Seth * okwa ti: “Ame nomukulukadi wange otwa kanifa oilonga oshita. Oule weedula mbali otwa kala ashike hatu xupu mokupewa omakwafo kovapambele nosho yo mokulonga oulonga vanini vopakafimbo. Osho osha li sha polimanifa omukulukadi wange Priscilla, naame onda li ndi wete ndihe na oshilonga.”

“Mbela otwa ungaunga ngahelipi nonghalo oyo? Priscilla okwa kala alushe he lidimbulukifa eendjovo daJesus odo di li muMateus 6:34. Okwa ti kutya inatu kala noshisho shefiku lomongula, molwaashi efiku keshe oli na oisho yalo. Omailikano aye taa di komutima okwa li e mu pameka a pule komesho. Ame onda pamekwa kEpsalme 55:23. Ngaashi omupsalme, onda undulila omutengi wange kuJehova, nonda mona kutya okwa kwafela nge. Nonande paife ondi na oilonga, ohatu kaleke onghalamwenyo yetu paunafangwa, metwokumwe nomayele aJesus oo e li muMateus 6:20-22. Komesho yaaishe, otwa ehena popepielela naKalunga notu na oukaume wakola pokati ketu.”

Jonathan okwa ti: “Onda li nda tila shi na sha nonakwiiwa eshi okangeshefa ketu koukwaneumbo ka mbangolota. Omolwewopedu leliko, ashishe osho twa li twa longa noudiinini omido 20 kasha li tashi kwafa sha. Ame nomukulukadi wange otwa hovela okukala hatu tanguna kombinga yoimaliwa. Katwa li vali nokuli hatu lande nokakalata keendjo, molwaashi otwa li twa tila kutya itaka tambulwa ko.

“Ashike Eendjovo daKalunga nosho yo omhepo yaye oya li ye tu kwafela tu ninge omatokolo e li pandunge. Onde lihonga okutambula ko oilonga i lili noku lili, notwa li twa efa po okulanda oinima oyo inai pumbiwa. Tu li Eendombwedi daJehova, otwa kwafelwa yo kovaitaveli vakwetu. Ova li ve tu twa omukumo nove tu kwafela ngeenge onghalo ya li idjuu neenghono.”

Raquel okwa ti: “Eshi omushamane wange a fiya nge po ombadilila, onda li nda nyika oluhodi nonda handuka. Onda li yo nda polimana neenghono. Ashike onda ehena popepi naKalunga nokwa hekeleka nge. Ombili yaKalunga oya amena omutima wange eshi nda kala handi ilikana kuye efiku keshe. Osha yela kutya okwa hekeleka omutima wange oo wa li wa teyaukila.

“Ohandi pandula yo omolwEendjovo daye, Ombiibeli, molwaashi onda dula okufinda ehandu nosho yo onghone. Onda li nda dimbuluka eendjovo domuyapostoli Paulus odo dili mOvaroma 12:21 tadi ti: ‘Ino findwa kowii, dula owii onouwa.’

“Kaume kange kopofingo umwe okwa li a kwafela nge ndi pule komesho. Okwa ulikila nge Omuudifi 3:6 ndele ta lombwele nge pahole kutya ope na ‘efimbo lokukanifa.’ Omayele oo okwa li a kwata moiti, ashike onda li nde a pumbwa. Paife ondi na omalalakano mape monghalamwenyo.”

Elizabeth okwa ti: “Ngeenge ohombo yoye ya teka, oho kala wa pumbwa ekwafo. Onda li ndi na kahewa kange oo a li a yambidida nge efiku nefiku. Okwa li ha lili pamwe naame, ha hekeleke nge nokwa li ha lombwele nge kutya ondi holike ponhele yokuningifa nge ndi kale ndi wete ndihe holike. Onda tomwa kutya Jehova okwe mu longifa a hekeleke nge.”

Luis, oo a tumbulwa moshitukulwa shotete shomoitukulwa ei ya pambafana, oku na oudu womutima wa kwata moiti, nokonyala u mu dipae lwoikando ivali. Paife okwa pumbwa okukala keshina lomhepo yohapi oule weevili 16 mefiku. Okwa ti: “Ohandi ilikana alushe Jehova. Ngeenge nda ilikana kuKalunga, ohandi kala ndi udite omhepo yaye ya pameka nge. Eilikano ohali pe nge ouladi wokupula komesho molwaashi ondi na eitavelo muJehova nondi shii kutya ota file nge oshisho.”

