Ovatokolipangeli 8:1-35
8 Opo nee ovalumenhu vomepata laEfraim ova pula Gideon, va ti: “Owe tu ninga ngahelipi ngaho? Omolwashike ino tu ifana, eshi wa li wa ka lwifa Ovamidian?” Ova li ve mu tangunina unene.
2 Ashike Gideon okwe va pula, a ti: “Oshike nda longa tashi yelekwa naasho mwa longa? Mbela osho Efraim a pupudulula kashi dule omandjebele oo a likolwa kuAbieser?
3 Kalunga ina yandja hano omalenga Ovamidian, Oreb naSeeb, momake eni? Oshike nda longa tashi yelekwa naasho mwa longa?” Eshi a popya ngaho,* ova li va mwena.*
4 Opo nee Gideon okwa ya komulonga waJordan, ndele te u tauluka. Gideon pamwe novalumenhu 300 ovo a li navo ova li va loloka, ashike ova twikila okutaataa ovatondi vavo.
5 Onghee okwa lombwela ovalumenhu vomuSukkot, a ti: “Alikana, peni ovanhu ovo ndi li navo omungome, osheshi ova loloka. Ame ohandi taataa eehamba dOvamidian, Seba naSalmunna.”
6 Ashike omalenga omuSukkot okwa ti: “Owa kwata ko nale Seba naSalmunna, opo etangakwaita loye li pewe omungome?”
7 Opo nee Gideon okwa ti: “Omolweendjovo odo mwa popya, ngeenge Jehova a yandje Seba naSalmunna momake ange, ohandi ka nyanyaula ombelela yeni nomakiya nosho yo neeshosholo domofuka.”
8 Onghee okwa dja po opo, ndele ta i kuPenuel nokwa ehela natango omungome, ashike ovalumenhu vomuPenuel ove mu nyamukula ngaashi ovalumenhu vomuSukkot.
9 Okwa lombwela yo ovalumenhu vomuPenuel, a ti: “Ngeenge nda aluka nombili, ohandi ka hanauna po oshungongulu ei.”
10 Seba naSalmunna ova li muKarkor nomatangakwaita avo, ovalumenhu 15 000 lwaapo. Ovo ovo aveke va li va xupa po metangakwaita lovanhu vokoushilo, osheshi ovalumenhu 120 000 ovo va li va homata omaongamukonda ova fya.
11 Gideon okwa twikila nondjila, oyo hai endwa kovanhu, ovo hava di momatwali koushilo waNoba nokuJogbeha, ndele ta ponokele onhanda, oyo ya li inai lilongekidila okuponokelwa.
12 Eshi Seba naSalmunna va faduka po, Gideon okwe va taataa, ndele ta kwata po eehamba odo mbali dOvamidian, Seba naSalmunna, nonhanda aishe oya li ya haluka neenghono.
13 Opo nee Gideon, omonamati waJoas, okwa aluka ko koita nondjila ya finana, oyo ya ya fiyo okuHeres.
14 Ofimbo a li mondjila, okwa shakeneka omulumenhu omunyasha a dja kuSukkot nokwe mu kangheka, ndele te mu pulapula. Opo nee omulumenhu oo omunyasha okwe mu shangela omadina omalenga novakulunhu vomuSukkot, ovalumenhu 77.
15 Onghee okwa ya kovalumenhu vomuSukkot, ndele ta ti: “Seba naSalmunna ovo ava, ovo mwa li tamu kembaula nge omolwavo, eshi mwa li tamu ti, ‘Owa kwata ko nale Seba naSalmunna, opo ovalumenhu ovo u li navo va loloka va pewe omungome?’”
16 Okwa kufa ovakulunhu voshilando nomakiya nosho yo eeshosholo domofuka, ndele ovalumenhu vomuSukkot te va hongo oshilihongomwa.
17 Opo nee okwa hanauna po oshungongulu yomuPenuel, ndele ta dipaa ovalumenhu vomoshilando.
18 Okwa pula Seba naSalmunna, a ti: “Omwa dipaa ovalumenhu va tya ngahelipi komhunda yaTabor?” Opo nee ova tya: “Ova li ve ku fa, keshe umwe okwa li a fa omona wohamba.”
