Onda dalelwa mokadoolopa kanini moPoland, popepi neengaba daGerman. Okadoolopa oko oka dingililwa keefalama nokeefuka, onghee onda li handi hafele onghalamwenyo. Ovadali vange ova li va ladipika nge ndi kale nonghalamwenyo i na eityo, ndi kale handi shi endifa nawa mofikola nokulalakanena eifano liwa.

Omaupyakadi okwa ka hovela eshi nde ke lihonga eemhango koshiputudilo shopombada modoolopa yaWrocław. Onda li nda hoolola eendafano lii molwaashi onda li kokule novadali vange. Onda li ndi hole etanga lokeemhadi, ashike ookaume kange vape ova nwefa nge mo ndi kale ndi li hole unene. Oshipaana yetu oya dja moWarsaw, nomomaxuliloshivike onda li handi i landula keshe apa tai ka dana. Ngeenge tu li momalweendo oo otwa li hatu nu oikolwifa sha pitilila, hatu longifa oingangamifi nokulwa neeshipaana dimwe. Nonande okwa li ndi shii kutya ngeenge onda kwatwa kopolifi otashi dulika ndi kanife eifano olo nda li handi lalakanene, onda li handi ningi ngaho opo ndi denge po oisho yonghalamwenyo yakeshe efiku.

Ame nookaume kange otwa li tu hole okuya keeklaba nokeedisco. Ngeenge tu li oko, ohatu kala hatu lu momapandavanda. Onda kala handi mangwa po kopolifi lwoikando ashike onda li handi henuka okuya modolongo molwaashi omafimbo amwe ohandi yandje ombubo. Onda li handi diladila kutya ondi na onghalamwenyo ya denga mbada. Kakele kaasho, onda kala ndi shii kutya osho handi ningi osha puka. Onda kala handi kendabala okuya kongeleka Osoondaxa keshe, opo ndi kale neliudo la yela.

Mo 2004, Eendombwedi daJehova mbali oda li de uya peumbo letu, ndele handi dimine tu kundafane nado Ombibeli. Eshi nde lihonga shihapu kutya otashi ti shike okukala Omukriste washili, eliudo lange ola hovela okunyenyetela nge. Onda li nda mona kutya onda pumbwa okuhanwa vali sha pitilila, okuhalongifa oingangamifi nokuhenuka okweendafana naavo ihava kala metwokumwe nomifikamhango dOmbibeli. Onda li nda mona yo kutya onda pumbwa okweefa po onyati nelongifo leenghono. Nonande onda li nda didilika kutya onda pumbwa okuninga omalunduluko, onda kala ashike handi twikile nonghedi oyo inai koshoka.

Onguloshi yefiku limwe onda li handi lu novalumenhu vahetatu. Ohandi dimbuluka eshi nda li nda nangala mepandavanda, handi dengwa neengonyo nokufangwa komutwe. Onda li ndi li pokufya, ndele handi ilikana  handi ti: “Ombili Jehova, eshi inandi tula moilonga Eendjovo doye. Ngeenge onda xupu, ohandi ku udanekele kutya ohandi ka konakona Ombibeli nEendombwedi ndele handi lundulula onghalamwenyo yange.” Onda li nda xupa, nosha li sha kumwifa nge. Onda li nda wanifa po eudaneko lange lokukonakona Ombibeli.

Mo 2006, onda li nda tembukila koEngland. Elalakano lange ola li okumona oimaliwa ihapu opo ndi dule okushuna koPoland ndi ka mone odigili meemhango. Eshi handi twikile okukonakona Ombibeli onda li nda kuminwa neenghono omushangwa umwe. Omuyapostoli Paulus okwa shanga a ti: “Oinima aishe, eshi nde i shaameka nokushiiva Kristus Jesus Omwene wange, handi i tale oyo oshiponga, osheshi omolwaye nda kanifa aishe nohandi i dini oyo oimbodi yongaho, ndi likole Kristus.” (Ovafilippi 3:8) Ngaashi ame, Paulus naye okwa li a hongwa omhango nokwa li ha longo oikulumuna. (Oilonga 8:3) Ashike, Paulus okwa ka mona kutya ope na onghedi yokukalamwenyo ya denga mbada, yokulongela Kalunga nokuhopaenena Jesus. Eshi nda dilonga koshihopaenenwa shaye, onda ka didilika kutya eifano la denga mbada nelongifo leenghono hayo hai etele ovanhu ehafo lashili. Onda li nda tomhwa kutya ohandi dulu okulunduluka ngaashi Paulus. Onghee hano, onda li nda tokola okukala moEngland ndele handi efa po okulalakanena odigili meemhango.

Eshi nda twikila okulihonga kombinga yaJehova onda li nda mona kutya onda ehena popepi naye. Onda li yo nda kumwa keudaneko laye olo kutya okwa hala okudimina po aveshe ovo va hala okuninga omalunduluko. (Oilonga 2:38) Onda kala yo handi lipula kutya omolwashike Kalunga e tonde oukolokoshi eshi handi dilonga komushangwa 1 Johannes 4:16, oo tau ti: “Kalunga Oye ohole.”

Onda li yo nda kuminwa elihumbato lopaenghedi lEendombwedi. Onda li nda mona kutya ohadi kala metwokumwe nomifikamhango dopaenghedi da denga mbada. Onda li nda halelela okukala oshitukulwa shoumwainafana womounyuni aushe oo tava hafele. Konima yokukondja nomashongo nokuninga omalunduluko monghalamwenyo, onda li nda ninginifwa ndi li Ondombwedi yaJehova mo 2008.

Ombibeli oya lundulula nge filufilu ndi efe po oilonga ii ngaashi elongifo leenghono, okulongifa oingangamifi, okunwa sha pitilila nokukala ndi hole etanga lokeemhadi sha pitilila ndele handi ningi omupiya waKalunga handi hafele okuhonga ovanhu Ombibeli. Natango ondi hole okutala etanga lokeemhadi ashike ohandi shi ningi pandjele.

Onda hafa yo eshi nda hombola Esther, oo naye ha longele Jehova. Ohatu hafele lela okuhonga ovanhu Ombibeli ovo hava popi Oshipolanda ve li kouningininolundume laEngland. Ondi udite nda wanenwa. Ondi na eliudo la koshoka filufilu nonghalamwenyo i na eityo.