Konga ekwafo

“Omunhu ngeenge ta nhukile umwe, aveshe vavali tava dulu okulipopila.” — Omuudifi 4:12.

NGEENGE ope na ovo tave tu kwafele, ohatu dulu okupondola mokufinda ovatondi, kashi na nee mbudi kutya omutondi oo oye lyelye, ile oshike. Onghee hano, ngeenge owa hala okweefa po okushila omakaya, oshiwa okukonga ekwafo kovapambele voye, ile kookaume, ile kukeshe oo ta dulu oku ku yambidida shili note ku lididimikile.

Pula ovo va efa po okushila omakaya, molwaashi otava dulu oku ku udila olukeno noku ku kwafela. Torben, Omukriste wokoDenmark, okwa ti: “Eyambidido lavamwe ola kwafela nge neenghono.” Abraham, wokoIndia, okwa shanga a ti: “Ohole oyo nda ulikilwa kovapambele vange nokOvakriste vakwetu, oya kwafela nge ndi efe po okushila omakaya.” Ashike omafimbo amwe, ekwafo lovapambele nolookaume kange inali wana.

Omulumenhu wedina Bhagwandas okwa ti: “Onda shila omakaya oule womido 27, ndele molwaashi onde lihonga osho Ombiibeli tai ti shi na sha neenghedi inadi koshoka, onda tokola oku a efa. Onda li nda endela ko kanini nakanini. Onda li nda lundulula ovo handi endafana navo. Opo nee onda li nda ya kexungomwenyo. Ashishe osho kasha li sha kwafela sha. Lwanima, efiku limwe oufiku onda li nda mbubulila Jehova omutima wange meilikano nonda li nde mu lilila a kwafele nge ndi efe po okushila omakaya. Opo opo ashike nde ke shi pondola”!

Oshinima shimwe sha fimana osho u na okuninga, okulilongekidila oupyakadi oo tashi dulika u shakeneke. Omaupyakadi oo ongaashi shike? Oshitukulwa tashi shikula ko otashi ka yelifa.

[Oshimhungu pepandja 5]

MBELA OU NA OKULONGIFA OMITI?

Omiti odo hadi longifwa okukwafela ovanhu va efe po okushila omakaya, ngaashi okaima oko hake linatekwa kolutu, haka ifanwa nicotine patch, oda ninga onghedi yokulikola oimaliwa moipindi. Ofimbo ino ninga etokolo olo, diladila komapulo aa taa shikula:

Oshi na ouwa washike? Eendokotola dihapu oda ti kutya ohashi kwafele omunhu a efe okushila omakaya mokuhakula oilanduliko oyo hai uya po ngeenge omunhu ta efa po omakaya. Ashike ope na eemhata molwaashi ouhaku oo kaku shiivike ngeenge ohau kwafele omunhu efimbo lile.

Oshi na owii ulipi? Omiti dimwe odi na oilanduliko, ngaashi okukala to mbilingwa, epolimano, nomaliudo okukala wa hala okulidipaa. Kaleka yo momadiladilo kutya ouhaku oo hau pingene po onikotine molutu, ohau kala nao u na oshinima shonhumba sha yukila oko noshi na yo oilanduliko. Onghee hano, paulelalela, omunhu oo ta longifa ouhaku oo natango oha kala ashike a pikwa kwaasho ta hakulifwa.

Oshike to dulu vali okuninga po? Omapekapeko amwe okwa ulika kutya eepersenda 88 dovanhu ovo va dula okweefa po okushila omakaya, ova popya kutya ova efa po omakaya inapa kalwa noinava longifa omiti dasha.