Osho ovanhu hava ti kombinga yokwiilikana kuKalunga
“Ngeenge handi ilikana, ohandi kala ndi udite kutya Kalunga oku li pwaame, e kwete nge mokwooko nota wilike nge ngeenge ndi udite nda kana.” — MARÍA.
“Omukulukadi wange okwa li e na okankela oule womido 13, nolwanima okwa ka fya. Ohandi dimbuluka kutya onda handi ilikana kuKalunga efiku keshe, nonda li ndi udite kutya ota pwilikine kwaame noku wete ouyahame wange. Onda li ndi udite ombili.” — RAÚL.
“Eilikano oli li oshali oyo ya denga mbada twa pewa kuKalunga.” — ARNE.
María, Raúl, Arne nosho yo vamwe vahapu ova dimina kutya eilikano oli li oshali ye likalekelwa. Ove udite kutya otava dulu okupopya naKalunga, oku mu pandula nokukonga ekwafo laye okupitila meilikano. Ova tomhwa filufilu okutya osho Ombiibeli ya popya shi na sha nokwiilikana kuKalunga oshoshili. Ombiibeli oya ti: “Otu na elineekelo muKalunga kutya keshe osho hatu mu indile pahalo laye ote tu udu.” — 1 Johannes 5:14.
Ashike ovanhu vahapu ohava mono shidjuu okwiitavela osho omushangwa oo tau ti. Steve okwa popya nghee a li e uditile okwiilikana. Okwa ti: “Eshi nda wanifa omido 17, ookaume kange vatatu ova fila moiponga ya yoolokafana. Umwe okwa fila moshiponga shohauto, ofimbo vavali va fila mefuta.” Steve okwa li a ninga po shike? Okwa ti: “Onda li nda ilikana kuKalunga a pe nge omanyamukulo kutya omolwashike osho sha ningwa, ashike ina pa nge enyamukulo. Onghee onde lipula kutya, ‘Omolwashike ndi na okwiilikana?’” Ovanhu vahapu ohava kala ve udite kutya omailikano avo ihaa nyamukulwa, onghee ohave lipula ngeenge ove na ngoo okutwikila okwiilikana.
Ope na yo omatomheno amwe oo a ningifa ovanhu va kale ve udite kutya okwiilikana ihaku kwafele sha. Vamwe ohava ti kutya Kalunga oku shii keshe shimwe, eemhumbwe detu nosho yo omaupyakadi etu, onghee ina pumbwa okulombwelwa.
Vamwe ova itavela kutya Kalunga iha pwilikine komailikano avo omolwomapuko oo va ninga monakudiwa. Jenny okwa ti: “Oupyakadi wange wa kula, oyoo kutya ohandi kala ndi udite ndihe na oshilonga. Onda ninga omapuko, oo handi livelele ombedi paife, ndele nande ongaho, onda tomhwa kutya Kalunga ina wana okupwilikina komailikano ange.”
Mbela ou uditile ngahelipi eilikano? Ngeenge ou na omalimbililo e na sha neilikano, oto ka mona ehekeleko eshi Eendjovo daKalunga tadi ke ku pa omanyamukulo taa mbilipaleke. Ohatu dulu okulineekela osho Ombiibeli tai ti kombinga yeilikano; * otai dulu oku tu kwafela tu mone omanyamukulo ngaashi:
-
Mbela Kalunga oha udu ngoo omailikano etu?
-
Omolwashike omailikano amwe ihaa nyamukulwa?
-
Ongahelipi hatu dulu okushilipaleka kutya Kalunga ota ka uda omailikano etu?
-
Ongahelipi eilikano tali dulu oku ku kwafela?
^ okat. 9 MOmbiibeli omu na omailikano mahapu ovapiya vaKalunga, mwa kwatelwa naao aJesus Kristus. MOmishangwa dOshiheberi, odo hadi ifanwa Etestamenti Likulu, omu na omailikano e dulife 150.
Otashi dulika yo u hafele oikundafanwa ei
OVANYASHA TAVA PULA
Omolwashike ndi na okwiilikana?
Mbela eilikano oloku ku mbilipaleka ashike, ile ola kwatela mo shihapu?
