Ovatokolipangeli 6:1-40
6 Ovaisrael ova longa vali osho shii momesho aJehova, onghee Jehova okwe va yandja momake Ovamidian oule weedula heyali.
2 Opo nee Ovamidian ova kala tava pangele Ovaisrael. Molwaashi Ovaisrael ova li ve va tila, ove liningila eenhele dokuhondama* keemhunda, momakololo nomeenhele omo ihamu iwa noupu.
3 Ngeenge Ovaisrael va kunu eembuto, Ovamidian, Ovaamalek novanhu vokoushilo ohave va ponokele.
4 Ohava ongo eenhanda, opo ve va ponokele, nohava hanauna po oikunomwa yavo fiyo okuGasa, noihava xupifile po Ovaisrael sha shokulya. Ohava hanauna po yo eedi, ile eengobe, ile eendongi.
5 Ohave uya noimuna yavo nosho yo omatwali avo, vahapu va fa oshipaxu. Vo neengamelo davo itava dulu okuvalwa, nohave uya medu olo va hanaune po oikunomwa oyo.
6 Onghee Ovaisrael ova li va ninga eehepele neenghono omolwOvamidian, nova li va pula ekwafo kuJehova.
7 Eshi Ovaisrael va pula ekwafo kuJehova omolwOvamidian,
8 Jehova okwa tumina Ovaisrael omuprofeti, oo e va lombwela, a ti: “Eshi osho Jehova, Kalunga kaIsrael, a ti, ‘Onde mu kufa muEgipiti, nde mu kufa meumbo loupika.
9 Onghee onde mu xupifa momake Ovaegipti nosho yo ovahepeki veni aveshe, nonda taataa mo ovatondi veni moipafi yeni, ndele handi mu pe edu lavo.
10 Opo nee onde mu lombwela, nda ti: “Aame Jehova, Kalunga keni, kamu na okutila ookalunga vOvaamori vomedu olo mu li.” Ashike inamu dulika kwaame.’”*
11 Lwanima, omweengeli waJehova okwe uya, ndele ta kala omutumba momuti wa kula, oo wa li muOfra, waJoas, Omuabieser. Gideon, omonamati waJoas, okwa li ta xwile oilya yo-wheat moshikolelo shomaviinyu, opo iha monike kOvamidian.
12 Omweengeli waJehova okwe uya kuye, ndele ta ti: “Jehova oku li pamwe naave, omukwaita ove omunaenghono.”
13 Opo nee Gideon okwa tya kuye: “Alikana, omwene wange, ngeenge Jehova oku li pamwe nafye, omolwashike twa ningilwa oinima aishe oyo, oilonga yaye aishe iwa oi li peni, oyo ootate ve tu lombwela va ti, ‘Jehova oye e tu kufa mo muEgipti?’ Paife Jehova okwe tu efa, nokwe tu yandja momake Ovamidian.”
14 Jehova okwe mu tala, ndele ta ti: “Inda, ndele to longifa eenghono odo u na, noto ka xupifa Ovaisrael momake Ovamidian. Haame mbela nde ku tuma?”
15 Gideon okwe mu nyamukula, a ti: “Alikana, Jehova, ohandi dulu ngahelipi okuxupifa Israel? Tala, epata* lange olo linini muManasse, naame aame inandi fimana meumbo latate.”
16 Ashike Jehova okwa tya kuye: “Molwaashi ohandi ka kala pamwe naave, oto ka finda Ovamidian, va fa ashike omunhu umwe.”
17 Opo nee okwa tya kuye: “Ngeenge paife onda filwa onghenda momesho oye, ulikile nge edidiliko kutya oove to popi naame.
18 Alikana, ino dja po apa fiyo osheshi nda longekida oikulya, ndele handi ku etele.” Opo nee omweengeli okwa tya: “Itandi di po apa fiyo wa aluka.”
19 Gideon okwa ya, ndele ta longekida okakombo, nokwa ninga omungome inau ya efulika moufila woefa imwe.* Okwa tula ombelela mokambale nomunghoka mombiya, ndele te i mu etele, nokwe i mu pela momuti wa kula.
20 Omweengeli waKalunga kashili okwa tya kuye: “Kufa ombelela nomungome inau ya efulika, ndele to i tula kemanya olo la kula, ndele to tile ko omunghoka.” Osho osho a ninga.
21 Opo nee omweengeli waJehova okwa kuma ombelela nomungome inau ya efulika noxulo yodibo, oyo a li e kwete meke laye, ndele memanya tamu tema omundilo, nowa lungwinifa po ombelela nosho yo omungome inau ya efulika. Konima yaasho, omweengeli waJehova okwa dja po moipafi yaye.
22 Opo nee Gideon okwa ka mona kutya oo a li po omweengeli waJehova.
Gideon okwa ti: “Omwene Jehova, Omunamapangelo aeshe, onda mona omweengeli waJehova oshipala noshipala.”
