Okakadona kamwe kanini oka li ka mona omwifi tau di koluungu lofakitoli imwe ndele tau ningi wa fa oilemo. Oka li ka fika pexulifodiladilo kutya elalakano lofakitoli ola li okuninga oilemo. Okuuda ko oinima pambabo kwa tya ngaho kwokaana otaku dulu okukala oshinima shiyolifa. Ashike okuuda ko pambabo oinima ya kwata moiti otaku dulu okukuma onghalamwenyo yetu. Pashihopaenenwa, ngeenge omunhu okwa kala ina lesha nawa ouyelele oo u li kokakende komiti, otashi dulu okweetifa oilanduliko ya kwata moiti.

Okuuda ko oinima yopamhepo pambabo otaku dulu okukala kwa kwata moiti neenghono nokuli. Pashihopaenenwa, ovanhu vamwe kava li va uda ko nawa omahongo aJesus. (Johannes 6:48-68) Ponhele yokulihonga shihapu, ova li va ekelashi keshe osho Jesus a li a honga. Kava li tuu va kanifa shihapu!

Mbela oho lesha Ombiibeli opo i ku wilike? Ou shii okupandulwa. Ndele mbela otashi dulika u li moshiponga molwaashi wa uda ko pambabo oinima oyo wa lesha? Osho ohashi ningilwa ovanhu vahapu. Natu ka konakone oinima yopatatu omo ovanhu tava dulu okuuda ko Ombiibeli pambabo.

• Ovanhu vamwe kava li va uda ko oshipango shOmbiibeli osho tashi ti kutya “tila Kalunga.” Ova li tava diladila kutya ova pumbwa okutila Kalunga tava kakama. (Omuudifi 12:13) Ashike Kalunga ina hala ovo have mu longele va kale ve udite ngaho shi na sha naye. Okwa ti: “Ino tila, osheshi Ame ondi li pamwe naave. Ino tala wa limbililwa, osheshi Aame Kalunga koye. Ame ohandi ku pameke ndele handi ku kwafa.” (Jesaja 41:10) Okutila Kalunga osha hala ashike okutya okukala netilofimaneko loku mu tila.

• Ovanhu vamwe inava uda ko eendjovo da nwefwa mo odo tadi ti: “Ashishe oshi notundi yasho ya pangelwa, . . . efimbo lokudalwa nefimbo lokufya.” Ova fika pexulifodiladilo kutya Kalunga okwa tokola nale kondadalunde kutya omunhu keshe ota fi naini. (Omuudifi 3:1, 2) Ashike eendjovo odo otadi ti popi ashike oule wokukalamwenyo nokuulika kutya keshe umwe womufye ota dulu okufya. Eendjovo daKalunga otadi hongo yo kutya omatokolo oo hatu ningi paumwene otaa dulu okukuma oule wokukalamwenyo kwetu. Pashihopaenenwa, ohatu lesha taku ti: “Okutila Omwene taku hapupalifa omafiku.” (Omayeletumbulo 10:27; Epsalme 90:10; Jesaja 55:3) Ngahelipi mbela? Pashihopaenenwa, okufimaneka Eendjovo daKalunga otaku tu linyengifa tu henuke okuninga oinima oyo hai etifa okuhenoukolele, ngaashi okukolwa noluhaelo. — 1 Ovakorinto 6:9, 10.

• Ovanhu vamwe ohava diladila kutya Ombiibeli otai popi sha yukilila ngeenge tai popi kutya eulu nedu “ola tuvikililwa omundilo,” nokufika pexulifodiladilo kutya Kalunga ota ka hanauna po opulaneta ei. (2 Petrus 3:7) Ashike Kalunga okwa udaneka kutya ke na efiku a efe edu lo vene li hanaunwe po. Kalunga okwa “shitila edu keengudi dalo, lo liha tengauke nande fiyo alushe.” (Epsalme 104:5; Jesaja 45:18) Onghalelo ei yoinima ya nyonauka oyo tai ka hanaunwa po filufilu onga ya fa ya hanaunwa po nomundilo, ndele hapulaneta yo vene. Eulu otali ulike kewangadjo olo tu wete ile keenyofi ile konhele yaKalunga yokukala. Kape na nande oshimwe shomwaayo tashi ka hanaunwa po.

Ngaashi twa mona moihopaenenwa oyo ya tumbulwa metetekelo, luhapu ovanhu ohava udu ko pambabo omishangwa odo hava lesha mOmbiibeli. Ndele mbela omolwashike Kalunga ta efa oshinima sha tya ngaho shi ningwe? Vamwe otashi dulika va tye: ‘Ngeenge Kalunga omunaendunge a shiya ko noku shii oinima aishe, okwa li ngeno e na oku tu pa embo olo la shangwa nawa la yela opo keshe umwe a dule oku li uda ko noupu. Mbela omolwashike ina ninga ngaho?’ Natu ka tale komatomheno atatu kutya omolwashike Ombiibeli luhapu hai udiwa ko pambabo.

