Ovatokolipangeli 11:1-40
11 Jefta, Omugilead, okwa li omukwaita omunaenghono. Okwa li omonamati wombwada, na xe yaJefta okwa li Gilead.
2 Ashike Gilead okwa li a dala ovanamati vamwe nomukulukadi waye. Eshi ovanamati vomukulukadi waye va kula, ova ta mo Jefta, ndele tava ti kuye: “Ito ka fyuulula sha meumbo latate, molwaashi ove owa dalwa komukainhu umwe e lili.”
3 Onghee Jefta okwa faduka po ovamwaxe, ndele ta ka kala kedu laTob. Ovalumenhu vamwe, ovo va li vehe na oilonga, ova waimina Jefta nove mu shikula e li omuwiliki wavo.
4 Konima yefimbo, Ovaammoni ova ka lwifa Ovaisrael.
5 Eshi Ovaammoni va lwifa Ovaisrael, ovakulunhu vomuGilead ova ya diva va ka tale ko Jefta kedu laTob.
6 Ova tya kuJefta: “Ila u ninge ondjai yetu, opo tu dule oku ka lwifa Ovaammoni.”
7 Ashike Jefta okwa lombwela ovakulunhu vomuGilead, a ti: “Hanye mwa li mu tonde nge neenghono nomwa taataa nge meumbo latate? Omolwashike mwe uya kwaame paife eshi mu li moudjuu?”
8 Opo nee ovakulunhu vomuGilead ova tya kuJefta: “Oshoshili. Ashike paife otwa alukila kwoove. Ngeenge owa i pamwe nafye, ndele hatu ka lwifa Ovaammoni, oto ka ninga omuwiliki wetu nowovakalimo aveshe vomuGilead.”
9 Opo nee Jefta okwa tya kovakulunhu vomuGilead: “Ngeenge omwa shuna nge ko tu ka lwife Ovaammoni, ndele Jehova te va findi ponhele yange, ohandi ka ninga filufilu omuwiliki weni.”
10 Ovakulunhu vomuGilead ova tya kuJefta: “Jehova na ninge ondombwedi* pokati ketu, ngeenge inatu ninga osho wa popya.”
11 Onghee Jefta okwa ya novakulunhu vomuGilead, ndele ovanhu tave mu ningi omuwiliki nondjai yavo. Opo nee Jefta okwa endulula eendjovo daye adishe koshipala shaJehova, muMispa.
12 Jefta okwa tuma ovatumwa kohamba yOvaammoni, a ti: “Ou nine nge shike, eshi we uya okulwifa nge medu letu?”
13 Ohamba yOvaammoni oya tya kovatumwa vaJefta: “Onde uya oku ku lwifa, molwaashi Ovaisrael ova kufa ko edu lange, eshi va dja muEgipiti, okudja kuArnon fiyo okuJabbok nosho yo fiyo okomulonga waJordan. Li aluleni nombili.”
14 Ashike Jefta okwa tuma vali ovatumwa kohamba yOvaammoni
15 ve ke i lombwele kutya:
“Jefta okwa ti kutya: ‘Israel ina kufa ko edu lOvamoab nosho yo edu lOvaammoni,
16 molwaashi eshi Ovaisrael va dja muEgipiti ova enda mombuwa fiyo okEfuta Litilyana, ndele tava i kuKades.
17 Opo nee Ovaisrael ova tuma ovatumwa kohamba yaEdom, va ti: “Alikana, tu kwafela tu ende medu loye.” Ashike ohamba yaEdom inai va pitika. Natango, ova tuma etumwalaka kohamba yaMoab, ashike nayo inai va pitika. Onghee Ovaisrael ova twikila okukala hava di muKades.
18 Ova enda mombuwa va kunghula nedu laEdom nosho yo nedu laMoab. Ova enda koushilo wedu laMoab nova onga onhanda moshitukulwa shaArnon. Inava tauluka eengaba daMoab, molwaashi Arnon osha li peengaba daMoab.
19 “‘Konima yaasho, Ovaisrael ova tuma ovatumwa kuSihon, ohamba yOvaamori, oo a pangela muHesbon, va ti: “Alikana, tu kwafela tu pite medu loye tu ye konhele yetu.”
20 Ashike Sihon ka li e lineekela Ovaisrael noine va pitika va pite moshitukulwa shaye. Onghee Sihon okwa ongela ovakwaita vaye aveshe nova onga onhanda muJahas, ndele tava lwifa Ovaisrael.
