Moshitukulwa sha dja ko, otwa kundafana omadidiliko oo Jesus a yandja. Omadidiliko oo otaa ulike kutya Ouhamba waKalunga owa dikwa po meulu nonokutya Jesus Kristus oye Ohamba yao.

Ombiibeli oya ti kutya eshi Jesus a pewa eenghonopangelo dokupangela Ouhamba, okwa umba mo Satana neendemoni daye meulu. Enwefemo lavo ola ngabekelwa ashike kombada yedu, nomolwaasho eenghalo da naipala neenghono okudja mo 1914. — Ehololo 12:7, 9.

Nonande eenghalo dounyuni otadi ende nokunaipala, Jesus, e li Ohamba yOuhamba waKalunga, okwa ninga eenghendabala opo a kwafele ovanhu mounyuni aushe. Omolwoilonga yokuhonga ovanhu Ombiibeli mounyuni aushe, vahapu ove lihonga nghee tava dulu okutula moilonga omafinamhango Ombiibeli monghalamwenyo yavo yefiku keshe. (Jesaja 2:2-4) Ovanhu omamiliyona ove lihonga okukala ve na ondjele ngeenge tashi uya poinima yopamaliko nosho yo oilonga yokulikongela omboloto, nova xwepopaleka onghalo momaukwaneumbo avo. Otava kendabala okuxwepopaleka onghalamwenyo yavo paife opo va dule oku ka kala mounyuni mupe koshi yOuhamba waKalunga.

Nonande Jesus ota pangele nale meulu, omapangelo opanhu onghee ngoo natango taa pangele kombada yedu. Kalunga okwa lombwela Jesus a ti: “Pangela mokati kovatondi voye.” (Epsalme 110:2) Mafiku, Jesus ota ka hanauna po ovapataneki aveshe nokweetela epepelelo ovo va halelela okudulika kuKalunga.

Pefimbo opo, Ouhamba waKalunga otau ka katuka eenghatu tadi landula

• Okuhanauna po omalongelokalunga oipupulu. Omalongelokalunga oo a kala taa hongo oipupulu kombinga yaKalunga nokuhepeka ovanhu otaa ka hanaunwa po. Ombiibeli oya ti omalongelokalunga oipupulu oku li ombwada. Ehanauno lomalongelokalunga otali ka kumwifa vahapu. — Ehololo 17:15, 16.

• Okuxulifa po omapangelo opanhu. Ouhamba waKalunga otau ka katuka onghatu yokuxulifa po omapangelo aeshe opanhu. — Ehololo 19:15, 17, 18.

• Okuhanauna po ovakolokoshi. Ongahelipi shi na sha naavo va duka mokulonga owii noinava hala okudulika kuKalunga? “Ovahenakalunga tava ka dudwa mo moshilongo.” — Omayeletumbulo 2:22.

• Okukufa po Satana neendemoni daye. Satana neendemoni daye itava ka dula ‘okuhongaula vali oiwana.’ — Ehololo 20:3, 10.

Osho otashi ka tya shike kwaavo va tambula ko Ouhamba waKalunga?

Eshi Jesus ta ka pangela e li Ouhamba meulu, ota ka wanifa po oinima ihapu oyo ovapangeli vopanhu inava dula okuwanifa po. Ota ka pangela pamwe 144 000 ovo va hoololwa movanhu. (Ehololo 5:9, 10; 14:1, 3) Ota ka shilipaleka kutya ehalo laKalunga ola wanifwa po kombada yedu. Ouhamba waKalunga otau ka ningila shike ovo tava ka kala kombada yedu?

• Otau ka kufa po omikifi nefyo. “Onakukalamo nande umwe ta ti: ‘Aame oshingone,’” “nefyo itali kala po vali.” — Jesaja 33:24; Ehololo 21:4.

• Otau ka eta ombili yashili neameno. “Nombili yovamwoye otai ka kala inene,” “ndelenee otava ka kala omutumba, keshe umwe, momudile womuviinyu waye nowomukwiyu waye, ndele kape na ou te va tilifa.” — Jesaja 54:13; Mika 4:4.

• Otau ka eta oilonga ishambula. “Ovahoololwa vange ovo vene tava ka shambukilwa oilonga yomake avo. Vo itave ke lihepeka epwanga.” — Jesaja 65:22, 23.

• Otau ka xwepopaleka omudingonoko. “Ombuwa nomalondo otaa ka hafa, nofuka tai ka nyakukwa pombada, otai liwapaleke ngaashi onhemo yedo.” — Jesaja 35:1.

• Otau ka honga ovanhu kombinga yaasho ve na okuninga opo va kale nomwenyo fiyo alushe. “Opo ovanhu va ka mone omwenyo waalushe, ove na okushiiva kutya oove auke Kalunga kashili naau wa tuma, Jesus Kristus.” — Johannes 17:3.

Kalunga okwa hala u ka hafele omanangeko noupuna oo. (Jesaja 48:18) Oshitukulwa tashi landula ko otashi ka yelifa osho to dulu okuninga paife opo u ka kale oshitukulwa shonakwiiwa ya tya ngaho.