Oule womido omayovi, kape na oo a li e shii enyamukulo kepulo olo, nomolwaasho omikifi dekomba oda kala tadi twaalele eemwenyo dovanhu omamiliyona. Mokweendela ko kwefimbo, ovanongononi ove ke shi mona mo kutya omikifi dihapu ohadi etifwa keembakiteli nosho yo keembuto doudu, nova li tava dulu oku shi koleka. Osho osha kwafela mokukelela nokuhakula omikifi dihapu, naasho osha ningifa ovanhu omabiliyona va kale noukolele muwa nova kale nomwenyo efimbo lile.

Ongahelipi shi na sha nomapulo amwe oo a fimanenena? Mbela okushiiva oshili kombinga yomapulo taa shikula otashi ke ku kuma ngahelipi?

• Kalunga oye lyelye?

• Jesus Kristus oye lyelye?

• Ouhamba waKalunga oshike?

• Oshike she tu tuvikililwa monakwiiwa?

Ovanhu omamiliyona ova mona omanyamukulo komapulo oo nosha xwepopaleka onghalamwenyo yavo. Naave oto dulu okumona ouwa momanyamukulo oo.

Otashi dulika u lipule kutya, ‘Otashi shiiva ngahelipi okushiiva oshili kombinga yoinima?’ Oushili oyoo kutya osha ninga shidjuu neenghono okushiiva oshili i na sha noinima ihapu. Omolwashike mbela?

Ovanhu vahapu inave lineekela oinima oyo hava lombwelwa komapangelo, kovanangeshefa ile kovatoolinghundana. Ohava mono shidjuu okuyoolola pokati koshili nomataleko ovanhu, ile pokati koshili inai lixwapo noipupulu yo venevene. Molwaashi mounyuni omu yadi oipupulu novanhu inave lineekelafana vali, ohashi kala shidjuu kuvahapu okutambula ko oshili nokave shii ouwa wayo.

Ndele nande ongaho, ohatu dulu okumona omanyamukulo e li paushili komapulo a fimanenena monghalamwenyo. Ngahelipi mbela? Omokuninga omapekapeko ngaashi ashike hatu ningi shi na sha noinima yakwalukeshe.

Efiku keshe oho kongo oshili. Natu tale koshihopaenenwa shaJessica. Okwa ti: “Okamonakadona kange oke na oalegika yeembudufukwa; nokuli nongeenge oka makele ashike oproteina inininini yeembudufukwa, otashi dulu oku ka etela.” Onghee oha shilipaleke kutya oikulya oyo ta landele okamonakadona kaye inai lumbakanifwa neembudufukwa ile noproteina yado. Okwa weda ko a ti: “Tete ohandi lesha noukeka nokutya oikulya oya longwa moshike. Opo nee ohandi ningi omapekapeko a wedwa po mokukwatafana nofabrika oko kwa longwa oikulya oyo ndi shilipaleke ngeenge inava xutwifila mo eembudufukwa nande odinini. Ohandi ningi yo omapekapeko a wedwa po keedjo dimwe di lili e na sha nonghedi omo ofabrika oyo hai longo oikulya yayo.”

Otashi dulika onghedi omo ho kongo omanyamukulo komapulo oye efiku keshe inai kwata moiti ngaashi yaJessica, ashike oto dulu okulongifa omukalo tau landula:

• Konga ouyelele u li paushili.

• Ninga omapekapeko a wedwa po.

• Shilipaleka kutya eedjo odo odi shii okulineekelwa.

Osho otashi dulu oku ku kwafela u mone omanyamukulo e li paushili komapulo a fimanenena monghalamwenyo. Ngahelipi mbela?

Eshi Jessica a li ta kongo oshili i na sha nOmbiibeli, okwa longifa onghedi oyo ha longifa ngeenge ta kongo ouyelele u na sha noikulya yokamonakadona kaye. Okwa ti: “Okulesha nokuninga omapekapeko noukeka okwa kwafela nge ndi mone oshili yOmbiibeli.” Ngaashi Jessica, ovanhu omamiliyona ove lihonga osho Ombiibeli tai ti shi na sha nomapulo ngaashi:

• Omolwashike twa shitilwa?

• Omunhu oha i peni ngeenge okwa fi?

• Omolwashike ovanhu tava mono oixuna?

• Kalunga ota ka ninga po shike opo a xulife po okumona oixuna?

• Oshike tashi dulu oku tu kwafela tu kale twa hafa moukwaneumbo wetu?

Oto dulu okumona omanyamukulo ashili komapulo oo nosho yo makwao mokulesha Ombiibeli nokuninga omapekapeko a wedwa po ko www.pr418.com.