Ovatokolipangeli 14:1-20
14 Simson okwa li a ya kuTimna, nomuTimna okwa mona omukainhu Omufilisti.*
2 Onghee Simson okwa ya, ndele ta lombwele xe naina, ta ti: “MuTimna onda mona mo omukainhu Omufilisti nde mu hokwa, nonda hala mu ke mu talele nge a ninge omukulukadi wange.”
3 Ashike xe naina ova tya kuye: “Hano ito dulu okukonga omukainhu movapambele voye nosho yo mokati koshiwana shetu ashishe? Mbela owa pumbwa ngoo okuya u ka konge omukulukadi mokati kOvafilisti ovo inava pita etanda?” Ndele Simson okwa tya kuxe: “Ke mu talele nge, molwaashi oye a wapalela nge.”*
4 Xe nosho yo ina kava li va didilika kutya ota wilikwa kuJehova, osheshi okwa* li ta kongo omhito a lwife Ovafilisti, molwaashi pefimbo opo Ovafilisti ova li tava pangele Ovaisrael.
5 Onghee Simson okwa ya pamwe naxe nosho yo ina kuTimna. Eshi a fika poikunino yomandjebele yomuTimna, tala, okwa dja onghoshi* tai kumbu ya finda muye.
6 Opo nee Jehova okwe mu pa eenghono nomhepo yaye, ndele ta taula onghoshi pokati ngaashi ashike omunhu ta taula pokati okakombwena neenyala. Ashike ina lombwela xe, ile ina osho a ninga.
7 Simson okwa ya, ndele ta popi nomukainhu oo, nokwa li natango e mu wapalela.
8 Lwanima, eshi a li ta shuna a twale omukainhu keumbo, okwa tanauka a tale onghoshi oyo ya fya, nomonghoshi oyo okwa mona mo exunga leenyiki nomaadi ado.
9 Onghee okwa tapela peke omaadi eenyiki, ndele ta ende ta li. Eshi a ka shakena vali naxe nosho yo ina, okwe va pa amwe va lye. Ashike ine va lombwela kutya omaadi eenyiki okwe a kufa monghoshi ya fya.
10 Xe okwa li a ya komukainhu oo, na Simson okwa li a longekidila ko oitelekela, molwaashi osho osho sha li hashi ningwa kovalumenhu ovanyasha.
11 Eshi ve mu mona, ove mu etela oinghumbi 30 yovalumenhu i kale naye.
12 Opo nee Simson okwa tya kuvo: “Alikana, ohandi ke mu lombwela otumbutumbu. Ngeenge omwa shiiva efatululo layo, ndele tamu li lombwele nge moule womafiku aheyali oitelekela, ohandi ke mu pa oikutu yoliina 30 noikutu vali imwe 30.
13 Ndele ngeenge kamu shii efatululo, omu na oku pa nge oikutu yoliina 30 noikutu vali imwe 30.” Opo nee ova tya: “Tu lombwela otumbutumbu yoye, otwa hala oku i uda.”
14 Onghee okwa tya kuvo:
“Mwaasho hashi li omwa dja sha shokuliwa,Nomwaasho shi na eenghono omwa dja sha shinyenye.”
Kava li va dula okufatulula otumbutumbu oyo oule womafiku atatu.
15 Mefiku etine, ova tya komukulukadi waSimson: “Heka omushamane woye, opo e tu lombwele efatululo lotumbutumbu oyo. Ngeenge ito shi ningi, ohatu ke ku xwika po nomundilo nosho yo eumbo laxo. Hano omwe tu ifana oku mu tu kufe oinima yetu?”
16 Onghee omukulukadi waSimson okwe mu lilila, ndele ta ti: “Ove ou tonde nge, ku hole nge shili. Owa lombwela ovanhu vomoshiwana shetu otumbutumbu, ndele ino lombwela nge efatululo layo.” Opo nee Simson okwa tya kuye: “Tate nosho yo meme navo inandi va lombwela efatululo layo. Mbela nandi li ku lombwele?”
17 Ashike omukulukadi okwa kala te mu lilile oule womafiku aheyali oitelekela. Xuuninwa, okwe mu lombwela efatululo mefiku etiheyali, molwaashi okwa kala te mu fininike. Opo nee omukulukadi oo okwa lombwela ovanhu vomoshiwana shavo efatululo lotumbutumbu oyo.
18 Mefiku etiheyali, fimbo etango inali ningina,* ovalumenhu vomoshilando ova tya kuSimson:
“Oshike shinyenye shi dulife omaadi eenyiki,Noshike shi na eenghono shi dule onghoshi?”
Okwe va nyamukula, a ti:
“Ngeno kamwa li mwa pulula nongobe yange yonyasha,Ngeno inamu shiiva efatululo lotumbutumbu oyo.”
19 Opo nee Jehova okwe mu pa eenghono nomhepo yaye, nokwa ya kuAskelon, ndele ta dipaa ovalumenhu vavo 30 nokwa kufa ko oikutu yavo, ndele te i pe ovo va fatulula otumbutumbu. Simson okwa li a handuka neenghono, eshi a li ta shuna keumbo laxe.
20 Omukulukadi waSimson okwa li a yandjwa kushimwe shomoinghumbi yaSimson, a ninge omukulukadi washo.
Eshangelo lopedu
^ Eln., “omukainhu oo okwa dalwa kovanakadona vOvafilisti.”
^ Eln., “okwa wapala momesho ange.”
^ Tashi dulika tashi ulike kuKalunga.
^ Ile “onghoshi yondume yonyasha.”
^ Ile tashi dulika, “fimbo ina ya monduda yomeni.”
