Onda dalelwa momukunda wedina Saxony, moshilongo osho sha li nale German Democratic Republic (GDR). Onghalo meumbo oya li iwa notwa li tu holafane, novadali vange ova honga nge eenghedi diwa. GDR osha li shi na epangelo loukomunisi, nomolwaasho ovanhu vahapu muSaxony kava li va fimaneka elongelokalunga. Ame ngha li nda itavela kutya Kalunga oko e li. Oule weedula dange 18 dotete dokukalamwenyo, onda li nda nwefwa mo neenghono keitavelo kutya Kalunga ke ko nosho yo koukomunisi.

Omolwashike nda li ndi hole oukomunisi? Omolwaashi onda li ndi hole ediladilo olo kutya ovanhu aveshe ove fike pamwe. Kakele kaasho, onda li nda itavela kutya oiniwe aishe oi na okutukulwa pauyuki, molwaashi osho otashi ka xulifa po eyooloko pokati koipuna neehepele. Nomolwaasho onda kala nde lipyakidila okuunganeka ehangano lovanyasha loukomunisi. Eshi nda li ndi na eedula 14, onda kala unene handi longo moprojeka yokulongolola eembapila odo da longifwa. Elelo loshilando Aue ola li la hafa neenghono omolweenghendabala dange ndele ovapangeli tava pe nge ondjabi. Nonande onda li natango omunyasha, onda li nda shiiva ovanapolotika vamwe vopombada vomo-GDR. Onda li ndi wete handi lalakanene oinima i li mondjila nonokutya onakwiiwa yange otai ka kala iwa.

Ombadilila, onghalo oya li ya lunduluka. Mo 1989, ekuma laBerlin nosho yo oukomunisi woilongo yaEuropa yokOushilo ola li la teka po. Opa li pa ningwa oinima ii ya landulafana. Diva onda li nda didilika kutya mo-GDR omwa li okuhenouyuki kuhapu. Pashihopaenenwa, ovanhu ovo va li itava yambidida oukomunisi ova li va dinika. Onda li nda wililwa po komalipulo, handi lipula kutya: Osho osha enda ngahelipi? Mbela ovayambididi voukomunisi inava itavela kutya ovanhu aveshe ove fike pamwe? Mbela oukomunisi owa li ashike eheka?

Opo nee onda li nda hovela okulalakanena omusika nokufaneka. Molwaashi onda li handi dulu okulihonga kofikola yomusika, ndi netimaumbwile loku ka ya kounivesiti, onda li handi litungile ouumbo nda ninga omushiki womusika nomufaneki. Natango, onda li nda efa po eenghedi diwa odo nda li nde lihonga kounona. Onda li ashike nda lenga omalihafifo, mwa kwatelwa okukala handi endelafana noukadona vahapu poshikando. Ashike omusika, okufaneka nosho yo okukala nonghalamwenyo yeliefo inaku xwepopaleka omalipulo ange. Nokuli nomafano oo nda li nda faneka okwa li taa ulike oumbada munene. Onda li handi lipula kutya: Onakwiiwa oi tu nine shike? Elalakano longhalamwenyo olashike?

 Lwanima eshi nda ka mona omanyamukulo oo nda li handi kongo, osha li sha kumwifa nge neenghono. Konguloshi imwe kofikola, onda li omutumba pamwe novanafikola tava kundafana kombinga yonakwiiwa. Opa li omunafikola umwe wOndombwedi yaJehova wedina Mandy. * Okwa li a pa nge omayele mawa. Okwa ti: “Andreas, ngeenge owa hala omanyamukulo omapulo oye e na sha nonghalamwenyo nosho yo onakwiiwa, konakona nawa Ombiibeli.”

