1. Oshike atushe twa pumbwa okuninga?

MBELA owa hala okukala mefiyafano olo lidjuu, unene tuu ngeenge oto ehama ile wa loloka? Hasho nandenande. Ashike omuyapostoli Paulus okwa popya kutya Ovakriste aveshe vashili ove li mefiyafano. (Heb. 12:1) Ashike atusheni, kutya ovanyasha ile ovakulunhu, tu na eenghono ile otwa loloka, otu na okulididimika fiyo okexulilo ngeenge otwa hala tu ka mone ondjabi oyo Jehova e tu udanekela. — Mat. 24:13.

2. Metwokumwe 2 Timoteus 4:7, 8, omolwashike Paulus e tu pela omayele oo?

² Paulus ka li a tila okupopya eendjovo odo molwaashi okwa “tondoka fiyo okefikilo mefiyafano.” (Lesha 2 Timoteus 4:7, 8.) Mbela Paulus okwa li ta popi kombinga yefiyafano lilipi kondadalunde?

3. Paulus okwa li ta popi kombinga yefiyafano lilipi?

³ Omafimbo amwe, Paulus okwa li ha longifa omaudano oo kwa li ha danwa muGreka shonale opo a honge oilihongomwa ya fimana. (1 Kor. 9:25-27; 2 Tim. 2:5) Peemhito dimwe, okwa longifa efiyafano lokutondoka opo a yelekanife efiyafano lOvakriste loku ka mona omwenyo. (1 Kor. 9:24; Gal. 2:2; Fil. 2:16) Omunhu oha i ‘mefiyafano’ olo ngeenge okwe liyapulile Jehova nokuninginifwa. (1 Pet. 3:21) Oha fiki kefikilo ngeenge Jehova e mu pe ondjabi yomwenyo waalushe. — Mat. 25:31-34, 46; 2 Tim. 4:8.

4. Oshike hatu ka kundafana moshitukulwa eshi?

⁴ Omafaafano amwe elipi e li pokati kokutondoka oshinano shile kolupadi nefiyafano lOvakriste loku ka mona omwenyo waalushe? Ope na oinima yonhumba oyo ya faafana. Natu ka taleni kuitatu yomuyo. Shotete, otwa pumbwa okushikula ondjila ya yuka; oshitivali, otwa pumbwa okutondoka fiyo okefikilo; oshititatu,  otwa pumbwa okufinda omashongo oo hatu shakeneke mondjila.

5. Ondjila ilipi twa pumbwa okushikula, nomolwashike?

⁵ Opo omutondoki ye mwenemwene a ka mone ondjabi, okwa pumbwa okushikula omalombwelo aavo va unganeka oudano oo. Sha faafana, opo tu ka mone ondjabi yomwenyo waalushe, otwa pumbwa okushikula efiyafano lOvakriste ile ondjila oyo tai twala komwenyo. (Oil. 20:24; 1 Pet. 2:21) Ashike Satana nosho yo ovo hava shikula oshihopaenenwa shaye, ova hala tu ninge etokolo la yooloka ko kwaalo; ova hala tu kale ‘hatu longo navo owii.’ (1 Pet. 4:4) Ohava kala tava sheke onghedi yetu yokukalamwenyo nohava kala tava ti kutya ondjila yavo oi li xwepo molwaashi oi na emanguluko. Ashike odo odanakalindi. — 2 Pet. 2:19.

