Omuudifi 2:1-26
2 Opo nee onde lipopila momutima wange nda ti: “Handi uya ndi kendabale okulihafifa, opo ndi mone ouwa oo tau di mo.” Ndele tala, naasho oshongaho elela.
2 Shi na sha noindjola, onda ti: “Oyo oulai wongaho!”
Nokulihafifa, “Otaku kwafa shike?”
3 Onda kendabala okulihafifa nomaviinyu, nopefimbo opo tuu opo, onda diinina ounongo wange; onda li yo nda kanyatela oulai, opo ndi tale oinima iwa unene, oyo ovanhu hava ningi momukokomoko wefimbo lixupi lokukalamwenyo kwavo koshi yeulu.
4 Onda longa oilonga inene. Onde litungila omaumbo; onde likunina oikunino yomandjebele.
5 Onde liningila oikunino ya kula nainini, nonda kuna mo omiti doiimati di lili noku lili.
6 Onda xupa omatale omeva, opo ndi tekele oshikunino* shomiti doiimati hadi ima nawa.
7 Onde likongela ovapiya ovalumenhu novakainhu, nondi na ovapiya, ovo va dalelwa meumbo lange.* Onde likongela yo oimuna ihapu, ngaashi eengobe, eedi noikombo, ndi dule ovo va tetekela nge muJerusalem.
8 Onde likongela oshisilveri noshingoli, omamona eehamba* nosho yo oitukulwalongo. Onde likongela yo ovaimbi ovalumenhu novakainhu nosho yo osho hashi etele ovana vovanhu ehafo linene, omukainhu, heeno, ovakainhu vahapu.
9 Onghee onda ninga omunenenhu ndi dule aveshe ovo va tetekela nge muJerusalem. Ashike onda kala nda diinina ounongo wange.
10 Inandi likelela keshe osho nda li nda hala.* Inandi kelela omutima wange komalihafifo oludi keshe, molwaashi omutima wange owa li wa hafa omolwoilonga yange aishe idjuu, naasho osho sha li ondjabi* yange yoilonga yange aishe idjuu.
11 Ndele onda konakona oilonga aishe oyo omake ange a longa, noilonga aishe oyo nda wanifa po, nonda mona kutya aishe oyongaho, ngaashi okutaataa omhepo; kape na sha shi na lela ongushu* koshi yetango.
12 Opo nee onda yandja elitulemo kounongo, koupwidi nokoulai. (Oshike osho omunhu, oo ta shikula* ohamba, ta ka ninga po? Oshosho ashike sha ningwa nale.)
13 Onda mona kutya ounongo ou na ouwa u dule oulai, ngaashi ashike ouyelele u na ouwa u dule omilaulu.
14 Omunaendunge oku wete oinima aishe nawanawa,* ndele elai otali ende momilaulu. Onda ka didilika yo kutya exulilo* lavo ola faafana.
15 Opo nee onde lipopila momutima wange nda ti: “Osho tashi ningilwa elai naame otashi ningilwa nge yo.” Ouwa washike nda mona, eshi ndi na eendunge dihapu unene? Onghee onde lipopila momutima wange nda ti: “Naashi oshongaho elela.”
16 Osheshi kape na ou ta ka dimbulukiwa fiyo alushe, kutya nee omunaendunge, ile elai. Momafiku e li komesho, aveshe otava ka dimbiwa. Omunaendunge ota ka fya ngahelipi? Ota ka fya ashike ngaashi elai.
17 Onghee onda tonda okukalamwenyo, molwaashi oinima aishe oyo tai ningwa koshi yetango otai monika inyikifa oluhodi kwaame, osheshi oinima aishe oyongaho; ngaashi okutaataa omhepo.
18 Onda ka tonda oilonga aishe idjuu, oyo nda longa koshi yetango, molwaashi oinima aishe ondi na oku i fiila oo ta landula nge.
19 Olyelye e shi shii ngeenge omunhu oo ota ka kala omunaendunge, ile elai? Ashike ota ka pashukila oinima aishe oyo nda longa noudiinini nonounongo koshi yetango. Naasho oshongaho elela.
20 Onghee onda hovela okuuda nai momutima wange omolwoilonga aishe idjuu, oyo nda longa koshi yetango.
21 Osheshi omunhu ota dulu okulonga noudiinini ta wilikwa kounongo, keshiivo nokounghulungu, ndele ota ka yandja po oshitukulwa shaye* komunhu, oo ine shi longela. Naasho yo oshongaho elela noshi li oshiponga* shinene.
22 Omunhu ota mono ouwa washike moilonga yaye aishe idjuu nomomalalakano, oo tae mu linyengifa* a longe noudiinini koshi yetango?
23 Osheshi oilonga yaye ohai mu etele ouyahame noudjuu omafiku aye aeshe, nokuli nokonguloshi omutima waye ihau fuwa. Naasho oshongaho elela.
24 Kape na sha shimwe shiwa komunhu shi dulife okulya nokunwa nokuhafela* oilonga yaye idjuu. Naashi yo onda didilika kutya osha dja meke laKalunga kashili,
25 osheshi olyelye ha nu nokulya oikulya iwa e dule nge?
26 Oha yandje ounongo neendunge nokuhafifa omunhu, oo te mu wapalele, ndele omulunde okwe mu pa oshilonga shokwoongela omamona noku a yandja kwaao ta wapalele Kalunga kashili. Osho nasho oshongaho elela, ile okutaataa omhepo.
Eshangelo lopedu
^ Ile “ofuka.”
^ Eln., “ovana vomeumbo.”
^ Ile “oiniwe oyo hai kala ashike keehamba.”
^ Eln., “osho omesho ange a pula.”
^ Ile “oshipewa.”
^ Ile “ouwa.”
^ Ile “hopaenene.”
^ Ile “omesho aye okwa pashuka.”
^ Ile “oidjemo.”
^ Ile “oinima yaye aishe.”
^ Ile “oudjuu.”
^ Eln., “nomeemhangela domutima waye.”
^ Ile “nokumonifa omwenyo waye ouwa.”