Petra oo e na omido 80 nasha okwa ti: “Onda hala okuninga oinima ihapu, ndele itandi dulu. Ngeenge handi diladila kwaashi eenghono dange tadi ninipala, ohashi kala shidjuu. Ohandi kala nda loloka nai nonde likolelela keepela. Luhapu ohandi diladila konghedi omo Jesus a li a pula Xe e mu kwafele opo oudjuu umwe u mu pitilile po ngeenge otashi shiiva. Ashike Jehova okwa li a pameka Jesus, naame oha pameke nge. Eilikano lakeshe efiku ohali hakula nge. Ohandi kala  ndi udite ndi li xwepo ngeenge nda popya naKalunga.” — Mateus 26:39.

Julian, oo a kala ta kondjo nomukifi hau lemaneke eendjila domaliudo hau ifanwa multiple sclerosis oule womido 30 lwaapo naye osho e udite ngaho. “Onda li omuhona ndele paife ondi li mokatemba. Ashike onghalamwenyo yange oi na eityo molwaashi ohandi yakula vamwe. Okuyandja otaku dulu okuxwepopaleka okumona oixuna, na Jehova oha wanifa po eudaneko laye li na sha noku tu pameka pefimbo opo tu na omhumbwe. Ngaashi omuyapostoli Paulus, ohandi dulu okutya: ‘Aishe ohandi i dulu [omolwaau, NW] ta pameke nge.’” — Ovafilippi 4:13.

Antonio okwa ti: “Eshi tate a fila moshiponga shotuwa, potete kanda li nde shi itavela. Osha li sha fa shihe li pauyuki, kali e na ondjo yasha. Ashike kanda li handi dulu okuninga po sha. Okwa kala ehe shii apa e li oule womafiku atano fimbo ina fya. Onda kala inandi hala okulila moipafi yameme, ashike ngeenge nda li aame andike, onda li handi lili neenghono. Onda kala handi pula kutya ‘omolwashike? Omolwashike sha ningilwa?’

“Momukokomoko womafiku oo madjuu, onda kala handi pula Jehova a kwafele nge ndi pangele omaliudo ange noku pe nge ombili. Mokweendela ko kwefimbo, onda li ndi udite nda ngungumana. Onda li nda dimbuluka kutya Ombiibeli oya ti kutya keshe umwe ota dulu okuhangwa ‘koiningwanima yombadilila.’ Molwaashi Kalunga iha fufya, onda tomhwa kutya ohandi ka mona vali tate menyumuko.” — Omuudifi 9:11, NW; Johannes 11:25; Titus 1:2.

Robert, oo a tumbulwa moshitukulwa shotete naye okwa popya oshinima sha yukila oko. Okwa ti: “Ame nomukulukadi wange, otwa li twa mona ombili yopamadiladilo oyo ya tongwa mOvafilippi 4:6, 7. Ombili oyo otwe i mona eshi twa ilikana kuJehova. Ombili ya tya ngaho oye tu kwafela tu popye novatoolinghundana kombinga yeteelelo letu lenyumuko. Nonande omona wetu okwa fila moshiponga shodila, ohatu dimbuluka oinima ihapu iwa oyo twa ninga pamwe naye. Ohatu kendabala okuyandja elitulemo kuyo.

“Eshi Eendombwedi dikwetu de tu lombwela kutya ode tu mona hatu yelifa eitavelo letu ko-TV twa ngungumana, otwe di lombwela kutya otwe shi ninga molwaashi ode tu ilikanena. Onda itavela shili kutya Jehova okwe tu yambidida okupitila momatumwalaka avo mahapu ehekeleko.”

Ngaashi oihopaenenwa oyo ya tumbulwa metetekelo, Kalunga ota dulu okuhekeleka ovanhu ovo tava shakeneke omaupyakadi nomashongo a yoolokafana. Mbela ongahelipi shi na sha naave? Kashi na nee mbudi kutya oto shakeneke oupyakadi washike monghalamwenyo, oto dulu okumona ehekeleko. * Omolwashike ito pula Jehova e ku kwafele? Oye ‘Kalunga kehekeleko alishe.’ — 2 Ovakorinto 1:3.