Kaume a puka

Natu tye nee owa panga oukaume naumwe fimbo wa li omunyasha. Ohe ku ningifa u kale u udite u li omukulunhu e li poima, nohe ku kwafele u kale to wapalele poomakula voye. Ngeenge wa stresa, oho i kuye opo e ku kwafele u kale wa pepelelwa. Osha yela kutya owe likolelela kuye meenghalo dihapu.

Lwanima, owa ka didilika sha shihe li nawa shi na sha naye. Oha kala ashike a hala okukala naave efimbo keshe, nonande peemhito dimwe itashi wapalele. Ndele nonande ohe ku ningifa u kale u udite u li omukulunhu e li poima, ohe shi ningi monghedi oyo tai nyono po oukolele woye. Ndele eshi shii unene nokuli, okwa vaka po oimaliwa yoye ihapu.

Owa kendabala oku mu efa po, ashike ye ina hala oku ku efa po. Paife oye a ninga omupangeli woye. Osho oshe ku ningifa u livele eembedi eshi we mu shiiva.

OO oo oukaume oo ovashili vomakaya va panga noushekeleta. Omukainhu umwe wedina Earline oo a li ha shili omakaya oule womido 50 okwa ti: “Ohandi dimbuluka kutya omakaya okwa li haa kwafele nge shi dulife ngeno ndi li nomunhu. Okwa li haa kwafele nge shi dulife handi kwafelwa kukaume, nomafimbo amwe oo ashike a li kaume oo nda li ndi na.” Ngaashi Earline a didilika, oushekeleta ove li ookaume va puka nova nyika oshiponga. Nopehe na omalimbililo, osho sha popiwa metetekelo, okwa fa ashike oye ta popiwa, naye okwa li lela monghalo ya fa oyo. Eshi e ke lihonga kutya okushila omakaya okwa puka momesho aKalunga, molwaashi ohaku nyateke omalutu oo twa pewa kuKalunga, okwe ku efa. — 2 Ovakorinto 7:1.

Omulumenhu wedina Frank naye okwa li a tokola okweefa po omakaya opo a hafife Kalunga. Ashike omafimbo amwe, okwa ka kala he lihange a twa eengolo ta kongo oustombi voushekeleta ovo tashi dulika va wila pokati koipilangi oyo ya ninga ofulula meumbo. Frank okwa ti: “Pomhito oyo opo nda li nda ninga etokolo.” “Okukala nda twa eengolo momakako handi hade oustombi vomakaya osha tondifa nge. Okudja opo onda efa po omakaya.”

Omolwashike omakaya ihaa efiwa noupu? Ovaningi vomapekapeko ova mona omatomheno onhumba: (1) Omakaya ohaa piki ovanhu ngaashi ashike oingangamifi. (2) O-nicotine oyo i li mo ohai i kouluvi moule weesekonde heyali. (3) Okushila omakaya ohaku longele kumwe noinima yomonghalamwenyo yomunhu, ngaashi ngeenge ta li, ta nu, ta popi, ta xwepopaleke ostresa nosho tuu.

Ashike ngaashi Earline naFrank ve shi ulika, otashi shiiva okweefa po okukala wa pikwa konghedindjikilile oyo ya nyika oshiponga. Ngeenge oho shili omakaya nowa hala oku a efa po, okulesha oitukulwa tai shikula otaku ku kwafele u hovele onghedi ipe yokukalamwenyo.