Omolwashike twa pumbwa Ouhamba waKalunga?
Pehovelo londjokonona yovanhu, Omushiti wetu, Jehova, oye aeke a li Omupangeli. Okwa kala alushe ha pangele pahole. Okwa li a shitila ovanhu oshikunino shaEden osho sha li onga eumbo lavo liwaliwa omo va li ve na okukala. Okwa li yo e va pa eendja da henena. Kakele kaasho, okwa li e va pa oilonga i tya sha. (Genesis 1:28, 29; 2:8, 15) Ovanhu ova li tava dulu okukala va hangana nove na ombili koshi yepangelo laKalunga lopahole.
Adam naEva ove litukaula ko kuKalunga e li omupangeli wavo
Ombiibeli otai ulike kutya omweengeli umwe omunashibofa, oo lwanima a ka shiivika e li Satana Ondiaboli, okwa li a shonga nodino oufemba waKalunga wokupangela. Okwa ti kutya ovanhu otava dulu okulipangela vo vene nopehe na ewiliko laKalunga. Mupya munene, ovadali vetu votete, Adam naEva, ova li va pwilikina komutotolombo waSatana noku mu waimina mounashibofa waye. — Genesis 3:1-6; Ehololo 12:9.
Omolwounashibofa waAdam naEva, ove litukaula ko kuKalunga e li Omupangeli wavo nova kanifa eduumbo lavo Oparadisa nosho yo etimaumbwile lokukala fiyo alushe va wanenena. (Genesis 3:17-19) Etokolo lavo ola li yo tali ka kuma oludalo lavo. Ombiibeli oya ti kutya molwaashi Adam okwa nyona, “oulunde owe uya mounyuni . . . , nefyo ole uya omolwoulunde.” (Ovaroma 5:12) Kakele kaasho, oulunde owa etifa yo oilanduliko ikwao. Pashihopaenenwa, Ombiibeli oya ti: “Omunhu ta pangelele mukwao omupya.” (Omuudifi 8:9) Noitya imwe, eshi ovanhu va hovela okulipangela, omaupyakadi okwa hovela okuhapupala.
NGHEE OMAPANGELO OPANHU A HOVELA
Nimrod okwa li a tukululila ounamapangelo waJehova oshibofa
Omupangeli wotete wopanhu a tumbulwa mOmbiibeli oNimrod. Okwa li a tukululila ounamapangelo waJehova oshibofa. Okudja pefimbo laNimrod, ovapangeli ovanaenghono ova kala tava longifa nai eenghonopangelo davo. Omido 3 000 lwaapo da ka lupuka, ohamba inaendunge Salomo oya tile: “Opa li omahodi ovahepekwa, ndelenee vo vehe na nande omuhekeleki. Ndele kombinga yovahepeki opa li eenghonopangelo, ndelenee venya va li vehe nomuhekeleki.” — Omuudifi 4:1.
Fiyo okunena, onghalo osho ashike i li ngaho. Mo 2009, oshifo shimwe shOiwana ya Hangana osha ti okuhapangela nawa osho “shimwe shomoinima oyo hai etifa omaupyakadi mahapu mounyuni.”
MAFIKU KALUNGA OTA KA KATUKA ONGHATU
Mounyuni omwa pumbiwa epangelo nosho yo ovapangeli ve li nawa. Naasho osho sha udanekwa kOmushiti wetu.
Omapangelo opanhu, nokuli naao haa lele nawa, okwa dopa okukandula po omaupyakadi ovanhu
Kalunga okwa dika po nale Ouhamba, ile tu tye epangelo, olo tali ka pingena po omapangelo aeshe opanhu, “ndelenee woovene tau ka kala fiyo alushe.” (Daniel 2:44) Ouhamba oo oo Ovakriste va kala tava ilikana u uye. (Mateus 6:9, 10) Ashike Kalunga haye mwene ta ka pangela Ouhamba oo. Ponhele yaasho, okwa nangeka po omunhu oo a li kombada yedu oye a ninge Omupangeli. Olyelye a hoololwa kuKalunga?
Otashi dulika yo u hafele oikundafanwa ei
OMAPULO OPAMBIIBELI A NYAMUKULWA
Mbela Ouhamba waKalunga ou li momutima woye?
Mbela Ombiibeli oya hala okutya shike eshi ya ti, “Ouhamba waKalunga ou li mokati keni”?
