MANGA Jesus ina shuna meulu, okwa li a lombwela ovahongwa vaye a ti: ‘Otamu ka ninga eendombwedi dange fiyo okominghulo dounyuni.’ (Oilonga 1:8) Ovahongwa okwa li tave ke shi enda ngahelipi opo va udifile mounyuni aushe?

Omuprofesa Martin Goodman, wokoUnivesiti yaOxford, okwa ti, “oilonga yokuudifa oya yoolola ko Ovakriste komalongelokalunga makwao, mwa kwatelwa Ovajuda vomOuhamba waRoma wotete.” Jesus okwa li ha udifile keshe pamwe. Ovakriste vashili ove na okulandula oshihopaenenwa shaye nokuudifa keshe pamwe ‘evangeli lOuhamba waKalunga.’ Ove na okukonga ovanhu ovo va hala okushiiva oshili. (Lukas 4:43) Nomolwaasho mefelemudo lotete, pa li “ovayapostoli.” (Markus 3:14) Oshitya osho otashi ti, ovo va tumwa va ka longe oshilonga shonhumba. Jesus okwa li a lombwela ovashikuli vaye a ti: “Indeni hano ka ningeni ovanhu aveshe ovalongwa vange.” — Mateus 28:18-20.

Ovayapostoli vaJesus 12 kave ko vali kombada yedu, ashike ovapiya vaJehova vahapu otava shikula oshihopaenenwa shavo moilonga yokuudifa. Ngeenge va pulwa va ka udifile oko ku na omhumbwe inene yovaudifi, ohava ti: “Aame ou, tume nge!” (Jesaja 6:8) Vamwe, ngaashi omayovi ovo va dja kOfikola yaGilead, ova tembukila koilongo yokokule. Vamwe ova tembukila keenhele dimwe moilongo yavo. Vahapu ove lihonga elaka lipe opo va kwafele eongalo ile ongudu yonhumba. Nonande haalushe hashi kala shipu, ovamwatate novamwameme aveshe ovo ova  ninga omaliyambo nehalo liwa omolwohole yokuhola Jehova novanhu vakwao. Ohave liunganeke nawa nokulongifa efimbo lavo, eenghono nosho yo oimaliwa yavo opo va ka udife oko ku na omhumbwe inene yovaudifi. (Lukas 14:28-30) Ovamwatate novamwameme ovo otava longo oshilonga sha fimanenena.

Haatushe hatu dulu okutembukila oko ku na omhumbwe inene ile okulihonga elaka lipe. Ndele atushe ohatu dulu okukala ngaashi ovatumwa momaongalo etu.

Mefelemudo lotete, Ovakriste ova li hava udifa nouladi nonande vahapu vomuvo ova li moilando yavo nokava li ovatumwa. Paulus okwa li a lombwela Timoteus a ti: “Longa oshilonga shomuudifi wevangeli, wanifa nawa oshilongayakulo shoye.” (2 Timoteus 4:5) Eendjovo odo oda li tadi longo kOvakriste vonale, notadi longo yo nokufye kunena. Ovakriste aveshe ove na okudulika koshipango shokuudifa etumwalaka lOuhamba nokuninga ovanhu ovahongwa. Ope na eenghedi dihapu omo hatu dulu okukala ngaashi ovatumwa, nokuli nomomaongalo etu.

Pashihopaenenwa, ngeenge ovatumwa tava tembukile koshilongo shimwe, eenghalo ohadi kala da yooloka, nohava kala va pumbwa okuninga omalunduluko opo va ikilile onghalamwenyo ipe. Mbela itatu dulu okulongifa eenghedi dipe opo tu udifile ovanhu nonande itatu dulu okutembukila oko ku na omhumbwe inene? Pashihopaenenwa, mo 1940, tete ovamwatate ova li va ladipikwa va kale hava i moukalele wepandavanda lumwe moshivike. Mbela owa hetekela ngoo nale okuyandja oundombwedi mepandavanda? Owa longifa ngoo nale okatemba koileshomwa? Noitya imwe, owa hala ngoo okuhetekela okuudifa onghundana iwa meenghedi di lili noku lili?

