Ngaashi Jesus a xunganeka, onghundana iwa yOuhamba waKalunga otai udifilwa ounyuni aushe. (Mateus 24:14) Embo lOmbiibeli laDaniel otali tu lombwele kutya Ouhamba oo ou li epangelo laKalunga. Etukulwa etivali lembo olo, ola hokolola eshikulafano lokupangela kwomapangelo opanhu ile omauhamba okudja kuBabilon shonale fiyo okunena. Opo tu mone osho tashi ka ningwa monakwiiwa, ovelishe 44 oya ti:

“Kalunga ou komeulu ota ka dika ouhamba itau ka teka po fiyo alushe, nepangelo lao itali ka yandjwa koshiwana shimwe. Ndele wo otau ka nyanyaula notau ka teyaula omauhamba aeshe noku a xulifa po, ndelenee woovene tau ka kala fiyo alushe.”

Exunganeko olo nosho yo amwe Ombiibeli otaa ulike kutya Ouhamba waKalunga otau ka pingena po omapangelo aeshe opanhu nokweeta elandulafano kombada yedu. Mbela onghalamwenyo otai ka kala ya tya ngahelipi koshi yOuhamba waKalunga? Natu ka taleni komaudaneko amwe matunhula oo taa ka wanifwa mafiku.

• ITAPA KA KALA VALI OITA

  Epsalme 46:9: ‘Kalunga ota xulifa po oita fiyo okeengaba dedu, ndele ta teyaula omauta nomaonga, nomatemba oita te a xwike po nomundilo.’

  Diladila nghee ounyuni tau ka kala ngeenge oimaliwa oyo hai longifwa mokunduluka oilwifo oya ka kala tai longifwa mokuwapaleka eenhele odo tadi etele ovanhu ouwa ponhele va dipawe koilwifo oyo. Exunganeko olo otali ka wanifwa po koshi yOuhamba waKalunga.

• OUYAHAME ITAU KA KALA PO VALI

  Jesaja 33:24: ‘Kape na nande umwe ta ti: “Aame oshingone.”’

  Diladila nghee ounyuni tau ka kala ngeenge kape na ou ta vele omutima, okankela, omalaria ile omaudu amwe vali. Itapa ka kala pa pumbwa oipangelo nosho yo omiti. Ovanhu ovo tava ka kala kombada yedu monakwiiwa, otava ka kala ve na oukolele muwa.

• ONDJALA ITAI KA KALA PO VALI

  Epsalme 72:16: “Moshilongo namu kale oshishipo shoilya, yo i mene fiyo okeexulo deemhunda.”

  Edu otali ka menifa oikulya ya henena keshe umwe. Itapa ka kala vali ondjala nosho yo omanyutu.

• ITAPA KA KALA VALI OUYAHAME, OLUHODI NEFYO

  Ehololo 21:4: “[Kalunga] ota feta po omahodi momesho avo, nefyo itali kala po vali ile oluhodi ile okulila ile ouyehame itau kala po vali, osheshi eshi shotete osha xula po.”

   Ovanhu otava ka kala moparadisa kombada yedu fiyo alushe va wanenena. Osho osho Omushiti wetu, Jehova Kalunga, a udaneka.

Mbela oinima aishe oyo otai ka wanifwa ngoo shili? Nonande ovanhu vahapu otava tu kumwe neudaneko loku ka kala nomwenyo olo tali hangwa mOmbiibeli, omolwomatomheno onhumba ile ongadi ohava mono shidjuu oku shi itavela. Osho itashi tu kumwifa molwaashi kape na omunhu umwe a kalele nomwenyo fiyo alushe opo e tu lombwele kombinga yaasho.

Ovanhu ova kala ovapika voulunde nefyo, naasho oshe va etela ouyahame, okumona oixuna nosho yo eenghalo di nyikifa oluhodi. Ovanhu ova tala ko onghalamwenyo oyo kutya oi li paushitwe molwaashi oinima oyo oya kala ye va wilila po oule womido. Ashike ediladilo lovanhu ola yooloka ko filufilu kelalakano lOmushiti wetu, Jehova Kalunga, li na sha novanhu.

Opo tu kale tu na olupandu li na sha nomaudaneko aeshe oo a udaneka, Kalunga okwa popya shi na sha nondjovo yaye a ti: “Itai alukile kwaame oshimha, ndelenee otai longo osho sha wapalela nge, ndele tai wanifa eshi nde i tumina.” — Jesaja 55:11.

Jehova ota popiwa mOmbiibeli kutya oku li Kalunga “iha fufya.” (Titus 1:2) Molwaashi Kalunga okwe tu udanekela oinima itunhula oyo tai ke uya monakwiiwa, otashi kala shi li pandunge tu lipule kutya: “Mbela ovanhu otava ka dula tuu shili okukala nomwenyo fiyo alushe mOparadisa kombada yedu? Oshike tu na okuninga po opo tu mone ouwa meudaneko laKalunga? Moitukulwa ya shikula ko yoshifo eshi, otai ke ku kwafela u mone omanyamukulo omapulo oo.