KOVALIHOMBOLI
3: Okufimanekafana
OSHA HALA OKUTYA NGAHELIPI?
Ngeenge ovalihomboli ovo ova fimanekafana, keshe umwe oha kala e na ko nasha namukwao, nonande pokati kavo ope na okuhaudafana. Embo Ten Lessons to Transform Your Marriage ola ti, “Ovalihomboli va tya ngaho ihava efa va kale monghalo oyo tai dulu okweetifa po eenamhanana. Ndele ponhele yaasho, ohava kundafana kombinga yoshinima keshe osho tashi dulu okweetifa po eenhamanana. Ohava pwilikine nelitulemo komaetepo ookaume kavo kopahombo nohava kongo eenghedi omo aveshe tava tu kumwe.”
EFINAMANGO LOMBIIBELI: “Ohole . . . ihai lalakanene ouwa wayo vene.” — 1 Ovakorinto 13:4, 5.
Micah okwa ti: “Opo ndi ulike kutya onda fimaneka omukulukadi wange, onde mu lenga nohandi henuka keshe osho ndi wete kutya otashi dulika shi mu ehameke ile shi ete omaupyakadi mohombo yetu.”
OMOLWASHIKE SHA FIMANA?
Ngeenge ovalihomboli inava fimanekafana, otashi dulika va hovele okuulafana omalaka mai ile nokuli okupopya monghedi yokuhenefimaneko, oinima oyo i na oupu okutwala fiyo ometeyohombo.
Brian okwa ti: “Okuula omukulukadi woye oinima inai tokoka, oku mu haula nosho yo oku mu ninga omashendjo oulai, otashi ke mu teya omukumo, tashi ke mu ningifa a kale e udite ehe na oshilonga, osho lwanima tashi dulika shi ka teye po ohombo yeni.”
OSHO TO DULU OKUNINGA PO
LIPULA KUTYA
Konakona onghedi yoye yokupopya nosho yo eenghatu doye oule woshivike, ndele to lipula kutya:
-
‘Mbela ohandi pangula kaume kange kopahombo shi fike peni, nohandi mu pandula shi fike peni?’
-
‘Omonghedi ilipi yokondadalunde nda ulikila kaume kange kopahombo kutya onde mu fimaneka?’
OSHO TAMU DULU OKUKUNDAFANA MU LI OVALIHOMBOLI
-
Mbela ongahelipi tamu dulu okuulika kutya omwa fimanekafana, paendjovo nopaenghatu?
-
Eenghatu nosho yo onghedi yokupopya ilipi tai ka ulika kutya inamu fimanekafana?
OMAETEPO
-
Shanga eenghedi nhatu omo wa hala okuulikilwa efimaneko. Pula yo kaume koye kopahombo a ninge sha faafana. Litaambekideni omisholondodo odo, ndele tamu longele koitwa oko mwa pumbwa okuxwepopala.
-
Shanga omusholondodo womaukwatya oo u hole mukaume koye kopahombo. Opo nee to mu lombwele kutya owe a lenga shi fike peni.
Megan okwa ti: “Opo ndi ulike kutya onda fimaneka omushamane wange, ohandi ulike kutya onde mu lenga nonda hala a kale a hafa. Luhapu oinima inini, oyo handi mu ningile, oyo hai ulike kutya onde mu fimaneka shili.”
Okukala u udite kutya ou na efimaneko hasho sha fimana, ndele osho sha fimanenena, ongeenge kaume koye kopahombo e udite kutya okwa fimanekwa.
EFINAMANGO LOMBIIBELI: “Djaleni ohole, olukeno, olune, elininipiko, omwenyo muwa nosho yo onheni.” — Ovakolossi 3:12.