Ngeenge ou na etaleko liwa, oto ka kala u na ouladi nondjungu moukalele. Ovo hava tembukile oko ku na omhumbwe inene yovaudifi ile ovo ve lihonga elaka lipe, luhapu ohava kala ovaudifi va pyokoka, notava dulu okukwafela eongalo neenghono. Pashihopaenenwa, ohava kwatele komesho moilonga yokuudifa. Ovatumwa luhapu ohava kwatele yo komesho meongalo fiyo osheshi ovamwatate vomoshitukulwa va wana oku shi ninga. Ngeenge ou li omumwatate a ninginifwa, ou na ngoo ‘ehalo’ lokulalakanena okuyakula  Ovakriste vakweni meongalo leni u li omuyakuliongalo ile omukulunhuongalo? — 1 Timoteus 3:1.

Ohatu dulu yo okukwafela Ovakriste vakwetu meongalo meenghedi di lili noku lili. Kashi na nee mbudi kutya otu li ovanyasha ile ovakulunhu, ovamwameme ile ovamwatate, atusheni ohatu dulu okupameka Ovakriste vakwetu ovo ve li momaudjuu. — Oilonga 18:23.

Ngeenge otwa hala okukwafela Ovakriste vakwetu, otu na oku va shiiva nawa. Ombiibeli otai tu ladipike “tu filafaneni oshisho,” ile tu kale hatu diladila kombinga yeemhumbwe dOvakriste vakwetu ngeenge tu li navo. (Ovaheberi 10:24) Osho inashi hala okutya otu na okukala hatu pulapula vamwe tu shiive oiholekwa yavo. Ndele osha hala okutya otu na okukendabala okuuda ko osho Ovakriste vakwetu va pumbwa. Otashi dulika va pumbwa ekwafo tali wapalele, ehekeleko ile etwomukumo tali di mOmbiibeli. Oshoshili kutya omafimbo amwe ovakulunhuongalo novayakuliongalo ovo ashike tava dulu oku va kwafela. (Ovagalati 6:1) Ashike atushe ohatu dulu okukwafela ovanamido ile omaukwaneumbo oo a taalela omaupyakadi.

Salvatore okwa li a mona ekwafo la yukila oko. Molwaashi okwa li e na oupyakadi wopamaxupilo wa kwata moiti, okwa li e na okulandifa po ongeshefa, eumbo laye nosho yo oinima ihapu oyo va li ve na moukwaneumbo wavo. Okwa li te lipula unene noukwaneumbo waye. Oukwaneumbo umwe meongalo olo owa li wa didilika kutya oukwaneumbo waSalvatore owa pumbwa ekwafo. Ova li va pa Salvatore oimaliwa noku va kwafela aveshe nomukulukadi waye va mone oilonga. Ova li yo hava tokelwa navo luhapu tava pwilikine kuvo noku va twa omukumo. Ova li va panga oukaume muwa. Paife omaukwaneumbo oo avali ohaa dimbuluka nehafo omafimbo oo va li hava kala pamwe pefimbo olo la li lidjuu.

Ovakriste vashili ihava ongaonga okulombwela vamwe kombinga yeitavelo lavo. Otu na okuhopaenena Jesus nokulombwela keshe umwe kombinga yomaudaneko a denga mbada oo Kalunga a udaneka. Kutya nee ohatu dulu okutembuka ile hasho, atusheni ohatu dulu okukendabala okukwafela vamwe meongalo letu. (Ovagalati 6:10) Ngeenge otwa kala hatu kwafele vakwetu, ohatu ka mona ehafo “nokwiimika oiimati moshilonga keshe shiwa.” — Ovakolossi 1:10; Oilonga 20:35.