MOMAFIKU 26 Desemba 2004, okanhunhu Simeulue, oko ke li koushilolundume wefuta laSumatra muIndonesia, oka li ka dengwa kekakamo ledu lounene woshiyelekifo 9.1. Aveshe ovo va li kokanhunhu oko ova li tava tale kefuta. Opo nee efuta ola li la lota kanini, ndele ovanhu aveshe tava tondokele keemhunda tava ingida tava ti: “Smong! Smong!” outumbulilo oo hau longifwa moshitukulwa ngeenge tava popi oshikungulu. Omakufikufi manene efuta okwa li a hanauna po omaumbo mahapu meni ashike lominute 30.

Okanhunhu kaSimeulue oko ka dengwa tete koshikungulu shinene. MuSimeulue omwa li ovakalimo 78 000, ndele omwa fila ashike ovanhu va 7. Omolwashike mwa fila ashike ovanhu vanini? * Ovanhu ovo hava kala kounhunhu ove na omupopyo tau ti: ‘Ngeenge edu la kakama, ndele efuta tali loto, tondokeleni keemhunda osheshi efuta otali ka kungulula po diva oshilando.’ Okudja poshikungulu osho, ovakalimo muSimeulue ova kala hava didilike noupu kutya oshikungulu oshi li popepi ngeenge ve wete efuta tali lunduluka. Ova li va xupa molwaashi ova li va dulika komalondwelo.

Ombiibeli oya popya kombinga yehanauno olo li li popepi, “oudjuu unene, inau kala ko okehovelo lounyuni fiyo opaife, ndele ngaashi itau uya vali.” (Mateus 24:21) Osho itashi ti kutya Edu otali hanaunwa po koinima oyo hai ndulukwa kovanhu ile koiponga yopaushitwe, molwaashi Kalunga edu okwe li shita li kale po fiyo alushe. (Omuudifi 1:4) Ponhele yaasho, poudjuu oo twa teelela, Kalunga ota ka ‘hanauna po ovo hava nyono edu.’ Ota ka xulifa po oukolokoshi nokumona oixuna akushe. (Ehololo 11:18; Omayeletumbulo 2:22) Oo itaa ka kala tuu omanangekonoupuna makumwifi!

Mepingafano noiponga yopaushitwe ngaashi oikungulu nomakakamo edu oo haa dipaa ovanhu ovo vehe na ondjo, ehanauno olo twa teelela hasho tali ka ninga ngaho. Ombiibeli oya ti kutya “Kalunga Oye ohole,” ndele Jehova (edina laKalunga) okwa udaneka kutya “ovayuki, vo otava ka fyuulula oshilongo, ndee tava kala mo alushe.” (1 Johannes 4:8; Epsalme 37:29) Oshike tashi dulu oku ku kwafela u ka xupe poudjuu munene noku ka hafela omanangekonoupuna oo a udanekwa? Owa pumbwa okudulika komalondwelo.

Katu shii efiku lokondadalunde olo Kalunga ta ka xulifa po oukolokoshi nokumona oixuna, molwaashi Jesus okwa ti: “Ndelenee efiku olo notundi oyo kaku na ou e i shii, nande ovaengeli vomeulu, ile Omona, oTate Oye aeke.” Ashike nande ongaho, Jesus okwe tu ladipika tu ‘kale oupafi.’ (Mateus 24:36; 25:13) Omolwashike mbela? Ombiibeli oya ti kutya eenghalo dounyuni otadi ka naipala ofimbo exulilo inali  uya. Ngaashi ashike ekakamo ledu olo la li la tetekela oshikungulu la li la kwafela ovakalimo muSimeulue va kale oupafi, oiningwanima oyo tai linyenge mounyuni otai tu kwafele tu mone kutya exulilo oli li popepi. Tala okamhungu oko ka yelifa kombinga yoiningwanima imwe oyo ya popiwa mOmbiibeli.

