Omayeletumbulo 8:1-36
8 Ounongo owa fa omunhu ta ifana mokule,
Neendunge dokuyoolola oda fa omunhu ta ingida pombada.
2 Oto ka uda ondaka yao keexulo doikulundudu oyo i li pondjila,Nosho yo pomashakeneno omalila.
3 Popepi noivelo oyo tai twala moshilando,Poivelo yoshilando,Ohau kala tau ingida mokule tau ti:
4 “Ohandi mu ifana nye ovanhu;Ohandi yelulile ondaka yange keshe umwe.*
5 Nye ovo muhe na owino, lihongeni okukala ovanaendunge;Nye omalai, kaleni mu na omutima u na eudeko.
6 Pwilikineni, osheshi eshi handi popi osha fimana,Omilungu dange ohadi popi osho sha yuka;
7 Osheshi okanya kange ohaka popi oshili,Nomilungu dange odi tonde oukolokoshi.
8 Omalombwelo omokanya kange aeshe okwa yuka.
Kape na oo a penga, ile taa pukifa.
9 Aeshe okwa yela kwaavo ve na eendunge dokuyoololaNokwa yuka kwaavo va mona eshiivo.
10 Tambuleni ko outekuduliko wange ponhele yoshisilveri,Eshiivo ponhele yoshingoli shiwa elela,
11 Osheshi ounongo ou dule omamanya ondilo eekorali;*Oinima aishe oyo wa hala itai dulu okuyelekwa nao.
12 Ame, ounongo, ohandi kala pamwe neendunge;Onda mona eshiivo nohandi diladila pandunge.
13 Okutila Jehova osha hala kutya okutonda owii.
Ondi tonde elinenepeko, ounhwa, ondjila yowii nosho yo eendjovo da penga.
14 Ondi na omayele mawa nosho yo eendunge;Eudeko neenghono oyange.
15 Eehamba otadi twikile okupangela omolwange,Novawiliki otava tokola pauyuki.
16 Omalenga otaa twikile okupangela omolwange,Novapangeli otava tokola pauyuki.
17 Ondi hole ovo ve hole nge,Naavo tava kongo nge otava ka mona nge.
18 Oupuna nefimano oi li pwaameNosho yo emona laalushe* nouyuki.
19 Eeshali odo handi mu pe odi dule oshingoli, nokuli noshingoli sha yelifwa,Naasho handi mu pe oshi dule oshisilveri shiwa elela.
20 Ohandi ende mondjila youyuki,Mokati komalila ouyuki;
21 Ohandi yandje efyuululo tali kalelele kwaavo ve hole nge,Nohandi yadifa eemhungulilo davo.
22 Jehova aame a shita tete,Ndotete woilonga yaye oyo a longa nale.
23 Okwa tula nge po okudja pomafimbo onale,Okudja pehovelo, ofimbo edu inali shitwa.
24 Onda dalwa* fimbo paha li omeva omefuta,Fimbo paha li eefifiya tadi kunguluka omeva.
25 Onda dalwa fimbo eemhunda inadi tulwa peenhele dado,Nosho yo oikulundudu,
26 Fimbo ina shita edu nomapya alo,Ile ondwi yotete yedu.
27 Opo nda li, eshi ta longekida eulu;Eshi a tula po ongaba* pokati kewangadjo nefuta,
28 Eshi a tula ko* oilemo keulu,Eshi a shita eefifiya domoule,
29 Eshi a tulila po efuta ongaba,Opo omeva alo aha tauluke elombwelo laye,Eshi a tula po* omakanghameno edu,
30 Opo nee onda li puye ngaashi omulongi onghulungu elela.
Onde mu hafifa efiku keshe;Onda kala nda nyakukwa moipafi yaye efimbo alishe;
31 Onda li nda hafela edu, olo la shitwa li kalwe kovanhu,Nonda li nda hafela unene ovana vovanhu.*
32 Ovamwange, pwilikineni kwaame;Ovo tava diinine eendjila dange otava kala va hafa.
33 Tambuleni ko outekuduliko, opo mu ninge ovanaendunge,Inamu u lipwililikila nandenande.
34 Omunhu oo ta pwilikine kwaame ota kala a hafa,Mokuuya diva* pomivelo dange efiku keshe,Nomokuteelela popepi noikulo yomivelo dange;
35 Osheshi ou ta mono nge ota ka mona omwenyo,Nota kala a hokiwa kuJehova.
36 Ndele ou te lidimbike nge ote liyahameke ye mwene,*Naavo ve tonde nge ove hole efyo.”
Eshangelo lopedu
^ Eln., “ovanamati vovanhu.”
^ Tala Omafatululo oitya.
^ Ile “efyuululo tali kalelele.”
^ Ile “Onda etwa po onga okaana taka dalwa noudjuu.”
^ Eln., “ongonga.”
^ Eln., “pameka.”
^ Ile “shita.”
^ Ile “ovanhu.”
^ Ile “Mokukala oupafi.”
^ Ile “omwenyo waye.”