6. Oshike hatu lihongo koshihopaenenwa shaBrian?

⁶ Ovanhu ovo hava shikula ounyuni waSatana, ohava ka mona diva kutya ondjila oyo va shikula ihai va pe emanguluko, ndele oye va ninga ovapika. (Rom. 6:16) Natu ka taleni koshihopaenenwa shaBrian. Ovadali vaye ova kala have mu ladipike a kale mefiyafano lOvakriste loku ka mona omwenyo. Ashike eshi a fika mefimbo lokamukondapweyu okwa kala a limbililwa ngeenge ondjila oyo a hoolola otai mu kwafele ngoo a kale a hafa. Brian okwa li a tokola okushikula ovo hava kala metwokumwe nomifikamhango daSatana. Okwa ti: “Oinima oyo nda li handi diladila kutya oyo emanguluko, oya ningifa nge ndi kale nda pikwa. Mokweendela ko kwefimbo, onda li handi longifa oingangamifi, handi nu oikolwifa nokukala nonghedi yokukalamwenyo inai koshoka. Oule womido da ka shikula ko, onda kala handi longifa oingangamifi oyo ya nyika oshiponga nonda ninga yo omupika wayo. . . . Onda hovela yo okulandifa oingangamifi opo ndi liyambidide.” Mokweendela ko kwefimbo, Brian okwa li a tokola okukala metwokumwe nomifikamhango daJehova. Okwa li a lundulula ondjila oyo a li a shikula, ndele ta ninginifwa mo 2001. Paife okwa hafa neenghono eshi a ya mefiyafano lOvakriste loku ka mona omwenyo. *

7. Oku na eendjila mbali dilipi metwokumwe naMateus 7:13, 14?

⁷ Inashi fimana tuu eshi twa hoolola ondjila oyo ya yuka! Satana okwa hala atushe tu efe po okukala mondjila ya finana oyo tai “twala komwenyo waalushe” nokushikula ondjila ya mbwalangadja, oyo ya lambwa kovanhu vahapu mounyuni. Ondjila oyo oya mbwalangadja noipu okushikula. Ashike ondjila ya tya ngaho “otai twala mehanauno.” (Lesha Mateus 7:13, 14.) Opo tu kale mondjila oyo ya yuka notuha pukifwe, otwa pumbwa okukala twe lineekela muJehova nokupwilikina kuye.

8. Ngeenge omutondoki okwa punduka, oha ningi po shike?

⁸ Ovo tava kufa ombinga mefiyafano loshinano shile, ohava kala tava yandje elitulemo opo vaha punduke. Ashike nande ongaho, otashi dulika va pundukifwe kuumwe oo tava tondoka naye ile tashi dulike ve lidenge momalambo oo haa kala mondjila. Ashike ngeenge ova punduka, ohave litoola po meendelelo nokutwikila okutondoka. Ihava yandje elitulemo kwaasho she va pundukifa, ndele ponhele yaasho, ohava yandje elitulemo kefikilo noku ka mona ondjabi.

9. Oshike tu na okuninga ngeenge otwa punduka?

⁹ Eshi tu li mefiyafano, otashi dulika tu punduke lwoikando omolwomapuko oo hatu ningi mokupopya ile paenghatu. Ile tashi dulika ovo hatu tondoka navo ve tu udife nai. Otu na okukala twe lilongekidila oinima aishe oyo. Atushe otu li ovalunde, nohatu tondoka mondjila ya finana oyo tai twala komwenyo waalushe. Onghee, ohatu ngwadjulafana omafimbo nomafimbo. Paulus okwa popya kutya ohatu “ningafana nai” omafimbo amwe. (Kol. 3:13) Ndele ponhele yokuyandja elitulemo kwaasho she tu pundukifa, natu yandjeni elitulemo kondjabi oyo i li komesho. Ngeenge otwa punduka, natu litoole po, ndele hatu twikile okutondoka. Ngeenge otwa handuka ndele hatu efa po okulongela Jehova, itatu ka fika kefikilo noitatu ka mona ondjabi. Kakele kwaasho, ohatu ka ninga einda kwaavo tava kendabala okutondoka mondjila ya finana oyo tai twala komwenyo waalushe.

