Tate okwa kala moGermany, nomo 1949 okwa li a tembukila koAustralia a ka konga oilonga momina nomeefabrika dolusheno. MoAustralia okwa kala hadi moshitukulwa hashi ifanwa Victoria, naamo omo a hombolela. Nonda ka dalwa mo 1953.

Konima yomido dinini, meme okwa li a hovela okukonakona Ombiibeli nEendombwedi daJehova. Onghee onda kala ndi shii omahongo Ombiibeli okudja kounona. Ashike tate ka li a itavela momalongelokalunga. Okwa li ha longifa eenghono nokuningila ovanhu omatilifo, nameme okwa li ha kala e mu tila neenghono. Meme okwa twikila okukonakona Ombiibeli meholeko nokwa kala e hole omahongo ayo. Ngeenge tate a li a dja mo meumbo, meme okwa li he tu lombwele fye nokamwamemekadona osho e lihonga mOmbiibeli. Okwa li he tu lombwele kombinga yedu olo tali ka ninga oparadisa monakwiiwa, nanghee hatu dulu okukala twa hafa ngeenge otwa kala hatu dulika komifikamhango dOmbiibeli di na sha nelihumbato lopaenghedi. — Epsalme 37:10, 29; Jesaja 48:17.

Eshi nda li ndi na omido 18, onghalo oya li ya fininika nge ndi fiye po eumbo omolwelongifo leenghono latate. Nonande onda li nda itavela osho meme a honga nge okudja mOmbiibeli, kanda li nde shi lenga nomolwaasho onghalamwenyo yange kaya li metwokumwe naasho nde lihonga. Lwanima, onda ka kala handi longo omalusheno momina yomakalamanya. Nonda li nda hombola eshi ndi na omido 20, notwa ka dala okaana ketu koshiveli konima yeedula nhatu. Opo nee, onda li nda hovela okulipula kutya oshike sha fimanenena monghalamwenyo yange. Molwaashi onda li ndi shii kutya Ombiibeli otai dulu okukwafela oukwaneumbo wetu, onda li nda tameka okukonakona Ombiibeli nEendombwedi daJehova. Ashike omukulukadi wange okwa li e di tonde neenghono. Eshi nda ongala nado pokwoongala kwado kumwe, omukulukadi wange okwa li a lombwela nge ndi xulife po ekonakonombiibeli, ile ndi fiye po oukwaneumbo. Onda li nda xulifa po ekwatafano lange nEendombwedi molwaashi onda li ndi udite itandi dulu okuninga po sha. Lwanima onde ke livela ombedi eshi nda efa po ekonakonombiibeli olo nda li ndi shii kutya oli li mondjila.

Efiku limwe, ovanailonga vakwetu ova ulikila nge omafano oipala. Omafano oo okwa li taa monika a fa mahokwifa, ndele okwa nyata neenghono. Konima eshi nde a tala, onda li handi livele ombedi. Eshi nda dimbuluka osho nde lihonga mOmbiibeli, onda li handi diladila kutya Kalunga ota ka handukila nge. Etaleko lange li na sha nokutala omafano oipala ola li la lunduluka filufilu eshi nda kala handi tale luhapu omafano oo a nyata. Mokweendelako kwefimbo, onda li nda pikwa kokutala omafano a tya ngaho.

 Moule womido 20 da ka shikula ko, onda enda handi efa po filufilu omifikamhango odo meme a li a honga nge. Elihumbato lange ola li la nwefwa mo kwaasho nda li handi tale. Onda li handi tukana, ndi hole omashendjo inaa koshoka nonda li nda kulika etaleko lii li na sha nomilele. Nonande onda li ndi na omukulukadi wange, okwa li yo handi i momilele novakainhu vamwe. Efiku limwe, onde litala meshipili ndele handi lipopile handi ti: ‘Ame omunhu mwii.’ Onda li nda hovela okukala inandi lifimaneka vali nondi litonde.

Otwa li twa hengana, nonghalamwenyo yange oya li i li monghuwo ina onghambe. Opo nee onda ilikana kuJehova nomutima aushe, nokuhovela natango ekonakonombiibeli nonande opa li pa pita omido omilongo mbali lwaapo. Pefimbo opo tate okwa hangika a fya nale, nameme okwa li a ninginifwa e li Ondombwedi yaJehova.

