Jesus okwa ti: “Oiwana otai ka lwifafana, nomauhamba otaa ka kondjifafana. Otaku ka kala omakakamo edu manene, ondjala nomikifi dolutapo keembinga neembinga.” (Lukas 21:10, 11) Oiningwanima aishe oyo oya li tai ka kala edidiliko kutya “Ouhamba waKalunga ou li popepi.” Mbela oiningwanima ya tya ngaho oya ningilwe tuu pefimbo limwe mounyuni aushe? Natu ka tale komaumbangi amwe.

1. OITA

Momudo 1914 omwa li mwa luwa oita oyo inai monika nande onale mondjokonona yovanhu! Ovanandjokonona ova popya kutya omudo 1914 owa li omudo u didilikwedi neenghono molwaashi omo mwa li mwa hovela oita yotete younyuni. Poita oyo opa li pa longifwa oshikando shotete oilwifo ya nyika oshiponga, ngaashi omakanona, eeboma odo hadi umbwa keedila, eendjebo doshinanena, ngaashi o-machine gun, omhepo youdiyo naikwao ihapu. Oya li ya twala fiyo omoita itivali younyuni omo mwa li mwa longifwa oilwifo yolute. Okudja ashike 1914, opa kala hapa holoka oita mounyuni penya naapenya noya dipaa ovanhu omamiliyona.

2. OMAKAKAMO EDU

O-Britannica Academic oya popya kutya omudo keshe ohapa ningwa omakakamo edu efele manene oo haa “hanauna po nokuteyaula oinima.” Omakonakono amwe oo a ningwa moAmerika okwa ulika kutya “she likolelela komivalu (okudja mo 1900), otwa teelela omakakamo edu 16 manene omudo keshe.” Vamwe otava diladila kutya omivalu domakakamo edu oda hapupala ashike paife eshi taku longifwa oikwanoipangifo yoku a didilika mo. Kashi na nee mbudi kutya oshike, omakakamo edu manene onghee ngoo taa etifa okumona oixuna nokutwaalela eemwenyo davahapu.

 3. ONDJALA

Ondjala luhapu ohai etifwa koita, oulingilingi, ouxupilo tau kande omapunya, okuhalonga oikulya ya wana ile okuhaninga eemhangela omolweenghalo domhepo odo hadi lunduluka. Olaporta yEhangano lokuyandja Oikulya mOunyuni yomo 2018 oya ti: “Mounyuni aushe, ovanhu omamiliyona 821 kave na oikulya ya wana, nomamiliyona 124 vomomuvalu oo otava fi ondjala.” Ounona hanga omamiliyona 3,1 ohava fi komanyutu. Eepelesenda 45 lwaapo dounona ovo va fya mo 2011 ova fya komanyutu.

4. OMIKIFI

Oshifo shEhangano lOukalinawa mOunyuni osha ti: “Mefelemudo eti-21 omwa monika omikifi dihapu. Omikifi odo da kala ko, ngaashi oshimela, oshidu nosho yo o-yellow fever, oda tandavela shi dulife nale nopa monika omikifi dipe, ngaashi eshikisha leedula dopaife, ebola, Zika nomikifi dokoilyo yoifudifi ngaashi o-SARS no-MERS.” Omukifiwekomba wo-COVID-19 opo wa monikia. Nonande ovanongononi neendokotola ove shii shihapu kombinga yomikifi, inava dula okumona epango lomikifi adishe ile oku di kelela filufilu.

5. OILONGA YOKUUDIFA MOUNYUNI AUSHE

Jesus okwa xunganeka yo shi na sha nedidiliko limwe a ti: “Onghundana ei iwa yOuhamba otai ka udifilwa ounyuni aushe opo ovanhu vomoiwana aishe ve i ude, opo nee exulilo tali uya.” (Mateus 24:14) Nonande mounyuni omu yadi omaupyakadi, ovanhu ve dulife pomamiliyona ahetatu, va dja moiwana aishe, otava udifa onghundana yOuhamba waKalunga moilongo 240, momalaka e dulife 1 000. Osho inashi ningwa nande onale mondjokonona yovanhu.

Oiningwanima oyo i li oshitukulwa shedidiliko lexunganeko laJesus otai ningwa kunena. Omolwashike tu na okukala tu na ohokwe muyo? Omolwaashi Jesus okwa a ti: “Ngeenge omwa mono oinima oyo tai ningwa, shiiveni kutya Ouhamba waKalunga ou li popepi.” — Lukas 21:31.

Edidiliko olo Jesus a yandja nosho yo ondjokonona yopaMbiibeli otai tu kwafele tu ude ko kutya Kalunga okwa dika po Ouhamba waye womeulu mo 1914. a Momudo oo, Kalunga okwa nangeka po Omona waye, Jesus Kristus, e li Ohamba. (Epsalme 2:2, 4, 6-9) Mafiku, Ouhamba waKalunga otau ka pangela edu nokuhanauna po omapangelo aeshe opanhu nokuninga edu oparadisa opo ovanhu va kale mo fiyo alushe.

Mafiku, eendjovo daJesus odo di li oshitukulwa sheilikano lOmwene otadi ka wanifwa, odo tadi ti: “Ouhamba woye nau uye. Ehalo loye nali wanifwe yo kombada yedu ngaashi meulu.” (Mateus 6:10) Ouhamba oo owa kala tau wanifa po shike okudja eshi wa dikwa po mo 1914? Oshike twa teelela nodjuulufi eshi Ouhamba oo womeulu tau uya okupangela ovanhu?