Efyo olinyikifa oluhodi
KALA NEE ngeno wa fa to tale omuvi yomushikingalo oo a shiivika nawa nou mu hole. Omuvi oyo oya hovela okuulika onakudiwa yaye eshi a li okaana, e lihonga okushika eemusika, naashi a kala te shi ningi lwoikando. Nolwanima, ou wete eshi ta i koilongo ya yoolokafana, nokwa kala e shiivike apeshe mounyuni. Nokonima, okwe uya efano eshi a kulupa, nopexulilo lomuvi oyo okwa fya.
Omuvi oyo oyoshili nomunhu oo a li te i dana okwa fya shili. Ehokololo otali ka kala ashike la faafana nonande omunhu otashi dulika a li omushikingalo, omunongononi, omutondoki ile a shiivika nawa. Omunhu otashi dulika a longa oinima ihapu iwa, ndele diladila kunghee ngeno a longa shihapuhapu, ngeno kakulupile noka file.
Otashi dulika hatu kala twa nyemata ngeenge hatu diladila kutya efiku limwe lomomafiku otu na okufya. (Omuudifi 9:5) Nonande otu ninge eenghendabala, otu na ashike okukulupa nokufya. Natango, ohatu dulu okufya omolwouyahame ile ngeenge paholoka oshiponga shombaadilila. Ngaashi sha popiwa mOmbiibeli, otwa fa omwifi wongula oo “hau monika okafimbo kanini ndele tau lihane po.” — Jakob 4:14.
Molwaashi ohatu dulu okufya efimbo keshe, ovanhu vamwe ove na oikala yokutya “tu lyeni hano, fye tu nweni, osheshi mongula ohatu fi. (1 Ovakorinto 15:32) Ovanhu ohava popi ngaho molwaashi ove shii kutya otava dulu okufya efimbo keshe nokave na eteelelo li na sha nonakwiiwa. Ngeenge ovanhu ve li meenghalo didjuu ohava kala tave lipula kutya, ‘Mbela onghalamwenyo osho ashike tai kala ngaha?’ Openi to dulu okumona enyamukulo?
Vahapu kunena ovaitavela kutya otava dulu okumona omanyamukulo kovanongononi. Ovanongononi neendokotola ova mona po oinima oyo tai dulu okulelepeka onghalamwenyo yovanhu. Ovanongononi vamwe otava ningi eenghendabala dokulelepeka onghalamwenyo. Kashi na nee mbudi kutya ova pondola ile hasho, onghee ngoo ovanhu tave lipula kutya: Omolwashike hatu kulupa nohatu fi? Mbela efyo, olo li li omutondi wetu, oli na ngoo efiku li ka xulifwe po? Oitukulwa tai landula ko otai ka kundafana oinima oyo nokunyamukula epulo olo kutya: Mbela onghalamwenyo osho ashike tai kala ngaha?