Outumbulilo wonhumba wOshiheberi oo wa longifwa meevelishe odo otau dulu okuyukifwa kovakolokoshi ile kovayuki. Apa otapa landula omatomheno oo a ningifa outumbulilo oo u pepalekwe:

1. Outumbulilo oo owa pepalekwa she likolelela keityo loshitya shonhumba nokelongelokumwe lomatumbulo. Ekwatafano pokati kEpsalme 144:12-15 neevelishe odo da tetekela ole likolela koshitya shotete movelishe 12 osho shi lile po oshitya shOshiheberi asher. Asher otashi dulu okutolokwa meenghedi da yoolokafana. Pashihopaenenwa, otashi dulu okutolokwa onga oshityaponhele, “ovo” ile “oo.” Metoloko lonale, osha li sha tolokwa “ovo.” Kungaho, osha li sha ningifa omauwa oo a popiwa movelishe 12 fiyo 14 a yukifwe kovakolokoshi, ovo va popiwa meevelishe da tetekela. Ashike asher otashi dulu yo okuulika koidjemo ile koilanduliko, onghee otashi dulu okutolokwa noitya ngaashi, “opo,” “okudja opo” ile “opo nee.” Etoloko olo lomo 2013 nosho yo Eembiibeli dimwe oda longifa “opo nee.”

2. Outumbulilo oo wa pepalekwa owa ningifa Epsalme alishe li kale tali tu kumwe. Paife eshi kwa longifwa outumbulilo “opo nee,” osha ningifa opo omanangekonoupuna oo a popiwa movelishe 12 fiyo 14 a yukifwe kovayuki, ovo pavelishe 11 tava pula va ‘shilwe nova xupifwe’ momake ovakolokoshi. Naasho otashi longele yo kumwe novelishe 15 omo outumbulilo ‘elao’ wa holoka lwoikando ivali nelalakano lokudivilika kutya ovayuki ova punikwa shili. Osho osha ningifa opo eevelishe adishe odo okudja po 12 fiyo 15 di kale tadi ulike kovayuki ovo taku tiwa Jehova oye ‘Kalunga kavo.’ Dimbuluka yo kutya mOshiheberi kamwa li oileshifo ngaashi oihepaununinghwanyu. Onghee ovatoloki ove na okutala kutya onaini ya pumbiwa nonaini inai pumbiwa, naasho oshe likolelela komushingo woitevo yOshiheberi, koshikundafanwa nokoitukulwa yOmbiibeli ya pambafana.

3. Outumbulilo oo wa pepalekwa owa ningifa Epsalme olo li kale tali tu kumwe noitukulwa ikwao yOmbiibeli oyo tai popi omanangekonoupuna oo a nuninwa ovapiya vaKalunga ovadiinini. Paife outumbulilo mupe oo u lile po asher owa ningifa epsalme olo laDavid li kale tali divilike eteelelo olo Ovaisrael va li tava dulu okukala ve na ngeenge ova xupifwa momake ovatondi. Kungaho ova li tava ka kala ve na ehafo nehepuluko. (Lev. 26:9, 10; Deut. 7:13; Eps. 128:1-6) Pashihopaenenwa, Deuteronomion 28:4 okwa ti: “Oludalo lolutu loye, noiimati yomepya loye, noludalo leengobe doye noludalo leedi doye tali ka kala la nangekwa noupuna.” Metwokumwe naasho, oshiwana shaIsrael osha li tashi tyapula ombili inene nehepuluko pefimbo lepangelo laSalomo, omona waDavid. Kakele kaasho, eenghalo dimwe dopefimbo lepangelo laSalomo otadi faneke nghee eenghalo tadi ka kala koshi yepangelo laMessias. — 1 Eeh. 4:20, 21; Eps. 72:1-20.

Osha yela kutya outumbulilo oo wa pepalekwa mEpsalme 144 inau lundulula eudeko letu li na sha nomahongo Ombiibeli. Ponhele yaasho, owa ningifa epsalme olo li kale tali divilike eteelelo lovapiya vaJehova li na sha nokuhanaunwa po kovakolokoshi netimaumbwile loku ka hafela ombili yaalushe nehepuluko. — Eps. 37:10, 11.