Onda li nda limbililwa ndele onda hala okushiiva, ashike onda li nda tokola okukonga omanyamukulo mOmbiibeli. Mandy okwa li a ulikila nge Daniel etukulwa 2, naasho nda lesha mo osha li sha kumwifa nge. Exunganeko olo ola hokolola omapangelo omanaenghono mounyuni a landulafana, oo a li taa ka kuma nefimbo letu. Mandy okwa li a ulikila nge omaxunganeko amwe vali Ombiibeli e na sha nonakwiiwa. Okudja opo onda li handi mono omanyamukulo komapulo ange. Ndele olyelye a shanga omaxunganeko oo, nolyelye ta dulu okuxunganeka onakwiiwa paushili ngaho? Pamwe Kalunga oko e li?

Mandy okwa li a shiivifa nge ovalihomboli vEendombwedi Horst naAngelika, ovo va kwafela nge ndi ude ko nawa Eendjovo daKalunga. Diva onda li nda didilika kutya Eendombwedi daJehova odo ashike elongelokalunga olo hali longifa alushe edina laKalunga, Jehova, nohadi yukifa elitulemo kulo. (Epsalme 83:18; Mateus 6:9) Onda li nde lihonga kutya Jehova Kalunga okwa pa ovanhu etimaumbwile loku ka kala fiyo alushe moparadisa kombada yedu. Epsalme 37:9 ola ti: “Ava tava teelele Omwene, otava ka nangala oshilongo” ile tu tye edu. Onda li nda hafa okushiiva kutya ovanhu aveshe ovo tava kendabala okudulika komifikamhango daKalunga di na sha nelihumbato ngaashi da yelifwa mOmbiibeli otava dulu okukala netimaumbwile la tya ngaho.

Ashike onda li nda kondja opo ndi lundulule eenghedi dange opo ndi kale metwokumwe nOmbiibeli. Okupondola momusika nomokufaneka okwa li kwa ningifa nge ndi kale ndi na ounhwa, onghee onda li tete ndi na okulihonga elininipiko. Kakele kaasho, kasha li shipu kwaame okweefa po okuheneenghedi. Onda pandula eshi Jehova he lididimikile, ha file onghenda noha udile oukwao wananghali ovo tava kendabala ngaashi tava dulu va dulike kwaasho Ombiibeli tai hongo.

Oukomunisi nokuhaitavela kutya Kalunga ke ko oya li ya nwefa nge mo oule weedula 18 dotete donghalamwenyo yange, ndele Ombiibeli oya kala tai lundulula onghalamwenyo yange fiyo opaife. Osho nde lihonga osha kufa po omalipulo ange e na sha nonakwiiwa nosha kwafela nge ndi kale ndi na elalakano monghalamwenyo. Onda ninginifwa mo 1993 ndi li Ondombwedi yaJehova, nomo 2000, onda hombola Tabitha, omwiitaveli mukwetu omuladi. Ohatu longifa efimbo lihapu okukwafela ovanhu vakwetu va shiive Ombiibeli. Vahapu ovo hatu shakeneke ove na oudilo wa fa wange, va nwefwa mo koukomunisi noinava itavela kutya Kalunga oko e li. Ohandi kala nda hafa neenghono okumona vamwe vomuvo tave lihongo kombinga yaJehova.

Eshi opo nda hovele okweendafana nEendombwedi daJehova, ovadali vange ova li va handuka. Ndele okudja opo, ova li va mona oidjemo iwa oyo ya etifwa kokweendafana kwange nEendombwedi. Paife onda hafa eshi hava lesha Ombiibeli nohave uya kokwoongala kwopaKriste kwEendombwedi daJehova.

Ame naTabitha ohatu hafele ohombo yetu molwaashi ohatu kendabala okudulika filufilu komayele oo a pewa ovalihomboli mOmbiibeli. Pashihopaenenwa, okudulika komayele ayo e na sha nokukala omudiinini mohombo ohashi pameke ohombo yetu. — Ovaheberi 13:4.

Inandi tila vali onghalamwenyo nokandi na omalipulo e na sha nonakwiiwa. Ondi udite kutya ondi li oshitukulwa shoumwainafana womounyuni aushe, oo hau hafele ombili noukumwe washili. Moukwaneumbo wa tya ngaho otwe litala ko tu fike pamwe. Osho osho nda kala nda itavela nosho nda kala nda halelela monghalamwenyo yange aishe.