Oshike tashi dulu oku tu kwafela tu ka kale nonaakwiiwa iwa kuhe na vali?

DANA

Ngaashi sha kundafanwa moitukulwa ya tetekela, ovanhu vahapu ohava kendabala okumona onakwiiwa iwa, mokulineekela moinima ngaashi, okununwa, ehongo, omaliko nokukala ve na omaukwatya mawa. Ashike okulineekela oinima oyo, osha fa ashike omunhu u na okaalita ka puka, noitake ku twala oko wa yuka. Mbela osho osha hala okutya kape na odjo i shii okulineekelwa oyo tai tu kwafele tu mone onakwiiwa iwa? Ope na.

EWILIKO OLO LA DJA KODJO YA DENGA MBADA

Ngeenge hatu ningi omatokolo, luhapu ohatu pula oo e tu dule momido nomowino. Sha faafana, ohatu dulu okumona ewiliko li shii okulineekelwa li na sha nokutya ongahelipi hatu dulu okukala nonakwiiwa iwa, okudja kOmunhu oo e tu dule kokule momido nomowino. Omayele aye otwe a pewa mOmishangwa Diyapuki, odo da shangwa pa pita omido 3 500 lwaapo. Omishangwa diyapuki odo, odi li membo hali ifanwa Ombiibeli.

Omolwashike to dulu okulineekela Ombiibeli? Omolwaashi Omushangi wayo oye aeke a kala ko nalenale noye aeke e na wino wa shiya ko meshito alishe. Okwa popiwa kutya oku li “Omuxungu” oo ‘a li ko, nota ka kala ko alushe fiyo alushe.’ (Daniel 7:9; Epsalme 90:2) Oye ‘a shita omaulu, oye Kalunga, ou a ma edu.’ (Jesaja 45:18) Okwe tu lombwela kutya edina laye oye Jehova. — Epsalme 83:18, NW.

Molwaashi Ombiibeli oya dja kOmushiti wovanhu aveshe, inai tongola omihoko, ile eputuko, kutya pamwe dimwe odi li xwepo di dule dikwao. Omayele ayo ihaa kwishi, nokwa etela ovanhu vomoilongo aishe ouwa. Oi li momalaka mahapu noya andjakanekwa apeshe shi dulife embo keshe. * Osho osha hala okutya, ovanhu keshe pamwe otava dulu oku i lesha noupu nokuwilikwa kuyo. Oushili oo otau tu kumwe naasho Ombiibeli tai ti:

“Kalunga ke na okatongo, ndele oha tambula ko omunhu womoshiwana keshe oo he mu tila noha longo osho sha yuka.” — OILONGA 10:34, 35.

Ngaashi ashike omudali omunahole ha yandje ewiliko kovana vaye, Jehova Kalunga naye oku li Xe omunahole oo he tu kwafele okupitila mEendjovo daye, Ombiibeli. (2 Timoteus 3:16) Oto dulu okulineekela Eendjovo daye, molwaashi oye e tu shita, noku shii osho tashi tu etele ehafo.

EWILIKO OLO LI SHII OKULINEEKELWA

Ohatu dulu okulineekela kutya Ombiibeli oi na ewiliko li shii okulineekelwa li na sha nonakwiiwa, molwaashi omido 2 000 da pita, oya li ya xunganeka oiningwanima yomounyuni nosho yo elihumbato lovanhu, oyo tu wete kunena.

OININGWANIMA

“Oiwana otai ka lwifafana, nomauhamba otaa ka kondjifafana. Otaku ka kala omakakamo edu manene, ondjala nomikifi dolutapo keembinga neembinga.” — LUKAS 21:10, 11.

ELIHUMBATO

“Momafiku axuuninwa otapa ka kala omafimbo madjuu okukaliwa muo. Osheshi ovanhu otava ka kala ve lihole vo vene, ovanalwisho voimaliwa, ovalitangi, ovalinenepeki, ovasheki, ihava dulika kovadali, vehe shii okupandula, vehe fi ovadiinini, vehe na ohole, vehe na elongelokumwe, ovalundili, vehe na elipangelo, ovakwanyanya, ovatondi vouwa, ovakengeleledi, ve na omitwe dikukutu, ve na ounhwa, ve hole omalihafifo ponhele yokuhola Kalunga.” — 2 TIMOTEUS 3:1-4.

