Rosie okwa ti: “Ohandi kala handi faneke eenghalo donhumba momadiladilo da fa da naipala ile oinima imwe ii.” Omushangwa ulipi we mu kwafela? Umwe womomishangwa odo de mu kwafela oMateus 6:34 oo tau ti: “Inamu kala noshisho shefiku lomongula. Osheshi lo otali uya li na shalo vene. Okeshe tuu efiku la wana oudjuu walo.” Rosie okwa ti kutya eendjovo odo daJesus ode mu kwafela aha kale vali noshisho sha pitilila shi na sha nefiku lomongula. Okwa ti vali: “Onda li handi lipula noupyakadi oo ndi na pefimbo opo, ponhele yokudiladila eenghalo odo inadi ningwa ile tashi dulika itadi ka ningwa nokuli.”

Yasmine naye okwa li e udite a wililwa po koisho. Okwa ti: “Onda li handi kwena oule womafiku nonda kala ihandi kofa omafiku amwe. Omadiladilo mai okwa li taa hepeke nge neenghono.” Omushangwa ulipi we mu kwafela? Okwa kwafelwa ku 1 Petrus 5:7 oo ta ti: “Noshisho sheni shi mu dikeni [Kalunga], osheshi Oye te mu file oshisho.” Yasmine okwa ti: “Mokweendela ko kwefimbo, onda kala handi ilikana kuJehova, nokwa nyamukula omailikano ange. Onda li ndi udite nda kufwa omutengi oo wa djuupalela nge. Ohandi hangwa komadiladilo mai efimbo nefimbo, ndele paife ondi shii okuungaunga nao.”

Omukainhu omunyasha wedina Isabella okwa ti: “Ohandi diladila kutya oukwatya wokwoongaonga onde u fyuulula kutate molwaashi naye osho e li. Ohandi efa okuninga oinima oyo ya fimana, ndele handi kala ashike nda mwena ile handi tale o-TV. Onghedindjikilile oyo oya nyika oshiponga molwaashi ohai ningifa omunhu a kale e na oisho ihapu noihai longifa sha omunhu.” Okwa kwafelwa kefinamhango olo li li mu 2 Timoteus 2:15, tali ti: “Diinina, u monike kuKalunga oove omufindani momayeleko, omulongi ita fi ohoni oshilonga shaye.” Isabella okwa ti: “Ngha li nda hala Jehova a fye ohoni oilonga yange molwaashi ashike handi ongaonga.” Okwa ninga omalunduluko manene.

Sha faafana, Kelsey okwa ti: “Otashi dulika ndi kale ndi na oshilonga osho sha pumbwa okupwa, ndele ohandi ke shi ninga komunute waxuuninwa. Onda li handi kwena, ihandi kofa nondi na oshisho. Kasha li sha etela nge ouwa.” Kelsey okwa kwafelwa kOmayeletumbulo 13:16 oo taa ti: “Omunamayele keshe ta longo neendunge, ndelenee elai tali tandavelifa oulai.” Okwa popya kutya okudilonga komushangwa oo okwe mu honga kutya: “Osha fimana okuninga oinima kondadalunde nokuninga omalongekido komesho yefimbo. Paife ondi na okambo oko haka kala poshitaafula omo handi shange oilonga oyo handi ka longa, naasho ohashi kwafele nge ndi kale nde liunganeka nawa, nondiha ninge oinima komunute waxuuninwa.”

Kirsten okwa ti: “Omushamane wange okwa fiya nge po nounona vane.” Mbela efinamhango lilipi lopamishangwa le mu kwafela? Omayeletumbulo 17:17 otaa ti: “Kaume oku na ohole alushe, nomumwaina ta dalwa, a kwafe moluhepo.” Kirsten okwa li a konga ekwafo kovalongeli vaJehova vakwao meongalo. Mbela oshidjemo osha li shike? Okwa ti: “Ookaume kange ova kala nokuyambidida nge meenghedi dihapu. Vamwe ova li hava etele nge oipumbiwa yomeumbo ile eengala. Oikando itatu ovanhu vahapu ova li ve tu kwafela tu tembukile keumbo limwe. Umwe okwa li a kwafela nge opo ndi mone oilonga. Ookaume kange ova kala alushe nokuyambidida nge.”

Delphine, oo a tumbulwa metetekelo, naye okwa kala ta kondjo noudja. Konima eshi a filwa okwa ti: “Onda li ndi udite nda fa nda patelwa pondje monghalamwenyo. Onda li nda pongola neenghono.” Omushangwa umwe oo wa li we mu kwafela oo Epsalme 68:6 tau ti: “Kalunga ota dikile omawilandjila eumbo.” Okwa ti: “Ondi shii kutya ovelishe oyo itai popi eumbo komudidi. Ponhele yaasho, onda mona kutya Kalunga okwe tu pa eumbo lopamhepo, onhele yeameno lashili omo mu na ekwatafano lashili mokati kaavo ve hole Jehova. Ashike onda li ndi shii kutya itandi dulu okukala nekwatafano lopofingo navamwe ngeenge nghi na ekwatafano naJehova. Nomolwaasho Epsalme 37:4 ola kwafela nge ndi mone kutya: ‘Hafela Omwene, ndele Ye te ku pe eshi sha wapalela omutima woye.’”

Okwa xulifa a ti: “Onda li nda mona kutya onda pumbwa okukala nekwatafano la kola naJehova. Okwa denga mbada. Opo nee onda li nda ninga omusholondodo woinyangadalwa oyo handi dulu okuhafela navamwe, opo ndi dule okupanga oukaume novanhu ovo ve hole Jehova. Onde lihonga yo okutala komaukwatya mawa avamwe nokukala ihandi yandje elitulemo kokuhawanenena kwavo.”

Oshoshili kutya ookaume ketu ovo tava longele Kalunga navo inava wanenena. Eendombwedi daJehova nado ohadi kondjo nomaupyakadi ngaashi ashike keshe umwe. Ashike omafinamhango Ombiibeli okwe ve linyengifa va dule okukwafela ovanhu ngeenge otashi shiiva. Oshiwa okupanga oukaume novanhu va tya ngaho. Ndele mbela omafinamhango Ombiibeli otaa dulu ngoo okukwafela momaupyakadi oo itaa dulu okukandulwa po kunena, ngaashi omikifi doshinamenena ile oluhodi?