Ovatokolipangeli 10:1-18
10 Konima eshi Abimelek a fya, Tola, omonamati waPua, omonamati waDodo, omulumenhu womepata laIsaskar okwe uya okuxupifa Israel. Okwa kala ha di muSamir moshitukulwa shokeemhunda shaEfraim.
2 Okwa kala omutokoli muIsrael eedula 23. Opo nee okwa fya, nokwa pakwa muSamir.
3 Konima yefyo laTola, Jair, Omugilead, okwe uya nokwa kala omutokoli muIsrael eedula 22.
4 Okwa li e na ovanamati 30, nakeshe umwe womuvo okwa li a londa kondongi, sha hala okutya eendongi 30, nova li ve na oilando 30. Oilando oyo ohai ifanwa Havvot-jair fiyo okunena. Oi li medu laGilead.
5 Lwanima, Jair okwa fya, ndele ta pakwa muKamon.
6 Natango, Ovaisrael ova li va longa osho shii momesho aJehova, nova li va hovela okulongela ooBaal, oihongwafano yaAstoret, ookalunga vomuAram,* ookalunga vomuSidon, ookalunga vomuMoab, ookalunga vOvaammoni nookalunga vOvafilisti. Ova efa po Jehova, nokava li vali have mu longele.
7 Opo nee Jehova okwa li a handukila neenghono Ovaisrael, ndele te va yandje po* momake Ovafilisti noOvaammoni.
8 Onghee ova li va hepeka nova fininika unene Ovaisrael momudo oo. Ova kala nokufininika Ovaisrael aveshe oule weedula 18 kombinga yokoushilo womulonga waJordan, oko kwa li edu lOvaamori ovo va li muGilead.
9 Ovaammoni navo ova li hava tauluka omulonga waJordan va ka lwife Ovajuda, Ovabenjamin neumbo laEfraim. Ovaisrael ova li moudjuu munene.
10 Opo nee Ovaisrael ova pula ekwafo kuJehova, va ti: “Otwa nyona kwoove, osheshi otwa efa po Kalunga ketu, ndele hatu longele ooBaal.”
11 Ashike Jehova okwa lombwela Ovaisrael, a ti: “Hano inandi mu xupifa muEgipiti nokOvaamori, kOvaammoni, kOvafilisti,
12 kOvasidon, kOvaamalek nokOvamidian, eshi va li tave mu hepeke? Eshi mwa pula nge ekwafo, onde mu xupifa mo momake avo.
13 Ashike omwa efa nge, ndele tamu ka longela ookalunga vamwe, nomolwaasho itandi mu xupifa vali.
14 Indeni kookalunga ovo mwa hoolola nomwa pula ekwafo, nave mu xupife moudjuu weni.”
15 Ndele Ovaisrael ova tya kuJehova: “Fye otwa nyona, tu ningila osho shiwa momesho oye. Alikana, tu xupifa nena eli.”
16 Ova li va kufa mo ookalunga vokoilongo imwe ovo va li mokati kavo, ndele tava longele Jehova. Onghee ka li vali ta dulu okulididimikila* okumona oixuna kwOvaisrael.
17 Lwanima, Ovaammoni ova ongala, ndele tava ongo onhanda muGilead. Onghee Ovaisrael ova ongala, ndele tava ongo onhanda muMispa.
18 Ovanhu vomuGilead novawiliki vamo ova lombwelafana, tava ti: “Olyelye ta ka kwatela komesho, eshi hatu ka lwifa Ovaammoni? Na ninge omuwiliki wovakalimo aveshe vomuGilead.”
Eshangelo lopedu
^ Ile “vomuSiria.”
^ Eln., “landifa po.”
^ Ile “omwenyo waye kawa li vali tau dulu okulididimikila.”
