Oudu wopamadiladilo oo u li mounyuni aushe
“Ohandi kala alushe ndi na oshisho, nokuli nonande ondi li ame auke monduda.”
“Ngeenge ndi udite nawa ohandi kala nda limbililwa. Ohandi kala ndi shi shii alushe kutya, ngeenge nda hafa ohandi ka uda nai konima yefimbo.”
“Ohandi kendabala okuyandja elitulemo kwaasho tashi ningwa mefiku, ashike omafimbo amwe ohandi ke lihanga ashike ndi na oshisho shoinima ihapu.”
Omatyekosha oo aavamwe ovo ve na oudu wopamadiladilo. Mbela naave, ile umwe oo u hole otamu piti monghalo oyo?
Shilipalekwa kutya haave auke. Kunena ovanhu vahapu ova kumwa koupyakadi wopamadiladilo, kutya nee ovo vene, ile ovamwe ovo ve hole.
Kape na omalimbililo kutya otu li ‘momafimbo madjuu okukaliwa muo,’ oo taa etifa omaupyakadi mahapu. (2 Timoteus 3:1) Omukonakoni umwe okwa mona kutya, mounyuni aushe, omunhu umwe womovanhu vahetatu ota kondjo nomukifi wopamadiladilo. Mo 2020, o-COVID-19 oya ningifa ovanhu vahapu va kale ve na oshisho nosho yo omukifi wepolimano shi dulife nale.
Osha fimana okushiiva kutya ovanhu vangapi kunena ve na oshisho nosho yo epolimano. Ndele osha fimanenena okushiiva nghee ove nosho yo ovo u hole mu udite.
Oudu wopamadiladilo oshike?
Ngeenge ku na oudu wopamadiladilo, oho kala u udite nawa nomadiladilo ohaa kala taa longo nawa. Oho dulu okuungaunga nostresa, ho pondola moilonga noho kala wa wanenwa monghalamwenyo.
Oudu wopamadiladilo: . . .
-
KAU FI oidjemo younghundi wonhumba.
-
OMUKIFI oo hau etifa ouyahame, hau piyaaneke omadiladilo, omaliudo nosho yo elihumbato.
-
Luhapu otau dulu okuningifa shidjuu komunhu a pange oukaume navamwe nosho yo okuungaunga noinima monghalamwenyo.
-
Otau dulu okukwata ovanhu vomido adishe, vomihoko adishe, vomomaputuko aeshe, vomalaka aeshe, vomomalongelokalunga aeshe, va hongwa, ile inava hongwa nosho yo oshipuna, ile ohepele.
Nghee to dulu okumona ekwafo li na sha nomaupyakadi opamaliudo
Ngeenge ove, ile umwe oo u hole okwa didilike kutya ota lunduluka momaukwatya, mokukofa, ile mokulya, e na oshisho, ile ha kala a nyemata otashi dulika mwa pumbwa okukonga ekwafo kovanawino, opo va dule oku mu kwafela mu kandule po oupyakadi. Ndele ope ni to dulu okukonga ekwafo?
Omulumenhu omunaendunge, oo a li ko nale, Jesus Kristus, okwa ti: “Ovanhu ovo ve na oukolele inava pumbwa omuhakuli, ndele ovovo ashike tava vele.” (Mateus 9:12) Ovo tava kondjo nounghundi nohava pewa ouhaku wopaunamiti otava dulu okuninga shihapu va ninipike omadidiliko avo notashi dulu oku va kwafela va hafele onghalamwenyo. Osha fimana okukonga ekwafo diva ofimbo onghalo inai naipala. a
Nonande Ombiibeli kai fi embo lopaunamiti, osho ya popya otashi dulu oku tu etela oukolele wopamadiladilo. Ohatu ku shivi u konakone oitukulwa ya shikula ko, oyo ya kundafana nghee Ombiibeli tai dulu oku tu kwafela tu ungaunge noupyakadi wopamadiladilo.
a Oshungonangelo inashi popya kondadalunde ouhaku wonhumba. Keshe umwe okwa pumbwa okuhoolola noukeka, ofimbo i na ninga etokolo.
Otashi dulika yo u hafele oikundafanwa ei
OMAHONGO OMBIIBELI A FIMANA
Omolwashike Kalunga a efa okumona oixuna ku kale po?
Ovanhu vahapu ohava pula kutya omolwashike mounyuni mu na okumona oixuna kuhapu nosho yo outondwe. Ombiibeli otai yandje enyamukulo tali mbilipaleke.
KALENI OUPAFI!
Oudu wopamadiladilo movanyasha tau lundu pombada — Ombiibeli otai ti ngahelipi?
Ombiibeli otai yandje omayele taa longo kovanyasha ovo tava ungaunga noudu wopamadiladilo.
KOMBINGA YETU
Pula u talelwe po
Kundafaneni kombinga yepulo lopaMbiibeli, ile u lihonge shihapu kombinga yEendombwedi daJehova.
