Bebe okwa kala lela e na ekwatafano naxe. Eendjovo odo da popiwa metetekelo oda li da popiwa komukainhu umwe womovapambele vaBebe, ashike oda li de mu yahameka ponhele yoku mu hekeleka. Okwa kala ha popi lwoikando ta ti: “Tate okwa fya efyo lii.” Konima yomido donhumba, Bebe okwa li a tala membo laye omo a li a shanga shi na sha nefyo laxe, nokwa li a didilika kutya natango okwa nyika oluhodi.

Bebe okwa li a mona kutya omunhu oha kala a nyika oluhodi efimbo lile unene tuu ngeenge okwa li e na lela ekwatafano nanakufya. Ombiibeli oya ti kutya efyo “omutondi wahauxuuninwa.” (1 Ovakorinto 15:26) Ohali hange ovanhu aveshe, nokape na osho tashi dulu oku li kelela. Nokuli luhapu ohali tu hange ombadilila nohali tu kufa ovaholike vetu. Kape na nande omunhu ta dulu okuhenuka efyo. Onghee hano, itashi kumwifa eshi hatu kala twa nyika oluhodi efimbo lile ngeenge twa filwa.

Otashi dulika u lipule kutya: ‘Ohashi kwata efimbo li fike peni okukala wa nyika oluhodi? Ongahelipi handi dulu okuungaunga nonghalo ya tya ngaho? Ongahelipi handi dulu okuhekeleka ovo va nyika oluhodi? Mbela ovaholike vetu ovo va fya ove na ngoo eteelelo lasha?’