Imwe yomoiningwanima oyo tai tetekele oudjuu munene oya holoka nale ofimbo imwe tai twikile natango. Ashike Jesus okwe tu lombwela kutya ngeenge hatu “mono aishe ei” natu kale tu shii kutya exulilo oli li popepi elela. (Mateus 24:33) Lipula kutya: ‘Oinima aishe oyo ya popiwa metetekelo, mbela onaini (1) ya ningwa mounyuni aushe, (2) ya ningwa pefimbo limwe, nongahelipi (3) tai naipala neendelelo?’ Osha yela kutya oiningwanima oyo otai ningwa pefimbo letu.

Umwe oo a li omupresidende waAmerika pefimbo lonale okwa ti: “Omalondwelo oo haa yandjwa kuyele . . . ohaa xupifa eemwenyo.” Moitukulwa oyo ya li ya dengwa koshikungulu shomo 2004 omwa li mwa yandjwa omalondwelo oo a li taa ka kwafela opo oikungulu oyo tai ke uya iha dipae ovanhu vahapu. Sha faafana, Kalunga naye okwe tu pa omalondwelo ofimbo exulilo inali uya. Ombiibeli oya xunganeka ya ti: “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” — Mateus 24:14.

Omudo wa ya, Eendombwedi daJehova oda longa eevili di dulife pebiliyona 1.9 moilonga yokuudifa, moilongo 240, momalaka e dulife 700. Oilonga youdiinini oyo tai longwa kunena otai ulike kutya exulilo oli li popepi. Molwaashi Eendombwedi odi hole ovanhu vakwao, ohadi longo noudiinini opo di va londwele kombinga yefiku laKalunga letokolo olo li li popepi. (Mateus 22:39) Omalondwelo a tya ngaho otae ke ku etela ouwa molwaashi Jehova oku ku hole. Ombiibeli oya ti kutya ‘Kalunga ina hala pa kane nande  oumwe, ndelenee aveshe ve lialulukile melidilululo.’ (2 Petrus 3:9) Oho ulike ngoo olupandu mokudulika komalondwelo opahole oo a dja kuKalunga?

Ngaashi sha popiwa pehovelo, diva ashike eshi ovakalimo muSimeulue va mona efuta la lota, ova li va ya onhapo keemhunda. Ova li va xupa omolwonghatu oyo va katuka meendelelo. Nafye opo tu ka xupe poudjuu oo twa teelela, otwa pumbwa okukatuka eenghatu meendelelo. Ngahelipi mbela? Omuprofeti Jesaja okwa nwefwa mo a shange shi na sha neshivo olo tali ka tamunuka mo neenghono “pomaxulilo omafiku,” efimbo olo tu li mulo. Ombiibeli oya ti: “Ileni tu ka londeni komhunda yOmwene . . . opo e tu longe eendjila daye, fye tu shiive okweenda momalila aye.” — Jesaja 2:2, 3.

Ou na okulonga noudiinini opo u londe koxulo yomhunda oyo, ashike oku na eameno. Sha faafana, ovanhu omamiliyona mounyuni aushe ova kwafelwa kOmbiibeli va shiive eendjila daKalunga nova lundulule onghedi yavo yokukalamwenyo. (2 Timoteus 3:16, 17) Osho ohashi va kwafele va ‘ende momalila aKalunga’ nova kale meameno laye.

Mbela oto ka tambula ko eshivo olo noku ka hafela omafiloshisho aKalunga opahole momafiku aa madjuu? Ohatu ku ladipike u konakone noukeka Omishangwa odo di li mokamhungu odo tadi yandje oumbangi kutya otu li ‘momafiku axuuninwa.’ (2 Timoteus 3:1) Eendombwedi daJehova domoshitukulwa sheni otadi ka kala da hafa oku ku kwafela u ude ko nokushiiva nghee to dulu okutula moilonga omishangwa odo. Oto dulu yo okumona omanyamukulo komapulo oye, ngeenge owa i kepandja letu lokointaneta ko-www.pr418.com/kj. Tala opo pa shangwa KOMBINGA YETU > OMAPULO OO HAA PULWA LUHAPU.