Eenghedi dilipi tadi dulu oku ku kwafela u hafele okulesha Ombiibeli yoye nokumona mo ouwa muhapu? Didilika omaetepo atano taa landula oo a kwafela ovanhu vahapu.

Kala ponhele tai wapalele. Kendabala okumona onhele ye limwenenena. Henuka oinima oyo tai piyaaneke opo u dule okuyandja elitulemo kwaasho to lesha. Ngeenge ope na ouyelele wa wana nomhepo yohapi, otashi ke ku kwafela u mone ouwa muhapu mwaasho to lesha.

Kala u na etaleko liwa. Molwaashi Ombiibeli oya dja kuTate yetu womeulu, oto ka mona ouwa muhapu ngeenge owa kala u na oikala ya fa yokaana oko ka halelela okulihonga komudali wako omunahole. Ngeenge ou na etaleko lii li na sha nOmbiibeli, kendabala oku li efa po opo Kalunga a dule oku ku honga. — Epsalme 25:4.

Ilikana fimbo ino hovela okulesha. Ombiibeli oi na omadiladilo aKalunga, nomolwaasho itashi kumwifa eshi twa pumbwa oku mu pula e tu kwafele tu i ude ko. Kalunga okwa udaneka okuyandja ‘omhepo iyapuki kwaava tave mu indile.’ (Lukas 11:13) Omhepo iyapuki otai dulu oku ku kwafela u ude ko omadiladilo aKalunga. Mokweendela ko kwefimbo, otai ka patulula omadiladilo oye u dule okuuda ko oinima ‘yomoule yaKalunga.’ — 1 Ovakorinto 2:10.

Lesha nelalakano lokuuda ko. Ino lesha ashike opo u mane ko ouyelele. Dilonga moule kwaasho to lesha. Lipula omapulo ngaashi aa: ‘Omaukwatya elipi a ulikwa komunhu oo handi lesha kombinga yaye? Ongahelipi handi dulu oku a tula moilonga monghalamwenyo yange?’

Litulila po omalalakano okondadalunde. Opo u mone ouwa mokulesha kwoye Ombiibeli, tokola okulihonga oshinima shonhumba osho tashi ke ku etela shili ouwa monghalamwenyo. Oto dulu okulitulila po omalalakano ngaashi aa ta landula: ‘Onda hala okulihonga shihapu kombinga yaKalunga.’ ‘Onda hala okukala omunhu e na omaukwatya mawa, omushamane ile omukulukadi e na omaukwatya mawa.’ Opo nee hoolola oitukulwa yonhumba yOmbiibeli oyo tai dulu oku ku kwafela u hange omalalakano oo. *

Omaetepo oo atano otae ke ku kwafela u dule okuhovela okulesha Ombiibeli. Ndele mbela oshike tashi dulu oku ku kwafela opo okulesha Ombiibeli kwoye ku kale kuhokwifa neenghono? Oshitukulwa tashi landula otashi ka yandja omaetepo onhumba.