OYO KAI FI TUU ONGHUNDANA ITUNHULA! Omushiti wetu okwa udaneka kutya ohatu ka kala nomwenyo fiyo alushe kombada yedu. Ashike ovanhu vahapu inave shi itavela. Ohava ti: ‘Keshe umwe oku na okufya. Efyo oli li oshitukulwa shonghalamwenyo.’ Vamwe ova itavela kutya ovanhu otava dulu okukala nomwenyo fiyo alushe, ndele ha kombada yedu. Ohava ti kutya ohatu ka kala nomwenyo fiyo alushe meulu konima ngeenge otwa fi. Ove oto ti ngahelipi?

Fimbo ino nyamukula epulo olo, natu konakoneni nghee Ombiibeli ya nyamukula omapulo aa atatu: Onghedi omo omunhu a shitwa otai ulike ngahelipi kutya okwa shitwa a kale ko oule wefimbo li fike peni? Elalakano laKalunga lopehovelo li na sha nedu nosho yo novanhu olilipi? Omolwashike ovanhu hava fi?

Ovanhu ovo ve likalekelwa moishitwa aishe i na omwenyo oyo i li kombada yedu. Ngahelipi mbela? Ombiibeli otai ulike kutya ovanhu ovo ashike va shitwa “oshifefa” shaKalunga nove mu ‘fa.’ (Genesis 1:26, 27) Osho osha hala okutya ngahelipi? Osha hala kutya ovanhu ova shitwa ve na omaukwatya a fa aKalunga ngaashi ohole nosho yo ouyuki.

Shikwao vali, ovanhu ova shitwa ve na oukwatya wokudula okuyoolola pokati kaasho shiwa naasho shii, okukala ve na ehalo lokushiiva nokukala nekwatafano naKalunga. Nomolwaasho tu na okuulika olupandu li na sha neshito alishe nosho yo oinima ikumwifi oyo i li meshito ngaashi eholokepo loinima oyo ya shitwa, omikwelengedjo nosho yo omatevelo e na sha neshito. Ovanhu ove likalekelwa molwaashi ovo ashike tava dulu okulongela Omushiti. Omaukwatya oo okwa ningifa ovanhu va kale ve likalekelwa moishitwa aishe oyo i li kombada yedu i na omwenyo.

Diladila kwaashi: Mbela Kalunga ota dulu okupa ovanhu omaukwatya oo madidilikwedi, e shii kutya otava dulu oku a kulika, ngeenge okwa nuna ashike va kale nomwenyo omido dinini? Oushili oyoo kutya Kalunga okwa pa ovanhu omaukwatya oo madidilikwedi opo va dule okuhafela onghalamwenyo kombada yedu fiyo alushe.

Ovanhu vamwe ohava ti Kalunga ina nuna ovanhu va kale nomwenyo fiyo alushe kombada yedu. Ohava ti kutya edu onhele ashike yopakafimbo, oyo tai u fa kutya oolyelye va wana okuya meulu opo va ka kale nomwenyo fiyo alushe puKalunga. Ngeenge osho oshoshili, mbela itashi ningifa Kalunga oye a pewe  ombedi omolwoukolokoshi oo u li kombada yedu? Osho otashi ka kala tashi kondjifafana nelalakano laye li na sha neshito. Ombiibeli oya popya shi na sha naye ya ti: “Eendjila daye adishe do omatokolo. Oye Kalunga koudiinini, ndele ehe nowadi. Ye omuyuki nomunashili.” — Deuteronomion 32:4.

Ombiibeli oya holola elalakano laKalunga li na sha nedu ya ti: “Eulu olo olOmwene, ndelenee edu okwe li pa ovana vovanhu.” (Epsalme 115:16) Onghee hano, Kalunga okwa shitila kedu oinima ihokwifa nokwa tula ko keshe osho ovanhu va pumbwa opo va dule okuhafela onghalamwenyo nokukala nomwenyo fiyo alushe kombada yedu, itava fi. — Genesis 2:8, 9.

