Oto dulu okufindana

EFIMBO ola fika ‘lokukala wa pama’ nou katuka eenghatu. (1 Omafimbo 28:10) Eenghatu dilipi to dulu okukatuka lwaxuuninwa opo shi ku kwafele u pondole?

Tula po efiku. OSHIKONDO SHOUHAKU NOMAYAKULO OVANHU shoko-U.S. osha ladipika kutya ngeenge owa tokola okweefa po omakaya, kendabala uha shile nandenande ekaya oule woivike ivali okudja fiku wa hovela. Ngeenge owa ningi ngaho, oto ka twikila u na omukumo woku shi ninga. Didilika efiku to hovele mokalindeli koye, lombwela ookaume koye, nokuhovela mefiku olo wa tula po, kashi na nee mbudi kutya eenghalo dilipi da holoka po.

Liningila okakalata taka ti “Efa po omakaya.” Mokakalata omo oto dulu okutula mo omauyelele taa shikula, nakeshe tuu osho tashi dulu oku ku ningifa u kale wa tokolatoko:

● Omatomheno oye okweefa

● Eengodi daavo tashi dulika u dengele ngeenge owa hangwa kehalo lokushila omakaya

● Omayele mawa, tashi dulika a kwatela mo omishangwa dOmbiibeli ngaashi Ovagalati 5:22, 23, oo tae ku kwafele u hange elalakano loye

Kala ho ende nokakalata koye efimbo keshe, nokulesha mo lwoikando mefiku. Nokuli nokonima eshi wa efa omakaya, twikila okukala ho lesha mo ngeenge to hangwa kehalo lokushila omakaya.

Enda to efa po oinima oyo hai pendula ehalo lokushila omakaya. Fimbo ino fika mefiku olo wa tula po, enda to efa po oinima oyo wa li wa ikilila okuninga eshi to shili ekaya. Pashihopaenenwa, ngeenge owa li wa ika okushila ongula eshi to penduka, kendabala uha shile fiyo pa pita ovili, ile shi dulife po. Ngeenge owa ika okushila pefimbo lokulya, ino shila vali pefimbo opo. Henuka eenhele oko ku na ovanhu hava shili omakaya. Kala ho lideula okupopya u li oove auke, to ti: “Aaye, inandi hala. Onda efa po okushila omakaya.” Okuninga ngaho otaku ku longekidile efiku linya wa tula po lokuhovela okweefa okushila omakaya. Otaku ku dimbulukifa yo kutya mafiku ito ka kala vali ho shili omakaya.

Lilongekida. Eshi efiku loye lokweefa tali ehene popepi, konga oinima oyo tai ka pingena po omakaya, ngaashi: oukelota, eesiigamu, eembudufukwa nosho tuu. Dimbulukifa ookaume koye novapambele shi na sha nokweefa po kwoye omakaya, nanghee tava dulu oku ku kwafela. Ngeenge efiku loye lokuhovela okweefa omongula, oinima ngaashi ounima vomute womakaya, outoloshe noinima oyo tai dulu oku ku tela omwiyo, ngaashi oushekeleta ve li pedu momudingonoko weumbo, motuwa ile momalimba oikutu ile koilonga, i kupula shi. Oshoshili kutya oshidjuu okweehela omunhu ekaya, ile oku ka landa okapakete, shi dulife okukufa olo li li mokaskopa. Shikwao vali, kala ho ilikana kuKalunga e ku yambidide, naunene tuu konima yokushila kwoye kwaxuuninwa. —Lukas 11:13.

Ovanhu vahapu ova dulu okuteya po oukaume wavo oo va panga nakaume oo mwii, okashekeleta. Naave oto dulu oku shi ninga. To liimbi oukolele u li xwepo nokukala wa pepelelwa.

[Efano pepandja 9]

Kala ho ende nokakalata koye efimbo keshe, nokulesha mo lwoikando mefiku