1, 2. (a) Oshike kunena hashi etele oshiwana shaKalunga ehafo? (b) Ongahelipi ovadali Ovakriste novakulunhuongalo tava dulu okukwafela ovanyasha va ude ko eityo leninginifo?

OMUKULUNHUONGALO umwe okwa lombwela Christopher weedula 12 a ti: “Onda kala ndi ku shii okudja kouhanana woye, nonda hafa okuuda kutya owa hala okuninginifwa. Ashike onda hala ndi ku pule kutya, omolwashike wa hala okukatuka onghatu oyo?” Omukulunhuongalo okwa li e na etomheno liwa eshi a pula epulo olo. Ohashi tu hafifa unene okumona ovanyasha vahapu tava ninginifwa omudo keshe. (Omuudifi 12:1) Ovadali novakulunhuongalo meongalo ove na okushilipaleka kutya ovanyasha ohava ningi omatokolo kuvo vene nove udite ko kutya eninginifo otali ti shike.

² Otwe lihonga mOmbiibeli kutya eliyapulo neninginifo oi li ehovelo longhalamwenyo yopaKriste. Onghalamwenyo oyo  ipe ohai eta omanangekonoupuna taa di kuJehova nosho yo omapataneko taa di kuSatana. (Omayeletumbulo 10:22; 1 Petrus 5:8) Nomolwaasho, ovadali Ovakriste ove na okukala hava kongo efimbo opo va honge ounona vavo kutya okukala omuhongwa waKristus otashi ti shike. Ngeenge ovanyasha kave na ovadali moshili, ovakulunhuongalo otave va kwafele pahole opo va ude ko kutya eliyapulo neninginifo otai ti shike. (Lesha Lukas 14:27-30.) Ngaashi naanaa hashi pula okulilongekida opo omunhu a mane okutunga etungo, ovanyasha ove na okulilongekida manga inava ninginifwa opo va longele Jehova noudiinini ‘fiyo okexulilo.’ (Mateus 24:13) Oshike tashi kwafele ovanyasha va tokole okulongela Jehova fiyo alushe? Natu ka kundafaneni kombinga yaasho.

3. (a) Eendjovo daJesus nodaPetrus otadi tu hongo shike kombinga yeninginifo? (Mateus 28:19, 20; 1 Petrus 3:21) (b) Omapulo elipi hatu ka kundafana, nomolwashike?

³ Mbela ou li omunyasha oo a hala okuninginifwa? Ngeenge osho, owe litulila po elalakano la denga mbada. Oshi li oufembanghenda munene okukala Ondombwedi yaJehova ya ninginifwa. Natango owa ninga yo oshinima osho Omukriste e na okuninga, noshi li onghatu ya fimana kwaavo va hala oku ka xupa poudjuu munene. (Mateus 28:19, 20; 1 Petrus 3:21) Ngeenge owa ninginifwa, owa ulika kutya owa udaneka okulongela Jehova fiyo alushe. Ou na okukala wa hala shili okuwanifa po eudaneko olo. Onghee hano, omapulo aa taa landula otae ke ku kwafela u mone ngeenge owe lilongekida ngoo oku ka ninginifwa: (1) Mbela onda kula ngoo pamhepo opo ndi ninge etokolo lokuninginifwa? (2) Mbela aame ngoo mwene nda hala okuninginifwa? (3) Ondi udite ko ngoo kutya okuliyapulila Jehova otashi ti shike? Natu ka kundafaneni omapulo oo.

4, 5. (a) Omolwashike ovakulunhu havo ashike ve na okuninginifwa? (b) Okukula pamhepo kOmukriste osha hala okutya ngahelipi?

⁴ Ombiibeli inai popya kutya ovakulunhu ile ovo va wanifa omido donhumba ovo tava dulu okuninginifwa. Omayeletumbulo 20:11 okwa ti: “Nokamati take liholola nokuli pakukala kwako, oilonga yako ngenge ya yela noya yuka.” Onghee hano, nokuli nokaana otaka dulu okuuda ko kutya okulonga ouwa nokuliyapulila Omushiti wako otashi ti ngahelipi. Nomolwaasho eninginifo oli li onghatu ya fimana noya yuka kovanyasha ovo va hala okuulika kutya ova kula pamhepo nove liyapulila Jehova. — Omayeletumbulo 20:7.