21 Opo nee Jehova, Kalunga kaIsrael, okwa yandja Sihon novanhu vaye aveshe momake Ovaisrael. Onghee Ovaisrael ove va finda, nOvaisrael ova kwata ko oshitukulwa ashishe omo mwa li Ovaamori.
22 Ovaisrael osho va kwata ko ngaho oshitukulwa ashishe shOvaamori, okudja kuArnon fiyo okuJabbok, nokudja kombuwa fiyo okomulonga waJordan.
23 “‘Jehova, Kalunga kaIsrael, oye a ta mo Ovaaamori medu eli, opo e li pe oshiwana shaye, Israel. Ndele mbela paife oto dulu ngoo oku va ta mo?
24 Mbela ihamu kufa ashike keshe osho kalunga keni Kemosh te mu pe? Fye nafye ohatu kufa edu olo Jehova, Kalunga ketu, te tu pe.
25 Mbela omu dule Balak, omonamati waSippor, ohamba yaMoab? Mbela okwa twa ngoo nale omhata nOvaisrael, ile e va lwife?
26 Eshi Ovaisrael va li hava di muHesbon nomeedoolopa dasho* nomuAroer needoolopa dasho nomoilando aishe oyo ya li komunghulo womulonga waArnon oule weedula 300, omolwashike ino kendabala oku i kufa ko pefimbo opo?
27 Inandi nyona sha kwoove, ashike owa ninga epuko, eshi wa ponokela nge. Jehova, oo e li Omutokoli, na tokole nena eli pokati kOvaisrael nOvaammoni.’”
28 Ndele ohamba yOvaammoni inai pwilikina ketumwalaka laJefta, olo e i tumina.
29 Onghee omhepo yaJehova oye uya kuJefta nokwa pita muGilead nomuManasse a finda kuMispe shomuGilead, nokudja kuMispe shomuGilead, okwa twikila a finda kOvaammoni.
30 Opo nee Jefta okwa anena Jehova, a ti: “Ngeenge owa yandje Ovaammoni meke lange,
31 keshe oo ta piti momuvelo weumbo lange a shakeneke nge ngeenge nda aluka nombili kOvaammoni ota ningi waJehova, nohandi ka yamba po omunhu oo e li exwikiloyambo.”
32 Onghee Jefta okwa ya a ka lwife Ovaammoni, na Jehova okwe va yandja meke laye.
33 Okwa enda te va dipaa edipao linyanyalifi ondjila aishe, okudja kuAroer fiyo okuMinnit, oilando 20, nosho yo fiyo okuAbel-keramim. Ovaammoni osho va findwa ngaho kOvaisrael.
34 Xuuninwa, Jefta okwa ya keumbo laye muMispa, ndele omonakadona waye okwa li e uya e mu shakeneke, ta shiki okangoma ye ta dana. Oye aeke a li omona waye. Ka li vali e na omonamati, ile omonakadona umwe.
35 Eshi Jefta a mona omonakadona waye, okwa pombaula oikutu yaye, ndele ta ti: “Akutu, omonakadona wange! Owa nyanyaula omutima wange,* osheshi oove handi yandje po. Onda ana kuJehova,* noitandi dulu okuningulula eano olo.”
36 Ashike omonakadona waye okwa tya kuye: “Tate, ngeenge owa ana kuJehova, ningile nge osho wa ana, osheshi Jehova okwe ku kwafela u finde ovatondi voye Ovaammoni.”
37 Opo nee omonakadona okwa tya kuxe: “Nandi ningilwe ngaha: Nandi ke likalele oule weemwedi mbali, ndele handi i keemhunda ndi ka lile oukadona elela wange pamwe novakainhu ovo handi kala navo.”*
38 Opo nee xe okwa ti: “Inda!” Okwe mu lekela, opo a ye oule weemwedi mbali, nokwa ya keemhunda pamwe noukadona vakwao a ka lile oukadona elela waye.
39 Konima yeemwedi mbali, okwa alukila kuxe, opo nee xe okwa tula moilonga eano, olo a li a ninga, li na sha nomonakadona. Omonakadona waJefta ka li a ya momilele nandenande. MuIsrael omwa li onghedindjikilile* ei:
40 Omudo keshe oukadona vomuIsrael ova kala hava i va ka pandule okamonakadona kaJefta, Omugilead, omafiku ane momudo.
Eshangelo lopedu
^ Eln., “oo a uda.”
^ Ile “odo de shi dingilila.”
^ Eln., “owa shunifa nge pedu.”
^ Eln., “Onda makula okanya kange.”
^ Ile “ndi ka lile pamwe nookahewa kange, molwaashi itandi hombolwa vali.”
^ Ile “onghedimhango.”
