Omayeletumbulo 18:1-24
18 Keshe oo te litongola ko ota lalakanene omahalo aye mwene;Ote lipwilikilile* ounongo filufilu.
2 Elai kali na ko nasha neudeko;Ponhele yaasho, ohali holola osho shi li momutima walo.
3 Ngeenge umwe okwa longo oukolokoshi, ota ka ungaungiwa naye nodino,Nongeenge umwe okwa katuka monghedi ififa ohoni, ota ka lengifwa.
4 Eendjovo domokanya komunaendunge oda fa omeva a ya moule.
Ounongo waye otau kunguluka ngaashi omakungulukilo omeva.
5 Kashiwa okuninga omukolokoshi okatongo,Ile okutokola omuyuki shihe li pauyuki.
6 Eendjovo delai otadi twala meenhangu,Nokanya kalo otaka etifa okudengwa.
7 Okanya kelai otake li nyono po,Nomilungu dalo odo omwiyo womwenyo walo.
8 Eendjovo domulundili odi li ngaashi oikulya tai tokola elaka;*Ohadi ponwa hamudilu da yukilila medimo.
9 Keshe oo ta longo nondedeOmumwaina waao ta etifa ehanauno.
10 Edina laJehova oli li oshungongulu ya pama.
Omuyuki ota tondokele mo, ndele ta amenwa.*
11 Emona loshipuna olo oshilando shalo sha dingililwa komakuma a pama;Oli li ngaashi ekuma le shi amena momadiladilo asho.
12 Omunhu oo e na omutima we linenepeka ota ka wila moupyakadi,Ndele oo e lininipika ota fimanekwa.
13 Ngeenge omunhu okwa nyamukula, ofimbo ina uda ouyelele aushe,Osho oulai noshififa ohoni.
14 Omunhu oo e na eenghono komutima ota dulu okulididimikila ouyahame,Ndele olyelye ta dulu okulididimikila omhepo ya nyanyauka?*
15 Omutima waao e na eudeko ohau mono eshiivo,Nokutwi kwomunaendunge ohaku kongo eshiivo.
16 Okuyandja oshali ohaku yeululile nakuyandja omhito;Ohaku mu ehenifa popepi novanhu ovo va fimana.
17 Ou ha popi tete momhangu oha monika a fa e li mondjila,Fiyo osheshi mukwao e uya noku mu pula nawa.*
18 Okuumba oihoololifo ohaku xulifa po eenhamanana.Ohaku ufa etokolo* pokati kovanaenghono ovo tava kondjifafana.
19 Oshipu okukwata ko oshilando sha dingililwa komakuma a pama, shi dulife okupukulula kaume a handukifwa,Nope na eemhata odo da fa oivelo yoshilando ya idilwa.
20 Omunhu oha kutifa edimo laye noshiimati sheendjovo* daye;Ota ka kutifwa koilikolomwa yomilungu daye.
21 Elaka oli na eenghono dokupangela efyo nomwenyo,Naavo ve hole oku li longifa otava ka lya oshiimati shalo.
22 Ou a mona omukulukadi muwa okwa mona oshinima shiwa,Nota kala a hokiwa kuJehova.
23 Ohepele ohai popi nelininipiko,Ndele oshipuna ohashi nyamukula nonyanya.
24 Ope na ookaume ovo hava ningilafana owii,Ndele ope na yo ookaume ovo ve holafane ve dule ovamwainafana.
Eshangelo lopedu
^ Ile “Okwa dina.”
^ Ile “ngaashi oinima tai ponwa hamudilu.”
^ Eln., “ta yelulwa pombada,” sha hala okutya, ita kwatwa, ota kala a amenwa.
^ Ile “ya teyaukila filufilu.”
^ Ile “noku mu konakona nawa.”
^ Eln., “yoolola.”
^ Eln., “shokanya.”