⁵ Okukula pamhepo osha hala okutya ngahelipi? Oukulunhu haalushe hau yukifwa komido domunhu ile kokukula palutu.  Ombiibeli oya ti ovo va kula pamhepo ove shii “okutongola ouwa nowii.” (Ovaheberi 5:14) Omunhu oo a kula pamhepo oku shii osho shi li mondjila noha tokola okuninga ngaho tashi di komutima. Onghee hano, iha nwefwa mo noupu a ninge osho sha puka. Haalushe a pumbwa umwe e mu lombwele osho shi li mondjila. Nomolwaasho oshi li pandjele eshi ovanyasha ovo va ninginifwa va teelelwa va ninge osho shi li mondjila nonande kape na ovakulunhu. — Yelekanifa nOvafilippi 2:12.

6, 7. (a) Omashongo elipi Daniel a li a shakeneka eshi a li muBabilon? (b) Ongahelipi Daniel a ulika kutya okwa kula pamhepo?

⁶ Mbela omunyasha ota dulu ngoo shili okukala a kula pamhepo? Natu ka kundafaneni oshihopaenenwa shaDaniel. Otashi dulika a li natango omunyasha eshi a kufwa po povadali vaye a twalwa kuBabilon. Daniel okwe li hanga mokati kovanhu ovo ihava dulika keemhango daKalunga. Ashike natu ka konakoneni nawa onghalo yaDaniel. Eshi a li muBabilon, okwa li ha ungaungwa naye nefimaneko. Okwa li umwe womwaava va li va hoololwa va kale hava yakula ohamba. (Daniel 1:3-5, 13) Osha fa shi li ngaha kutya Daniel okwa li e na ondodo ya tumbala muBabilon i dule ngeno oyo a li ta dulu okukala e na muIsrael.

⁷ Mbela Daniel okwa li e linyenga ngahelipi eshi a li muBabilon? Mbela okwa li a pitika ovanhu vomuBabilon va lundulule eenghedi daye ile va nghundipaleke eitavelo laye? Hasho nandenande. Ombiibeli oya ti kutya eshi Daniel a li muBabilon, okwa li a tokola “momutima waye nokutya, ye ite ke linyateka” note ke likaleka kokule nakeshe  shimwe osho shi na ekwatafano nelongelokalunga loipupulu. (Daniel 1:8) Osho osha ulika kutya okwa li a kula lela pamhepo.

8. Oshike to lihongo koshihopaenenwa shaDaniel?

⁸ Oshike hatu lihongo moshihopaenenwa shaDaniel? Omunyasha oo a kula pamhepo ota ka kala a diinina eitavelo laye nomeenghalo didjuu. Ita ka kala a fa fimbi oo ha lundulula oluvala laye she likolelela komudingonoko opo e li. Ite ke lifefa kaume kaKalunga eshi e li pOlupale lOuhamba, ndele ngeenge e li kofikola okaume kounyuni. Ponhele yaasho ota ka kala omudiinini nongeenge ta yelekwa. — Lesha Ovaefeso 4:14, 15.

9, 10. (a) Ongahelipi omunyasha ta dulu okumona ouwa ngeenge okwa diladila kutya okwa li e linyenga ngahelipi eshi a li a yelekwa efimbo opo la di ko? (b) Eninginifo ola hala okutya ngahelipi?

⁹ Oshoshili kutya kape na omunhu a wanenena. Kashi na nee mbudi kutya ovanyasha ile ovakulunhu, aveshe ohava ningi omapuko. (Omuudifi 7:20) Ndele ngeenge owa hala okuninginifwa, otashi ka kala pandunge okulikonakona nawa ngeenge owa tokola ngoo shili okukala ho dulika koipango yaJehova. Lipula kutya: ‘Onda kala ngoo handi dulika kuJehova?’ Mbela eshi eitavelo loye la yelekwa oshikando shaxuuninwa owa li we linyenga ngahelipi? Owa li ngoo wa dula okuhoolola po osho shi li mondjila? Ngaashi Daniel, mbela ope na umwe oo a li te ku ladipike u longife ounghulungu woye mounyuni waSatana? Nongeenge oshinima sha tya ngaho osha li tashi ku hongaula, mbela owa li ngoo u shii kutya ehalo laKalunga olilipi? — Ovaefeso 5:17.

