Omunhu oo he lididimikile omaupyakadi, oye oo ha ti po xwepo diva konima ngeenge a ningilwa oinima ii. Owino wa tya ngaho, ohau lihongwa okupitila moimoniwa. Ngaashi ashike okaana itaka dulu okulihonga okweenda nopehe na okulidenga po lwoikando, naye ite ke lihonga nghee e na okupondola monghalamwenyo nopehe na okushakeneka omaupyakadi onhumba.

Ounona vamwe ohava teka omukumo ngeenge inava pondola moshinima shonhumba, va taalela onghalo idjuu, ile ngeenge vakwao tave va kembaula. Vamwe ohava sholola filufilu. Ashike ova pumbwa okuuda ko oushili tau shikula:

• Haalushe hatu ka pondola moinima aishe oyo hatu ningi. — Jakob 3:2.

• Keshe umwe oha shakeneke omaudjuu monghalamwenyo. — Omuudifi 9:11.

• Epukululo ohali tu kwafele tu xwepopale. — Omayeletumbulo 9:9.

Elididimiko otali ka kwafela okaana koye ka taalele omashongo ke na omukumo.

Ngeenge okaana koye ka dopa.

EFINAMHANGO LOPAMBIIBELI: “Luheyali omuyuki ta punduka ndele ta penduka vali.” — Omayeletumbulo 24:16.

Kwafela okaana koye ke lihonge okukala ke na etale li li pandjele li na sha noupyakadi, ngeenge owa kwata moiti, ile hasho. Pashihopaenenwa, otaka ka ninga po shike ngeenge oka dopa okakonakono mofikola? Otashi dulika a tule omutwe kepepe, ta ti: “Itandi pondola sha vali!”

Opo u honge okaana koye ke lididimikile omaupyakadi, ka kwafela ka diladile kwaasho tashi ka kwafele ka xwepopale moshikando tashi uya. Kungaho, otaka ka kandula po omaupyakadi noitaka ka kala vali ke udite nai.

Pefimbo opo tuu opo, henuka okukandula po oupyakadi wokaana. Ndele ponhele yaasho, ka kwafela ka mone nghee taka dulu oku u kandula po kuko vene. Oto dulu oku ka pula kutya, “Oshike wa pumbwa okuninga, opo u xwepopaleke eudeko loye li na sha noshikundafanwa osho to hongwa?”

Ngeenge pa holoka omaudjuu.

EFINAMHANGO LOPAMBIIBELI: ‘Kamu shii kutya oshike tashi ke mu ningilwa mefiku lomongula.’ — Jakob 4:14.

Onghalamwenyo otai dulu okulunduluka inashi teelelwa. Omunhu oo e na eliko lihapu nena, mongula ota dulu okuninga omufyoona. Omunhu oo e na oukolele nena, mongula otashi dulika a kale oshingolomena. Ombiibeli oya ti: “Okutondoka shanamutete kaku li mepangelo laau e nonhapo, haita mepangelo lovakwanyati, ndelenee efimbo nesheyelo [noiningwanima yombadilila, NW] tali pangele aishe.” — Omuudifi 9:11.

U li omudali, ou na okuninga ngaashi to dulu, opo u amene okaana koye koiponga. Oshoshili kutya ito dulu okwaamena okaana koye komaudjuu aeshe.

Okaana koye molwaashi okanini natango otashi dulika ina shakeneka nale onghalo yokukanifa oilonga, ile omaudjuu opashimaliwa. Oto dulu natango oku ka kwafela ke lididimikile omaudjuu makwao. Pashihopaenenwa, ngaashi ngeenge ka filwa kaume kopofingo, ile oshilyo shimwe shomoukwaneumbo. *

Ngeenge okaana koye ka lombwelwa ka xwepopale.

EFINAMHANGO LOPAMBIIBELI: “Pwilikina epukululo . . . opo u mone eendunge dokomesho.” — Omayeletumbulo 19:20.

Ngeenge umwe ta lombwele okaana koye ka xwepopale moshinima shonhumba, inashi hala kutya okwa hala oku ka mbadapaleka, ile okuka udifa nai. Ndele okwa hala okuka kwafela ka lundulule moshinima omo ka pumbwa epukululo.

Ngeenge owa hongo okaana koye ka tambule ko epukululo, amushe nako otamu ka mona ouwa. Omushamane umwe wedina John okwa ti: “Ngeenge owa kala iho pukulula ounona voye shi na sha nomapuko avo, ihave lihongo sha. Ohava ka kala ashike va lambwa komaupyakadi, noto ka kala ashike u va li mokashoko efimbo keshe, nokukandula po omaupyakadi oo va ninga. Osho ohashi nyemateka unene ovadali nosho yo ounona.”

Ongahelipi to dulu okukwafela okaana koye ka mone ouwa, ngeenge taka pukululwa? Ngeenge okaana koye taka pukululwa, kutya nee okofikola, ile opamwe pe lili, henuka okutya epukululo ka li li pauyuki. Ponhele yaasho, oto dulu okupula kutya:

• “Omolwashike tashi dulika omunhu e ku pukulula?”

• “Ongahelipi to dulu okuxwepopala?”

• “Oshike to ka ninga po moshikando tashi uya, ngeenge owe ke lihanga monghalo ya tya ngaho?”

Dimbuluka kutya epukululo ihali kwafele ashike okaana koye paife, ndele nongeenge ka ningi omukulunhu.