Oshike naanaa hashi ufa kutya oto ka kala nonghalamwenyo ya tya ngahelipi?
Vahapu ova itavela kutya onakwiiwa ohai ufwa keenghono donhumba ihadi monika. Onghee, ohava ningi oinima i lili noku lili, oyo tava diladila kutya otai ka xwepoleka onakwiiwa yavo.
OSHO VAHAPU VA ITAVELA
OVANYANEKELI VEENYOFI: Vamwe ova itavela kutya onakwiiwa yavo otai ka kala ya tya ngahelipi, she likolelela kutya, eenyofi oda li tadi monika ngahelipi pefimbo opo va dalwa. Ohava i kovanyanekeli veenyofi, ile kuvamwe ve lili, opo vati va shiive osho tashi ke va hanga, vo tava ningi po sha, opo vaha mone oshiponga, ile opo va pondole.
OVANYANEKELI: Vamwe ova itavela kutya ngeenge ova i kovanyanekeli, otava dulu okushiiva kutya omolwashike tava ningilwa oinima yonhumba, naasho va pumbwa okuninga po. Ngeenge ova shiiva kutya omolwashike vati tava ningilwa oinima oyo, otava dulu oku i henuka, tava kongo ekandulepo, opo vati ve shi endife nawa.
OKWIILIKANA OVAKWAMHUNGU: Vamwe ova itavela kutya, ove na okufimaneka ovakulu vonale ovo va fya, ile ovayapuki ve lili noku lili, opo vati va amenwe nokupunikwa. Van *, wokoVietnam, okwa ti: “Okufimaneka ovakwamhungu, otaku kwafele nge ndi kale nonghalamwenyo nonakwiiwa iwa, pamwe novana vange.”
OKWAALUKILA MOMWENYO MOLUPE LIMWE LI LILI: Vahapu ova itavela kutya oinima i na omwenyo ohai lidingonaka, tai fi nokwaalukila momwenyo molupe vali limwe. Ohava ti, eenghalo diwa, ile dii odo omunhu ta piti mudo paife, oda etifwa kwaasho va ninga monghalamwenyo yavo yonale.
Vamwe ove wete kutya omaitavelo oo okwa kanghamena koumhulile. Ashike ohava kufa ombinga moinima ngaashi okulesha omifinda dopeke, hava tale mokakola, hava tale momukonda nohava tale komadidiliko oo omunhu a dalwa nao (ngaashi eenghwakutoka), nosho tuu. Ohava diladila kutya oinima oyo otai va kwafele va shiive onakwiiwa.
OMAITAVELO A TYA NGAHO OHAA KWAFELE NGOO SHILI OVANHU?
Ovanhu ovo va itavela moinima oyo, ohava mono ngoo shili onghalamwenyo nonakwiiwa iwa?
Tala koshimoniwa shaHào, woVietnam. Okwa li ha i kovanyanekeli veenyofi noha ilikana ovakwamhungu. Mbela oshe mu kwafela sha ngoo? Hào okwa ti: “Ongeshefa yange oya li ya mbangolota, nda ya meendjo, ihatu udafana moukwaneumbo nonda li nda wililwa po pamaliudo.”
Qiuming, wokoTaiwan, naye okwa li a itavela moumhulile, mokwaalukila momwenyo molupe limwe li lili, moikumwifilonga nomokwiilikana ovakwamhungu. Eshi a ka konakona nawa omaitavelo oo, okwa ti: “Onda mona kutya omahongo neenghedi da tya ngaho otadi kondjifafana notadi ngwangwaneke. Omatengeneko ovanyanekeli veenyofi ihaa kala e li mondjila. Shi na sha nokwaalukila momwenyo molupe limwe li lili, ongahelipi to ka kala to shi endifa nawa monghalamwenyo onhivali, ngeenge ito dimbuluka onghalamwenyo yoye yonale?”
“Onda mona kutya omahongo neenghedi da tya ngaho otadi kondjifafana notadi ngwangwaneke.” — QIUMING, TAIWAN
Ngaashi Hào Qiuming, navamwe vahapu, ova mona kutya, onakwiiwa yetu ihai ufwa koikumwifilonga, keenyofi, kovakwamhungu, ile kokwaalukila momwenyo molupe limwe li lili. Mbela osho osha hala okutya ita tu dulu okuninga po sha shi na sha nonakwiiwa yetu?
Vahapu ove udite kutya osho tashi kwafele omunhu a mone onakwiiwa iwa, ongeenge va i kehongo lopombada nokumona oupuna. Ovo va tokola okuninga ngaho ova mona oidjemo ilipi?
^ okat. 6 Omadina amwe oo a tumbulwa moshitukulwa eshi, naikwao tai shikula ko, hao ovanhu ovo lelalela.
^ okat. 16 Eendjovo odo odi li mOmbiibeli Iyapuki, mOvagalati 6:7. Ediladilo olo ola popiwa momupopye wa shiivika nawa, molwaashi ohaku ti kutya, kuna omanuwa, u ka likole omanuwa; kuna omakunde, u ka likole omakunde.
Otashi dulika yo u hafele oikundafanwa ei
OSHUNGONANGELO
Mbela ovanyanekeli otava dulu okumona osho tashi ka ningwa monakwiiwa?
Mbela oto dulu okulineekela omatengeneko a tya ngaho?
OSHUNGONANGELO
Ombiibeli otai ti shike kombinga yomwenyo nosho yo efyo?
Mbela ope na sha mufye hashi fyaala po ngeenge twa fi? Mbela otu na omwenyo ihau fi? Oonakufya ove li peni?