Opa li eyooloko la kula pokati konghedi yange yokukalamwenyo nomifikamhango dOmbiibeli da denga mbada. Ashike, onda li nda halelela okumona ombili yokomutima oyo ya udanekwa mOmbiibeli. Onda li nde litulila po elalakano ndi lundulule onghedi yange yokupopya nokweefa po okuhanduka diva. Onda li yo nda tokola ndi efe po okundobola, okunwa omalodu sha pitilila nokuvaka po oinima yomuhona wange.

Ovanailonga pamwe naame kava li ve udite ko kutya omolwashike nda li nda hala okuninga omalunduluko oo meendelelo. Moule weedula nhatu ova kala hava shindi nge nelalakano opo ndi shune konghedi yange yokukalamwenyo i kulu. Pashihopaenenwa, ngeenge nda ninga epuko linini ngaashi okuhanduka unene ile nda tukana, ova li hava ingida mokule tava ti: “Iyaa! Osho tu ku shiivile ngaho.” Eendjovo odo oda li hadi ehameke nge neenghono, nonda li handi kala ndi udite inandi ninga omalunduluko asha.

Moilonga yetu, omafano oipala okwa li haa dulu okumonika noupu moikwaelektronika nomomambo. Ovanailonga pamwe naame ova li have litumine pandjikilile omafano oo a nyata okupitila meekompiuta, ngaashi nda li handi ningi pehovelo. Onda li handi kendabala okuhenuka okutala omafano oipala oo a li a pika nge, ndele ova li va twikila okuyeleka nge. Opo nee onda li nda konga ekwafo kwaao hatu konakona naye Ombiibeli a yambidide nge noku twe nge omukumo. Okwa li a pwilikina nelididimiko eshi nde mu mbubulila omutima wange. Okwa ulikile nge nghee handi dulu okuungaunga nonghalo oyo ya li ya pika nge a longifa eevelishe donhumba mOmbiibeli. Nokwa li yo a ladipika nge ndi twikile okukonga ekwafo kuJehova okupitila meilikano. — Epsalme 119:37.

Efiku limwe onda li nda ongaleka ovanailonga vakwetu. Ofimbo va li va ongala, onde va lombwela va pe ovalumenhu vavali vomuvo omalodu ovo va li va pikwa koikolwifa. Ovanailonga aveshe ova ingida tava ti: “Ito dulu okuninga ngaho nandenande! Ovalumenhu ovo otava kondjo nale nokweefa po oikolwifa oyo ye va pika!” Onda nyamukula nda ti: “Omu li mondjila, naame ohandi kondjo nokweefa po okutala omafano inaa koshoka.” Okudja opo, ovanailonga vakwetu ova li va mona kutya ohandi kondjo ndi efe po okutala omafano oipala oo a li a pika nge, noinava hetekela tuu vali okufininika nge ndi shune konghalo yange inya ikulu.

Mokweendela ko kwefimbo, kekwafo laJehova onda li nda dula okufinda filufilu onghalo yokutala omafano oipala. Nonda li nda ninginifwa mo 1999, ndi li Ondombwedi yaJehova. Onda pandula unene eshi nda mona omhito onhivali opo ndi kale nonghalamwenyo iwa noihafifa.

Paife ondi udite ko kutya omolwashike Jehova e tonde oinima aishe oyo nda li ndi hole nale. E li Tate omunahole, okwa li a hala okwaamena nge koiponga aishe oyo hai etwa kokutala omafano oipala. Paife onda mona oushili weendjovo odo di li mOmayeletumbulo 3:5, 6, odo tadi ti: “Lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye.” Omifikamhango dOmbiibeli ihadi tu amene ashike, ndele ohadi tu kwafele yo tu pondole. — Epsalme 1:1-3.

Monakudiwa, onda li ndi litonde ndele paife onde lifimaneka nondi na ombili yokomutima. Paife ondi na onghalamwenyo ya koshoka, nondi udite kutya Jehova okwa dimina nge po nokwa yambidida nge. Mo 2000, onda li nda hombola Ondombwedi i kwetu yedina Karolin, omukainhu oo muwa noku hole Jehova ngaashi ame. Neumbo letu oli li onhele yehafo nombili. Oshi li oufembanghenda okukala tu li vamwe vomOvakriste ovo va koshoka paenghedi nove na ohole youmwainafana oyo i li mounyuni aushe.