Mbela Eendjovo daKalunga oda lundululwa?
Ovanhu vamwe ohava diladila kutya Eendjovo daKalunga oda lundululwa. Omuprofeti Jesaja okwa popya kutya Eendjovo daKalunga ‘otadi kala po fiyo alushe.’ (Jesaja 40:8) Ongahelipi hatu dulu okukala noushili kutya omaudaneko aKalunga inaa lundululwa?
Kalunga oku na eenghono doku amena eendjovo daye diha lundululwe. Pefimbo lonale, ngeenge eekopi odo da shangwa keenyala oda pu okushangwa, omushangululi okwa li ha valula noukeka ondada keshe opo a shilipaleke kutya inamu wedwa, inamu lundululwa mo inamu kufwa. Ashike nande ongaho, ovanhu inava wanenena, novashangululi vamwe ova ninga omapuko manini.
ONGAHELIPI HATU DULU OKUKALA NOUSHILI KUTYA OMISHANGWA DIYAPUKI DOKUNENA ODI NA ETUMWALAKA LAKALUNGA LOPEHOVELO?
Ope na eekopi omayovi domashangelo onale dOmishangwa Diyapuki. Ngeenge okopi imwe oi na okayooloko kanini, otai dulu okuyelekanifwa nadikwao opo ku monike omapuko oo tashi dulika a ningwa. Opo u mone ouyelele wa wedwa po, tala oshitukulwa shi li ko jw.org, shi na oshipalanyole “Mbela etumwalaka lOmbiibeli ola lundululwa?”
Pashihopaenenwa, natu ka tale komishangwatonywa domEfuta La Fya odo da li da hangika mekololo kovanhu Ovabedouins popepi nEfuta La Fya mo 1947. Omashangelo oo oku na oitukulwa yOmishangwa Diyapuki oo a shangwa oule womido omayovi avali da ka pita. Ovashiivinawa vOmishangwa ova yelekanifa omashangelo onale oo nOmishangwa Diyapuki odo tu na kunena. Mbela eshi va yelekanifa ngaho, ova mona shike?
Eshi va konakona noukeka omashangelo oo onale, ova mona kutya otaa tu kumwe nEendjovo daKalunga dokunena. * Otu na elineekelo kutya Kalunga okwe shi ninga tashi shiiva opo Eendjovo daye Diyapuki di kale di li paushili.
Onghee, ohatu dulu okulesha Eendjovo daKalunga tu na elineekelo kutya odi li paushili. Tu na osho momadiladilo, natu ka konakoneni osho hatu dulu okulihonga kovaprofeti vaKalunga.
^ okat. 7 The Complete Dead Sea Scrolls in English, mo Geza Vermes, epandja 16.
Otashi dulika yo u hafele oikundafanwa ei
OSHUNGONANGELO
Ombiibeli oya xupa nonande opa li eenghendabala dokulundulula etumwalaka layo
Ovakengeleledi ova li va kendabala okulundulula etumwalaka lOmbiibeli. Eenghendabala davo oda li da kwatwa mo ngahelipi noku i wa moshipala?
OMAHONGO OMBIIBELI A FIMANA
Ongahelipi hatu dulu okukala noushili kutya Ombibeli oi li paushili?
Ngeenge Ombibeli oya shangwa kuKalunga, oi na okukala ya yooloka ko komambo makwao.
