Omuudifi 10:1-20
10 Ngaashi eedi da fya hadi mbutike omaadi edimba liwa noku a nyonauna, oulai munini nao ohau nyono po ounongo nefimano.
2 Omutima womunaendunge otau mu twala mondjila ya yuka,* ndele omutima welai otau li twala mondjila ya puka.*
3 Mondjila keshe, omo elai tali ende, ola kambela eendunge,* nohali shiivifile keshe umwe oulai walo.
4 Ngeenge ohamba oye ku handukile neenghono, ino dja po ponhele yoye, molwaashi engungumano ohali ninipike omanyono mahapu.
5 Ope na oshinima shimwe shinyemateka, osho nda mona koshi yetango; epuko olo hali ningwa kwaavo ve na eenghono olo eli:
6 Omalai okwa tulwa peendodo dihapu dopombada, ndele oipuna* ohai kala peendodo dopedu.
7 Onda mona ovapiya va londa keenghambe, ofimbo omalenga taa ende keemhadi ngaashi ashike ovapiya.
8 Omunhu oo ta fe elambo ota ka wila mulo, naao ta ngumauna po ekuma otashi dulika a like keyoka.
9 Omunhu oo ta hoko omamanya otashi dulika a yahamekwe kuo, naao ta pandaula oikuni otashi dulika a monifwe oshiponga kuyo.*
10 Ngeenge oshilongifo shoshivela osha fimha, nomunhu ina upika keemhemo* dasho, ota ka pumbwa okulongifa eenghono dihapu. Ashike ounongo ohau kwafele omunhu a pondole.
11 Ngeenge eyoka ola li omunhu ofimbo inali deulikikika, omudeuli omunawino* ke na vali oshilonga.
12 Eendjovo da dja mokanya komunaendunge ohadi eta ouwa, ndele omilungu delai ohadi li nyono po.
13 Tete, mokanya kalo ohali pitifa mo eendjovo doulai, nohauxuuninwa eendjovo dii, odo tadi eta oshiponga.
14 Ndele ohali kala ashike tali popyaana.
Omunhu ke shii osho tashi ka ningwa po; olyelye ta dulu oku mu lombwela osho tashi ke uya, ngeenge okwa fi?
15 Oilonga youdiinini yelai otai li lolola, molwaashi otali nyengwa nokuli nokumona ondjila oyo ya finda koshilando.
16 Kashi fi tuu oshinima shii unene, ngeenge ohamba yoshilando okamatyona, nongeenge omalenga ohaa hovele oivilo yao efimbo longula!
17 Oshilando itashi kala tuu sha hafa, ngeenge ohamba omonamati womunenenhu, nongeenge omalenga ohaa li pefimbo la wapala, opo a mone eenghono, ndele hakukolwa!
18 Ngeenge omunhu oku na ondede unene, oikonde yeumbo laye otai u mo, nongeenge ita longo sha nomake aye, eumbo laye otali lokwa eenhongo.
19 Omungome* owokuhafifa nakulonga, omaviinyu ohaa ningifa onghalamwenyo i kale ihafifa, ashike oimaliwa ohai wanifa po eemhumbwe adishe.
20 Nokuli nomomadiladilo* oye ino finga* ohamba noino finga oshipuna monduda yoye yokunangala; molwaashi okadila* otaka dulu okutwala ewi,* ile oshishitwa shi na omavava otashi dulu okweendulula osho sha popiwa.
Eshangelo lopedu
^ Eln., “ou li keke lokolulyo.”
^ Eln., “ou li keke lokolumosho.”
^ Eln., “omutima walo owa kambela.”
^ Ile “ovo va wana.”
^ Ile tashi dulika, “oku na okukala e i lungamena.”
^ Ile “koxulo.”
^ Eln., “mwene welaka.”
^ Ile “Oikulya.”
^ Ile tashi dulika, “nomombete yoye.”
^ Ile “ino ula nai.”
^ Eln., “oshishitwa osho hashi tuka mombada.”
^ Ile “etumwalaka.”