1.   Ombiibeli oya nuninwa okuudiwa ko kovanhu ovo ve lininipika nova hala okulihonga. Jesus okwa ti kuXe: “Ohandi ku hambelele Tate, Omwene weulu nowedu, osheshi oinima ei owe i holeka ovanaendunge novanongo ndele we i hololela ava va fa ouhanana.” (Lukas 10:21) Ombiibeli oya shangwa monghedi oyo tai dulu ashike okuudiwa ko kwaavo ve na oikala iwa. Ovanhu ovo ve na ounhwa, oikala oyo hai kala unene ‘kovanaendunge novanongo,’ ihava udu ko noupu Ombiibeli. Ashike ovanhu ovo hava lesha Ombiibeli ve na oikala ya fa ‘youhanana’ ile younona, ovo ve lininipika nove na ehalo okulihonga, ohava udu ko nawa etumwalaka laKalunga. Kalunga ina unganeka tuu Ombiibeli nounghulungu!

2. Ombiibeli oya nuninwa ovanhu ovo va hala shili Kalunga e va kwafele ve i ude ko. Jesus okwa li a ulika kutya ovanhu ova li tava ka kala va pumbwa okukwafelwa opo va ude ko nawa osho a li a honga. Ongahelipi va li tava ka kwafelwa? Jesus okwa yelifa a ti: “Ndelenee Omupopili, Omhepo Iyapuki, Oye Tate te ke i tuma medina lange, otai mu longo ashishe ndele tai mu dimbulukifa ashishe nde shi mu lombwela.” (Johannes 14:26) Jehova oha longifa omhepo yaye iyapuki, eenghono daye tadi longo, opo a kwafele ovanhu va ude ko osho tava lesha mOmbiibeli. Ashike Kalunga iha yandje omhepo yaye kwaavo inave lineekela kutya ota dulu oku va kwafela, nomolwaasho Ombiibeli ohai monika luhapu ya fa inai yela nawa kuvo. Omhepo iyapuki ohai linyengifa Ovakriste ovo ve na eshiivo opo va kwafele ovo va hala okuuda ko oshili. — Oilonga 8:26-35.

3. Omishangwa dimwe mOmbiibeli otadi dulu ashike okuudiwa ko kovanhu pefimbo la wapala mondjokonona. Pashihopaenenwa, omuprofeti Daniel okwa li a lombwelwa a shange etumwalaka li na sha nonakwiiwa. Omweengeli okwe mu lombwela a ti: “Daniel mwenenena eendjovo edi, ndele hakifa omushangwa noshihakifo fiyo okefimbo lexulilo.” Oule womafelemido, ovanhu vahapu ova kala nokulesha embo lOmbiibeli laDaniel ashike inave li uda ko lela. Daniel naye ka li nokuli e udite ko oinima imwe oyo a li a shanga. Okwa dimina nelininipiko a ti: “Ame onde shi uda, ndelenee nghi shi udite ko.” Mokweendela ko kwefimbo, ovanhu ova li tava ka uda ko nawa omaxunganeko aKalunga oo a shangwa kuDaniel, ashike opefimbo ashike lonhumba mondjokonona olo Kalunga a hoolola. Omweengeli okwa yelifa a ti: “Inda a shike, Daniel! Osheshi eendjovo odo tadi kala da holekwa noda hakifwa noshihakifo fiyo okexulilo lefimbo.” Oolyelye va li tava ka uda ko etumwalaka laKalunga? “Ndele kape na nande umwe womovadinikalunga ta ka uda ko.” (Daniel 12:4, 8-10) Onghee hano, Kalunga iha holola eityo lomishangwa donhumba fimbo efimbo laye la wapala inali fika.

Mbela efimbo la wapala ola ningifa Eendombwedi daJehova diha ude ko Ombiibeli? Heeno. Ashike eshi efimbo laKalunga lokuyelifa oinima la fika, Eendombwedi oda pepaleka eudeko lado nehalo liwa. Oda itavela kutya odi na okushikula ovayapostoli vaKristus, ovo va li va pepaleke eudeko lavo nelininipiko ngeenge Jesus a li e va pukulula. — Oilonga 1:6, 7.

Etaleko li yolifa lokakadona kanini li na sha naapo ta pa di oilemo otali dulu okukala la fa okuuda ko ashike oshinima shinini pambabo. Ashike osho Ombiibeli tai hongo osha fimanenena kwoove. Etumwalaka lOmbiibeli ola fimana kukeshe umwe opo a kendabale okuuda ko paumwene eshi ta lesha Ombiibeli. Onghee hano, konga ekwafo opo u ude ko osho to lesha. Konga ovanhu ovo hava konakona Ombiibeli ve na oikala yelininipiko, ovo ve lineekela momhepo iyapuki yaKalunga opo va ude ko Ombiibeli nova tomhwa kutya otu li pefimbo mondjokonona omo Kalunga a hala tu ude ko Ombiibeli shi dulife nale. Ino ongaonga okupopya nEendombwedi daJehova ile u leshe shihapu konhele yado yokointaneta o-jw.org. Ombiibeli oya udaneka ya ti: “Ngeenge ho ifana omayele . . . opo nee to ka uda ko etilo lokutila Omwene nokumona eshiivo lokushiiva Kalunga.” — Omayeletumbulo 2:3-5.