“Eulu olo olOmwene, ndelenee edu okwe li pa ovana vovanhu.” — Epsalme 115:16

Natango Ombiibeli oya holola elalakano laKalunga li na sha novanhu. Okwa lombwela ovalihomboli votete a ti: ‘Dalafaneni nokuhapupala ndele yadifeni edu, lo nali kale mepangelo leni, ndele pangeleni oinamwenyo aishe tai linyenge kombada yedu.’ (Genesis 1:28) Osho kasha li tuu oufembanghenda kuvo okufila oshisho nokutamununa mo Oparadisa fiyo osheshi ya mana ko edu alishe! Onghee hano, Adam naEva nosho yo oludalo lavo ova li tava ka kala nomwenyo fiyo alushe kombada yedu, ndele hameulu.

Omolwashike hatu fi ngeenge halo la li elalakano laKalunga? Ombiibeli otai ulike kutya oshishitwa shimwe shopamhepo, osho lwanima sha ka ifanwa Satana Ondiaboli, osha li tashi kendabala okuya moshipala elongekido laKalunga olo a li a tula moshikunino shaEden. Ngahelipi mbela?

Satana okwa li a nwefa mo ovadali vetu votete, Adam naEva, opo va tukululile Kalunga oshibofa ngaashi ye. Eshi Satana e va lombwela kutya Kalunga okwe va ngungunina ouwa, notava dulu okutokola pokati kaasho shi li mondjila naasho sha puka, ova li va waimina Satana noku amuka ko kuKalunga. Oshidjemo osha li shike? Mokweendela ko kwefimbo ova ka fya ngaashi Kalunga e va lombwela. Ova kanifa oufembanghenda wokukala nomwenyo fiyo alushe mOparadisa kombada yedu. — Genesis 2:17; 3:1-6; 5:5.

Oilanduliko oyo ya etifwa kounashibofa waAdam naEva oya kuma oludalo lavo alishe. Eendjovo daKalunga oda ti: “Oulunde wa etwa mounyuni komunhu umwe [Adam], nefyo okoulunde, osho nee efyo ole uya movanhu aveshe, shaashi aveshe va nyona.” (Ovaroma 5:12) Ohatu fi molwaashi otwa fyuulula oulunde nefyo kovadali vetu votete, ndele ihatu fi molwaashi sha li ‘elalakano’ laKalunga.

Ounashibofa oo wa tukululwa moshikunino shaEden inau ya moshipala elalakano laKalunga lopehovelo li na sha nokukala kwovanhu kombada yedu. Ohole yaKalunga nosho yo ouyuki waye oye mu linyengifa opo a konge oupitilo woku tu mangulula moulunde nefyo. Ombiibeli oya ti: “Ondjabi youlunde oyo efyo, ndelenee oshalinghenda yaKalunga oyo omwenyo waalushe muKristus Jesus, Omwene wetu.” (Ovaroma 6:23) Kalunga omunahole okwa “yandja Omona waye Ewifa, opo keshe ou te mu itavele aha kane, ndelenee a kale e nomwenyo waalushe.” (Johannes 3:16) Jesus okwa futila po ashishe osho sha kanifwa kuAdam, eshi e liyandja nehalo liwa a ninge oikulila. a

Mafiku Kalunga ota ka ninga edu oparadisa ngaashi a udaneka. Naave oto dulu oku ka kala moparadisa ngeenge owa tula moilonga elombwelo laJesus olo tali ti: “Indeni mu pite moshivelo sha finana. Osheshi oshivelo oshinene, nondjila oya mbwalangadja ei tai twala mekano, ndele ava tava i mo ovahapu; ndele oshivelo oshinini nondjila oya finana ei tai twala momwenyo, novanini vongaho ovo tave i mono.” (Mateus 7:13, 14) Onghee hano, onakwiiwa yoye otai ke likolelela kwaasho wa hoolola. Mbela oshike u na okuninga po?