OVALESHI TAVA PULA . . .
Ovakriste ove na ngoo okudana Okrismesa?
Ovanhu omamiliyona mounyuni ova itavela kutya Okrismesa oyo oshivilo shedalo laJesus Kristus. Ndele mbela owe lipulile ngoo nale ngeenge Ovakriste vomefelemudo lotete, ovo va li popepi naJesus, ova li hava dana Okrismesa? Mbela ou shii ngoo kutya Ombiibeli otai ti ngahelipi kombinga yomafiku omadalo? Ngeenge owa mono omanyamukulo omapulo oo, otashi ke ku kwafela u shiive ngeenge Ovakriste ove na ngoo okudana Okrismesa ile hasho.
Shotete, Ombiibeli inai popya edano ledalo laJesus ile lomupiya waKalunga wonhumba omudiinini. Omishangwa oda popya ashike kombinga yovanhu vavali ovo va li va dana omadalo avo. Aveshe kava li hava longele Jehova, Kalunga oo a popiwa mOmbiibeli, nomomafiku omo va li va dana omadalo avo omwa li mwa ningwa oinima ii. (Genesis 40:20; Markus 6:21) O-Encyclopædia Britannica oya ti kutya Ovakriste votete kava li va tambula ko “onghedindjikilile yoshipaani yokudana omafiku omadalo.”
Jesus okwa dalwa naini?
Ombiibeli inai popya kondadalunde kutya Jesus okwa dalwa naini. O-Cyclopedia yaMcClintock naStrong oya ti: “Efiku ledalo laKristus itali hangwa mo mEtestamenti Lipe ile, modjo imwe vali.” Paulelalela, ngeno Jesus okwa li a hala ovashikuli vaye va dane efiku ledalo laye, ngeno okwe va lombwela kondadalunde kutya okwa dalwa naini.
Oshitivali, Ombiibeli inai popya kutya Jesus okwa li ha dana Okrismesa ile umwe womovahongwa vaye. O-New Catholic Encyclopedia oya ti kutya edano lOkrismesa ola li tete la tumbulwa “mo-Chronograph yaPhilocalus, embo lokodula lOvaroma olo ouyelele walo tashi dulika wa shangwa mo 336 [O.P.].” Osho osha ningwa konima eshi Ombiibeli ya shangwa nopa pita omafelemido konima eshi Jesus a li kombada yedu. Onghee hano, McClintock naStrong ova ti kutya “okudana Okrismesa inaku dja kuKalunga, noina ku dja mEtestamenti Lipe.” *
Jesus okwa lombwela ovahongwa vaye va dimbuluke shike?
Jesus, e li Omuhongi Munene, okwa honga sha yela shi na sha naasho a hala ovashikuli vaye va ninge, naasho osha shangwa mOmbiibeli. Ndele edano lOkrismesa inali kwatelwa mo. Ngaashi ashike omuhongifikola ina hala ovahongwa vaye va ye pomunghulo waasho e va honga, Jesus naye ina hala ovashikuli vaye va ‘koye kombada yaasho sha shangwa’ mOmishangwa Diyapuki. — 1 Ovakorinto 4:6.
Mepingafano naasho, ope na oshiningwanima shimwe sha fimana osho Ovakriste vonale va li ve shii nawa, Edimbuluko lefyo laJesus. Jesus okwa lombwela ovahongwa vaye kutya ove na okudimbuluka naini oshiningwanima osho, nokwe va ulikila nghee ve na oku shi ninga. Omalombwelo oo okondadalunde nosho yo efiku lefyo laye, okwa shangwa mOmbiibeli. — Lukas 22:19; 1 Ovakorinto 11:25.
Ngaashi twa mona metetekelo, Okrismesa oi li edano ledalo, nOvakriste votete kava li hava shikula onghedindjikilile oyo yoshipaani. Shimwe vali, Ombiibeli inai popya kutya Jesus ile vamwe ova li hava dana Okrismesa. She likolelela koumbangi oo, Ovakriste omamiliyona mounyuni ova fika pexulifodiladilo kutya kave na okudana Okrismesa.
^ okat. 6 Opo u mone ouyelele muhapu u na sha neenghedindjikilile dihapu dOkrismesa, tala oshitukulwa “Ovaleshi tava pula . . . Oushili kombinga yOkrismesa” (“Our Readers Ask . . . What Are the Facts About Christmas?”) mOshungonangelo yOshiingilisha ye 1 Desemba 2014, i li kointaneta, ko-www.pr418.com.
Otashi dulika yo u hafele oikundafanwa ei
OMAPULO OO HAA PULWA LUHAPU
Omolwashike Eendombwedi daJehova ihadi dana Okrismesa?
Ovanhu vahapu otava twikile okudana Okrismesa nonande ove shii oudilo wayo. Mona kutya omolwashike Eendombwedi daJehova iha di i dana.
OMAPULO OO HAA PULWA LUHAPU
Omolwashike Eendombwedi daJehova ihadi dana omadalo?
Tala koinima ine i na sha nomadano omadalo oyo tai ulike kutya omolwashike Kalunga ine a hafela.
EDIMBULUKO
Edimbuluko lefyo laJesus
Ohatu ku shivi nefimaneko opo u uye u ongale pamwe nafye poshiningwanima osho sha fimana. Oto ke lihonga nghee to dulu okumona ouwa mefyo laJesus pauhandimwe.