Mbela oto ka fika pexulifodiladilo lilipi, ngeenge owa mono kutya Ombiibeli oya popya oshili, eshi ya kala ya popya nale oinima oyo tai ningwa kunena? Nopehe na omalimbililo, oto tu kumwe naLeung, wokoHong Kong, oo a ti: “Omaxunganeko Ombiibeli okwa shangwa omido donalenale. Itashi shiiva omunhu a tengeneke oinima oyo paushili. Ombiibeli oi na okukala ya nwefwa mo komunhu oo e tu dule kokule.”

Ombiibeli oi na omaxunganeko omafele oo a wanifwa nale. * Osho otashi ulike kutya Ombiibeli oi li shili Eendjovo daKalunga. Jehova okwa ti kutya “Aame Kalunga, kape na vali umwe ngaashi Aame. Aame ou nda holola kehovelo inya tai ke uya.” (Jesaja 46:9, 10) Osho otashi ulike kutya, ou na etomheno liwa lokulineekela osho Ombiibeli tai ti shi na sha nonakwiiwa.

EWILIKO OLO TALI KU ETELE OUWA PAIFE NOFIYO ALUSHE

Ngeenge owa shikula ewiliko olo li li mOmishangwa Diyapuki, oto ka mona ouwa. Tala koihopaenwa imwe.

OMAYELE MAWA E NA SHA NOILONGA NOIMALIWA

“Etulumuko li fike peke li dule eshambekela li yadi oupyakadi nokushikula omhepo.” — OMUUDIFI 4:6.

NGHEE TO DULU OKUKALA NOUKWANEUMBO WA HAFA

“Keshe umwe womunye oku na okukala e hole omukulukadi waye ngaashi e lihole ye mwene. Kakele kaasho, omukulukadi oku na okukala a fimaneka neenghono omushamane waye.” — OVAEFESO 5:33.

NGHEE OVANHU VE NA OKUKALAFANA NAVAKWAO

“Efa ehandu, u dje monya. Ino mbilingwa; opo uha longe owii.” — EPSALME 37:8.

Okudulika kwaasho Ombiibeli tai ti otaku ku etele ouwa paife notaku ku yeululile onakwiiwa iwa. MOmbiibeli omu na omaudaneko aKalunga e na sha nonakwiiwa iwa kuhe na vali, oo a kwatela mo

OMBILI NEAMENO

“Otava ka hafela ombili inene.” — EPSALME 37:11.

KESHE UMWE OTA KA KALA E NA EUMBO NOIKULYA

“Ndele vo otava ka dika omaumbo ndele tava kala mo, ndele tava twike oikokola yomiviinyu, ndele tava li oiimati yayo.” — JESAJA 65:21.

KAPE NA OO TA KA VELA, ILE TA KA FYA

‘Efyo ita li ka kala po vali, ile oluhodi, okulila nouyahame itau ka kala po vali.’ — EHOLOLO 21:4.

Oshike u na okuninga po, opo u kale u na oushili kutya oto ka mona onakwiiwa ya tya ngaho? Lesha oshitukulwa tashi shikula ko.

^ okat. 6 Opo u mone ouyelele muhapu u na sha nokutolokwa nokwaandjakanekwa kwOmbiibeli, inda ko www.pr418.com koshi yoshipalanyole OMAHONGO OMBIIBELI > ONDJOKONONA NOMBIIBELI.

^ okat. 16 Opo u mone ouyelele muhapu, tala etukulwa 9, lembo The Bible—God’s Word or Man’s? la nyanyangidwa kEendombwedi daJehova. Oli li konhele yetu yokointaneta, ko www.pr418.com Tala koshi yoshipalanyole ONGULUMAMBO > OMAMBO & NOUMBO.

Otashi dulika yo u hafele oikundafanwa ei

OSHUNGONANGELO

Oshili kombinga yonakwiiwa

Kala u na eteelelo la twa mwaasho Kalunga a popya shi na asha nonakwiiwa nosho yo ovanhu ovo tava ka kala kombada yedu.

OSHUNGONANGELO

Omayele Ombiibeli otaa dulu ngoo oku tu kwafela kunena?

Ngeenge kunena oku na omauyelele aeshe oo e li pefimbo, omolwashike u na okukonga omayele mOmbiibeli oyo ya shangwa omido 2 000 lwaapo da pita?

OSHUNGONANGELO

Nghee Ombiibeli ya kuma onakwiiwa yoye

Eendjovo daKalunga otadi dulu oku tu kwafela tu ungaunge nomaupyakadi paife, sha hala okutya omaupyakadi akeshe efiku oo hatu shakeneke mounyuni ou woukolokoshi. Ashike Ombiibeli ohai dulu okukwafela moinima ihapu. Otai tu pe yo ouyelele u na sha nonakwiiwa.

OSHUNGONANGELO