19 Opo nee okwa ti: “Ovo ovamwameme, ovanamati vameme. Ohandi ane medina laJehova, Kalunga omunamwenyo, kutya, ngeno omwe va efele va kale nomwenyo, ngeno itandi mu dipaa.”
20 Okwa lombwela omonamati waye woshiveli, Jeter, a ti: “Fikama, va dipaa.” Ashike omulumenhu oo omunyasha ina kufa mo eongamukonda laye e va dipae. Okwa li a tila, molwaashi okwa li munini natango.
21 Onghee Seba naSalmunna ova ti: “Fikama ove mwene u tu dipae, osheshi omulumenhu ota tokolwa she likolelela keenghono daye.” Gideon okwa fikama, ndele ta dipaa Seba naSalmunna nokwa kufa oikwaivela oyo ya li meefingo deengamelo davo, i li molupe loshikashulifo.
22 Lwanima, ovalumenhu vomuIsrael ova tya kuGideon: “Tu pangela, ove nomonamati woye nosho yo omutekulu woye, osheshi owe tu xupifa momake Ovamidian.”
23 Ashike Gideon okwa tya kuvo: “Itandi mu pangele, nomona wange ite mu pangele, Jehova oye te ke mu pangela.”
24 Gideon okwa twikila ko, a ti: “Nandi mu indile oshinima shimwe: keshe umwe womunye na pe nge olinga yomeyulu ta kufa moixuulwa* yaye.” (Ova li ve na eelinga domomayulu doingoli, molwaashi ova li Ovaismael.)
25 Ova nyamukula va ti: “Ohatu di ku pe filufilu.” Opo nee ova yala elapi, ndele omulumenhu keshe ta umbile po olinga yomeyulu ta kufa moixuulwa yaye.
26 Ondjudo yeelinga domomayulu doshingoli, odo a li a ehela, oya li eesekeli* doshingoli 1 700. Okwa pewa yo oivela i li molupe loshikashulifo, outenda vomomatwi, oikutu ipeepela ya longwa molududi leedi, oyo ya li hai djalwa keehamba dOvamidian, nomalyenge a dja meefingo deengamelo.
27 Opo nee Gideon okwe i ninga okatetahema, ndele te ka leke moshilando shavo Ofra, nOvaisrael aveshe ova haela nako pamhepo moshilando osho, noka kala omwiyo kuGideon nokoukwaneumbo waye.
28 Ovamidian osho va li va findwa ngaho kOvaisrael noinava kendabala vali oku va lwifa,* nedu ola li la tulumukwa* oule weedula 40 pefimbo laGideon.
29 Onghee Jerubbaal, omonamati waJoas, okwa shuna keumbo laye, naako oko a kala.
30 Gideon okwa li e na ovanamati 70,* osheshi okwa li e na ovakulukadi vahapu.
31 Omukulukadi waye wopomunghulo womuSekem okwa li yo e mu dalela omonamati nokwe mu luka Abimelek.
32 Gideon, omonamati waJoas, okwa fya a kulupa nokwa pakwa mombila yaxe, Joas, muOfra shOvaabieser.
33 Diva eshi Gideon a fya, Ovaisrael ova haela vali pamhepo nooBaal nova hoolola Baal-berit a ninge kalunga kavo.
34 Ovaisrael ova li va dimbwa filufilu Jehova, Kalunga kavo, oo e va xupifa momake ovatondi vavo aveshe, ovo va li ve va dingilila.
35 Ovaisrael inava ulikila oukwaneumbo waJerubbaal, sha hala kutya Gideon, ohole i na oudiinini, omolwouwa aushe oo e va ningila.
Eshangelo lopedu
^ Eln., “ondjovo.”
^ Eln., “omhepo yavo inai mu pataneka vali.”
^ Ile “momaliko oo a xupa po konima yolwoodi.”
^ Osekeli imwe oi fike peegrama 11,4. Tala Oshiwedelwako B14.
^ Eln., “inava yelula omitwe davo.”
^ Ile “li na ombili.”
^ Eln., “e na ovanamati 70 va dja metundji laye.”