23 Ashike Jehova okwa tya kuye: “Ombili nai kale naave. Ino tila, ito fi.”
24 Onghee Gideon okwa tungila ko oaltari yaJehova, nohai ifanwa Jehova-salomo* fiyo okunena. Natango omo i li muOfra shOvaabieser.
25 Jehova okwa popya naye oufiku oo, a ti: “Kufa ondumetana yaxo. Ondumetana onhivali i na omido heyali, nokuhanauna po oaltari oyo xo a ningila Baal nokutetaula po opala iyapuki,* oyo i li popepi nayo.
26 Konima eshi wa tunga nomamanya e li momukweyo oaltari yaJehova, Kalunga koye, koxulo yohotengulu, ou na okukufa ondumetana onhivali, ndele to i yambe i li exwikiloyambo kombada yoikuni oyo ya dja kopala iyapuki* oyo wa tetaula po.”
27 Opo nee Gideon okwa kufa ovalumenhu omulongo vomovapiya vaye, ndele ta ningi ngaashi Jehova e mu lombwela. Ashike ka li e shi ninga omutenya, molwaashi okwa li ha tila neenghono ovaneumbo laxe novalumenhu vomoshilando, onghee okwe shi ninga oufiku.
28 Eshi ovalumenhu vomoshilando va penduka ongula inene efiku la shikula ko, ova li va mona kutya oaltari yaBaal oya hanaunwa po, nopala iyapuki,* oyo ya li popepi nayo, oya tetaulwa po, nokoaltari oyo opo ya tungwa okwa yambelwa ondumetana onhivali.
29 Ova pulafana tava ti: “Olyelye a ninga ngaha?” Konima eshi va konakona, ova tya: “Gideon, omonamati waJoas, oye e shi ninga.”
30 Onghee ovalumenhu vomoshilando ova tya kuJoas: “Pitifa mo omonamati woye tu mu dipae, molwaashi okwa hanauna po oaltari yaBaal nokwa tetaula po opala iyapuki,* oyo ya li popepi nayo.”
31 Opo nee Joas okwa tya kwaaveshe ovo ve li omhinge naye: “Omolwashike tamu popile Baal? Omolwashike tamu mu amene? Keshe ou te mu popile oku na okudipawa ongula yonena. Ngeenge ye okalunga, ne lipopile ye mwene, molwaashi ope na oo a hanauna po oaltari yaye.”
32 Mefiku olo, okwa luka Gideon Jerubbaal,* a ti: “Baal ne lipopile ye mwene, molwaashi ope na ou a hanauna po oaltari yaye.”
33 Ovamidian, Ovaamalek novanhu vokoushilo aveshe ove limanga kumwe, ndele tava tauluka* nokuya mOlufilu laJisreel, ndele tava ongo onhanda.
34 Omhepo yaJehova oye uya* kuGideon, ndele ta shiki enghuma, nOvaabieser ove uya kuye ve mu yambidide.
35 Okwa tuma ovatumwa kOvamanasse aveshe, ndele navo tave uya kuye ve mu yambidide. Okwa tuma yo ovatumwa kuAsser, kuSebulon nokuNaftali, nova li ve uya oku mu shakeneka.
36 Opo nee Gideon okwa tya kuKalunga kashili: “Ngeenge oto xupifa Ovaisrael okupitila mwaame, ngaashi ashike wa li wa udaneka,
37 ohandi yale olududi leedi poshipale. Ngeenge kolududi okwa wile omume, ndele pomudingonoko walo opa kukuta, ohandi ka shiiva shili kutya oto xupifa Ovaisrael okupitila mwaame ngaashi ashike wa udaneka.”
38 Osho osho sha li sha ningwa. Eshi a penduka ongula inene efiku la shikula ko, okwa kama olududi, ndele te li fingonona fiyo osheshi mwa dja omeva mahapu oo a yadeka okalwiyo ka kula.
39 Ashike Gideon okwa tya kuKalunga kashili: “Ino handukila nge, ndele onda hala ndi ku pule vali, alikana, kwafele nge, opo ndi kendabale vali lumwe nolududi eli. Kwafele nge, opo olududi olo alike li kale la kukuta ofimbo pomudingonoko walo aushe pa kale pa tuta komume.”
40 Osho osho Kalunga a ninga oufiku oo. Olududi olo alike la li la kukuta nopomudingonoko walo aushe opa li pa wila omume.
Eshangelo lopedu
^ Ile tashi dulika, “eenhele dokutuvikila koshi yedu.”
^ Eln., “pwilikina kondaka yange.”
^ Eln., “eyovi.”
^ Eelita 22 lwaapo. Tala Oshiwedelwako B14.
^ Tali ti “Jehova oye Ombili.”
^ Tala Omafatululo oitya.
^ Tala Omafatululo oitya.
^ Tala Omafatululo oitya.
^ Tala Omafatululo oitya.
^ Tali ti “Baal ne lipopile ye mwene she likolelela kOmhango.”
^ Ile “tauluka omulonga.”
^ Eln., “uvika.”
