Rut 2:1-23
2 Naomi okwa li e na omupambele, omulumenhu oshipuna wedina Boas, omupambele waElimelek oo a li omushamane waye.
2 Efiku limwe, Rut Omumoab okwa tya kuNaomi: “Kwafele nge ndi ye ndi ka pupudulule oilya momapya aavo tava file nge onghenda.” Naomi okwa tya kuye: “Omumwange, inda.”
3 Opo nee okwa ya nokwa hovela okupupudulula a shikula ovateyi. Okwe ke lihanga mepya laBoas oo a li omupambele waElimelek.
4 Eshi Boas a dja moshilando muBetlehem, okwa popifa ovateyi ta ti: “Jehova na kale nanye.” Ova nyamukula va ti: “Jehova ne ku nangeke noupuna.”
5 Boas okwa pula omulumenhu omunyasha oo a li ta pashukile ovateyi, a ti: “Omukainhu oo omunyasha owapeni?”
6 Omulumenhu omunyasha oo ta pashukile ovateyi okwa nyamukula a ti: “Omukainhu oo omunyasha Omumoab, e uya naNaomi okudja kuMoab.
7 Omukainhu oo okwa pula a ti: ‘Kwafelei nge ndi pupudulule oilya oyo ya fiwa po kovateyi?’ Nokwa kala ta longo okudja ongula fiyo opaife; opo ashike ta fuda po kanini momudile.”
8 Boas okwa lombwela Rut ta ti: “Omumwange, pwilikina. Ino ya u ka pupudulule kepya limwe, ile u ye pamwe pe lili; kala povapiya vange ovakainhu.
9 Kala to tale opo tava teya mepya, ndele to va shikula. Ovapiya vange ovalumenhu onde va lombwela vehe ku kume.* Ngeenge owa fi enota, inda poitoo yomeva oyo ya tekwa kovalumenhu ovo, ndele to nu.”
10 Opo nee Rut okwa twa eengolo nokwe linyongamena pedu, ndele ta ti kuye: “Omolwashike wa fila nge onghenda nowa kenukila nge, ngeenge ame omunailongo?”
11 Boas okwe mu nyamukula a ti: “Onda uda ashishe osho wa ningila nyokomweno konima yefyo lomushamane woye nanghee wa fiya po xo nanyoko noshilongo sheni, ndele to uya koshiwana osho uhe shii nale.
12 Jehova ne ku nangeke noupuna omolwaashishe osho wa longa. Jehova Kalunga kaIsrael, oo we uya okukonga ekwafo kuye,* ne ku pe ondjabi inene.”
13 Rut okwa ti: “Omwene wange, nandi filwe onghenda koshipala shoye molwaashi owa hekeleka nge nowa popya eendjovo da kuma omutima wange nonande ame nghi fi omupiya woye.”
14 Eshi va li tava li, Boas okwa lombwela Rut ta ti: “Ila u lye omungome, velela mo-vinegar.” Onghee Rut okwa kala omutumba povateyi. Boas okwe mu pa oilya ya fengwa, ndele ta li fiyo a kuta nokwa fiya po oikulya imwe.
15 Eshi Rut a fikama a ka pupudulule, Boas okwa lombwela ovapiya vaye ovalumenhu a ti: “Mu efeni a pupudulule oilya, inamu mu ninga nai.
16 Kufei mo yo oilya imwe moipandi mu mu fiile po a pupudulule. Inamu popya sha nande osho tashi mu shololifa.”
17 Rut okwa twikila okupupudulula fiyo okonguloshi. Eshi a xwa oilya yo-barley oyo a pupudulula, okwa mona mo oefa imwe.*
18 Okwa li a ya moshilando noilya oyo a pupudulula, nainamweno okwa li e i mona. Rut okwa etela yo inamweno oikulya oyo a li a xupifa po.
19 Inamweno okwe mu pula a ti: “Owa pupudulula peni nena? Owa ka longele peni? Oo e ku fila onghenda na nangekwe noupuna.” Okwa lombwela inamweno shi na sha namwene wepya a ti: “Onda pupudulula mepya laBoas.”
20 Naomi okwa tya koshitenya shaye: “Na nangekwe noupuna kuJehova, oo ha ulikile ovanamwenyo novafi ohole i na oudiinini.” Okwa weda ko vali a ti: “Omulumenhu oo omupambele wetu. Oumwe womwaavo tava dulu oku tu kulila.”*
21 Rut Omumoab okwa ti: “Boas okwa lombwela nge a ti: ‘Kala pamwe novapiya vange ovakainhu fiyo osheshi va mana okuteya.’”
22 Naomi okwa lombwela oshitenya shaye Rut a ti: “Omumwange, oshixwepo u kale pamwe novapiya vaye ovakainhu ponhele yokuya komapya oko tashi dulika uha ka tambulwe ko.”
23 Onghee Rut okwa kala ha shikula ovapiya vaBoas ovakainhu fiyo osheshi eteyo loilya yo-barley noyo-wheat la pwa. Ashike okwa kala ha di pamwe nainamweno.
Eshangelo lopedu
^ Ile “piyaaneke.”
^ Ile “koshi yomavava aye.”
^ Eelita 22 lwaapo. Tala Oshiwedelwako B14.
^ Ile “popila.”