¹⁰ Omolwashike sha fimana okushiiva omanyamukulo omapulo oo opaumwene? Omolwaashi otae ku kwafele u mone kutya eninginifo oshinima sha kwata moiti shili. Okuninginifwa ohaku ulikile vamwe kutya owa udanekela Jehova eudaneko la fimana. Owa udaneka kutya oto ka kala u mu hole noku mu longela fiyo alushe nomutima aushe. (Markus 12:30) Keshe umwe oo ta ninginifwa oku na okukala a tokola okuwanifa po eudaneko laye olo a udanekela Jehova. — Lesha Omuudifi 5:4, 5.

11, 12. (a) Omunhu oo a hala okuninginifwa oku na okushilipaleka kombinga yashike? (b) Oshike tashi ku kwafele u kale u na etaleko liwa li na sha nelongekido laJehova leninginifo?

¹¹ Ombiibeli oya ti ovapiya aveshe vaJehova, mwa kwatelwa ovanyasha, otave ke mu longela “nehalo liwa.” (Epsalme 110:3) Onghee hano, keshe oo a hala okuninginifwa oku na okulikonakona ngeenge ote shi ningi ngoo tashi di kehalo laye. Otashi dulika wa pumbwa okulipula moule kutya oshike naanaa tashi ku linyengifa, unene tuu ngeenge owa kulila moshili.

¹² Eshi to kulu, otashi dulika wa mona ovanhu vahapu tava ninginifwa, tashi dulika nokuli vamwe ookaume koye ile ovapambele voye. Ashike dimbuluka kutya ino pumbwa okukala wa hala okuninginifwa  molwaashi wa hanga omido donhumba ile molwaashi u wete keshe umwe ta ninginifwa. Ongahelipi to dulu okushiiva kutya owa tala ko eninginifo ngaashi Jehova e li tala ko? Konga efimbo u diladile moule kutya omolwashike eninginifo la fimana. Moshitukulwa eshi nomwaashi tashi landula, oto ka mona mo omatomheno taa ulike kutya omolwashike eninginifo la fimana.

13. Oshike tashi dulu oku ku kwafela u mone ngeenge etokolo loye lokuninginifwa ola dja kwoove mwene?

¹³ Onghedi imwe to dulu okumona ngeenge etokolo loye loku ka ninginifwa ola dja ngoo kwoove mwene, okukonakona onghedi yoye yokwiilikana. Mbela oho ilikana lungapi? Oho ilikana ngoo to popi oinima kondadalunde? Omanyamukulo oye komapulo oo otae ku kwafele u mone ngeenge ou na ngoo shili ekwatafano naJehova. (Epsalme 25:4) Luhapu Jehova oha nyamukula omailikano etu okupitila mOmbiibeli. Onghedi imwe to dulu okumona ngeenge owa hala okweehena shili popepi naJehova noku mu longela tashi di kehalo loye omokutalulula elandulafano loye lekonakono lopaumwene. (Josua 1:8) Lipula kutya: ‘Mbela ohandi konakona ngoo Ombiibeli alushe? Mbela ohandi kufa ngoo ombinga pElongelokalunga lOukwaneumbo nehalo liwa?’ Omanyamukulo omapulo oo otae ku kwafele u mone ngeenge etokolo loye loku ka ninginifwa ola dja ngoo kwoove mwene ile hasho.

14. Yelifa eyooloko pokati keliyapulo neninginifo.

¹⁴ Ovanyasha vamwe otashi dulika vehe shii eyooloko pokati keliyapulo neninginifo. Vamwe ohava ti ove liyapulila nale Jehova, ashike inave lilongekidila oku ka ninginifwa. Mbela osho otashi shiiva ngoo shili? Okuliyapulila Jehova oku mu udanekela meilikano kutya oto ke mu longela fiyo alushe. Ngeenge to ninginifwa, oto ulikile vamwe moipafi kutya owe liyapulila nale Jehova. Onghee hano, manga ino ninginifwa, owa pumbwa okuuda ko kutya okuliyapulila Jehova osha hala okutya ngahelipi.

