashike omunhu oo ha kunu ouyuki oha mono ondjabi yashili.
19 Ou ta diinine ouyuki oku li mondjila yomwenyo,Ndele ou ta longo owii oku li mondjila yefyo.
20 Ovo ve na omutima u na omakoto ove li oshinima shitondifa kuJehova,Ndele ava vehe na ondjo otave mu hafifa.
21 Kala u na oushili kutya:* Omukolokoshi ita kala ina handukilwa,Ashike ovana vomuyuki itava ka handukilwa.
22 Ngaashi olinga yoshingoli i li meyulu loshingulu,Omukainhu muwa, ndele oku tonde eendunge, naye osho e li.
23 Ehalo lomuyuki otali etifa ouwa,Ashike eteelelo lomukolokoshi otali etifa ehandu.
24 Omunhu, oo ha yandje nehalo liwa,* ota ka kala e na shihapu;Ndele oo muluva ota ka ninga omufyoona.
25 Omunhu* oo ha yandje nehalo liwa ota ka punapala,*Naao ha tulumukifa* vamwe ota ka tulumukifwa.
26 Ovanhu otava ka finga oo ha anyene oilya,Ndele otava ka nangeka noupuna oo he i landifa.
27 Omunhu oo mudiinini mokulonga ouwa ota kongo okufilwa onghenda,Ndele omunhu oo ta kongo owii otau ke mu hanga filufilu.
28 Oo te lineekele momamona aye ota ka hangwa koupyakadi,Ndele omuyuki ota ka hapa ngaashi omafo omuti.
29 Keshe oo ha eta oupyakadi* meumbo laye ota ka fyuulula omhepo,Nelai otali ka ninga omupiya womunaendunge.
30 Oshiimati shomuyuki osho omuti womwenyo,Naao ta likola eemwenyo* omunaendunge.
31 Ngeenge omuyuki, oo e li kombada yedu, ota pewa shili ondjabi,Mbela ongahelipi shi na sha nomukolokoshi nosho yo omulunde?
Eshangelo lopedu
^ Ile “shoipupulu.”
^ Ile “oshiyelekifo shemanya le lixwa po.”
^ Ile “Oinima yongushu.”
^ Ile “komuhenakalunga.”
^ Ile “oku tonde.”
^ Eln., “oo omudiinini momhepo.”
^ Eln., “oha tuvikile oshinima.”
^ Ile “ewiliko lopandunge.”
^ Ile “ope na exupifo.”
^ Eln., “e tonde.”
^ Ile “ta yandje eshilipaleko.”
^ Ile “Omunhu e na ohole i na oudiinini.”
^ Ile “oha ningile omwenyo waye ouwa.”
^ Ile “ohoni.”
^ Eln., “Eke neke.”
^ Eln., “andjakaneke.”
^ Ile “omwenyo.”
^ Eln., “ota ka ondoka.”
^ Eln., “ha yandje omeva oshali.”
^ Ile “ohoni.”
^ Tala Omafatululo oitya.