15. Eliyapulo otali ti shike?

¹⁵ Ngeenge to liyapulile Jehova, oto mu lombwele kutya paife oto ka longa ehalo laye. Owe mu udanekela kutya oku mu longela osho tashi kala oshinima sha fimanenena monghalamwenyo yoye. (Lesha Mateus 16:24.) Eudaneko la tya ngaho ola kwata moiti. (Mateus 5:33) Ndele mbela ongahelipi to dulu okuulika kutya ou shii kutya ito longo vali ehalo loye mwene, ndele olaJehova? — Ovaroma 14:8.

16, 17. (a) Yelifa kutya okulixupula ove mwene osha hala okutya ngahelipi. (b) Omunhu ngeenge te liyapulile Jehova ohe mu lombwele shike?

¹⁶ Natu ka kundafaneni oshihopaenenwa tashi shikula. Diladila nee ngeno kaume koye e ku pa otuwa omaano. Opo nee, okwe ku lombwela ta ti: “Otuwa oyoye, ashike eeshapi aame handi kala nado. Kakele kaasho, aame handi kala handi i shingi, ndele haave.” Oto ka kala uditile ngahelipi omaano oo? Oto ka kala uditile ngahelipi kaume koye oo e ku pa otuwa?

¹⁷ Ngeenge umwe te liyapulile Jehova, ohe mu lombwele ta ti: “Ohandi ku pe onghalamwenyo yange. Paife ame ondoye.” Jehova okwa teelela omunhu a tya ngaho a wanife po eudaneko laye. Ndele mbela ongahelipi ngeenge omunhu a tya ngaho okwa hovele okuhadulika kuJehova tashi dulika mokweendelafana nomunhu iha longele  Jehova? Ile ongahelipi ngeenge omunhu a tya ngaho okwa tambula ko oilonga oyo itai ke mu pa efimbo loku ka udifa ile tai mu faulifa okwoongala? Omunhu a tya ngaho ina diinina osho a udanekela Jehova. Osho osha faafana ashike nokuyandja otuwa ndele to kufa po eeshapi. Eshi twe liyapulila Jehova, otwe mu lombwela hatu ti, “Onde ku pa onghalamwenyo yange aishe.” Onghee hano, otu na okulonga alushe ehalo laJehova nonande hasho twa hala okuninga. Natu hopaeneneni Jesus oo a ti: “Osheshi Ame nda dja keulu hakuwanifa ehalo lange mwene, ndelenee ehalo laau a tuma nge.” — Johannes 6:38.

18, 19. (a) Oshimoniwa shaRose noshaChristopher otai ulike ngahelipi kutya okuninginifwa oku li oufembanghenda oo tau eta omanangekonoupuna? (b) Ou uditile ngahelipi oufembanghenda wokuninginifwa?

¹⁸ Nopehe na omalimbililo, eninginifo etokolo la kwata moiti. Oshi li oufembanghenda munene okuliyapulila Jehova nokuninginifwa. Ovanyasha ovo ve hole Jehova nove udite ko kutya eliyapulo oshike, ihava ongaonga okuliyapulila Jehova nokuninginifwa. Ihave lipe oushima omolwetokolo lavo. Omunyasha a ninginifwa wedina Rose okwa ti: “Ondi hole Jehova noitandi dulu okuhafela okuninga oinima imwe i lili ihe fi okulongela Jehova. Inandi ninga nande onale etokolo monghalamwenyo yange nda manguluka la fa lokuninginifwa.”

¹⁹ Ongahelipi shi na sha naChristopher oo a tumbulwa pehovelo loshitukulwa eshi? Okwa li e udite ngahelipi shi na sha netokolo laye eshi a li a hala okuninginifwa fimbo a li e na omido 12? Okwa ti okwa hafa neenghono eshi a ninga etokolo la tya ngaho. Okwa hovela okukokola ondjila eshi a li e na omido 17, nokwa ninga omuyakuliongalo fimbo a li e na omido 18, nopaife ota longo koBetel. Okwa ti: “Etokolo olo nda ninga lokuninginifwa oli li pandunge. Oilonga oyo handi longele Jehova nosho yo ehangano laye oya kwafela nge ndi kale nda hafa.” Ongahelipi to dulu okulilongekida ngeenge owa hala okuninginifwa? Oshitukulwa tashi landula otashi ka nyamukula epulo olo.