10. Ongahelipi hatu dulu okuhenuka ‘okupundukifa’ vamwe?

¹⁰ Onghedi imwe omo hatu dulu okuhenuka ‘okupundukifa’ ovo hatu tondoka navo, omoku va efa va ninge oinima monghedi omo va hala ngeenge tashi shiiva ponhele yokukala twa hala ve i ninge monghedi omo twa hala. (Rom. 14:13, 19-21; 1 Kor. 8:9, 13) Ngeenge otwa kala hatu ningi oinima monghedi ya fimana ya tya ngaho, itatu ka kala ngaashi ovatondoki ovo ve li mefiyafano lo vene. Ovatondoki ovo ve li mefiyafano olo ohava tondoka nelalakano loku ka mona ondjabi pauhandimwe, ohava kala ashike ve na ko na sha nouwa wavo vene. Ohava ningi keshe osho tava dulu opo va fiye po ovalotoki vakwao. Mepingafano naasho, fye itatu ningi efiyafano  navakwetu. (Gal. 5:26; 6:4) Elalakano letu okukwafela vahapu ngaashi tashi shiiva opo va ka fike kefikilo va ka mone ondjabi yomwenyo pamwe nafye. Onghee ohatu kendabala okutula moilonga omayele aPaulus a nwefwa mo eshi a ti: “Inamu lalakanena ashike ouwa weni vene, ndele lalakaneneni yo ouwa wavakweni.” — Fil. 2:4.

11. Oshike osho omutondoki ha yandje elitulemo kusho, nomolwashike?

¹¹ Kakele kokutala komesho, omutondoki womefiyafano lo vene, oha yandje elitulemo kefikilo. Nonande ihava kala ve wete omufinda oo nomesho, ohava kala va fa ve liwete va tauluka omufinda oo noku ka mona ondjabi. Ohashi va tu omukumo ngeenge tava diladila alushe kefikilo.

12. Oshike osho Jehova e tu pa pahole?

¹² Mefiyafano olo tu li, Jehova okwa udanekela oshiwana shaye ondjabi yomwenyo waalushe, kutya nee omeulu ile omoparadisa kombada yedu, ngeenge ova fiki fiyo okefikilo. Ombiibeli oya yelifa ondjabi oyo opo tu diladile nghee onghalamwenyo tai ka kala itunhula. Ngeenge otwa kala hatu diladila kombinga yonakwiiwa oyo Kalunga e tu udanekela, otashi ke tu kwafela tu kale twa tokola toko okulididimika.

13. Ouwa ulipi tu na oo ovatondoki vomefiyafano lo vene vehe na?

¹³ Ovakufimbinga vomomaudano omuGreka shonale, ova li hava kala va taalela omashongo ngaashi eloloko nosho yo ouyehame. Ova li ashike hava kala ve lineekela mokulideula nosho yo meenghono davo vene. Ngaashi ovatondoki ovo, nafye ohatu mono edeulo langhee hatu dulu okutondoka mefiyafano olo tu li mulo. Ashike fye otu na ouwa muhapu okuyelekanifa novatondoki vo vene. Ohatu mono eenghono okudja kuJehova, nekwafo olo he tu pe inali ngabekwa. Ngeenge otwa kala twe lineekela muJehova, ite ke tu deula ashike, ndele ote ke tu pameka yo. — 1 Pet. 5:10.

14. Ongahelipi 2 Ovakorinto 12:9, 10 tave tu kwafele tu lididimikile omashongo?

¹⁴ Paulus okwa li e na okulididimikila omashongo mahapu. Kakele kokutukwa nokuhepekwa kuvamwe, omafimbo amwe okwa li ha kala e udite ehe na eenghono, nokwa li e na okulididimikila “ekiya mombelela.” (2 Kor. 12:7) Ashike ponhele yokutala ko omashongo oo e li etomheno loku mu efifa po okulongela Jehova, okwa li e a tala ko e li omhito yoku mu lineekela. (Lesha 2 Ovakorinto 12:9, 10.) Molwaashi Paulus okwa li e na etaleko la tya ngaho, Jehova okwa li e mu kwafela opo a pite momayeleko aeshe.

15. Ngeenge otwa hopaenene Paulus, oshike hatu ka mona?

¹⁵ Nafye otashi dulika tu ka ulwe omalaka mai ile tu ka hepekwe omolweitavelo letu. Ile otashi dulika tuhe na oukolele ile twa loloka. Ashike ngeenge otwa hopaenene Paulus, ohatu ka tala ko omashongo a tya ngaho e li omhito yanghee Jehova te tu yambidida pahole.

16. Oshike u na okuninga ngeenge ku na oukolele?

¹⁶ Mbela ou li meembete ile kokatemba? Mbela ou na ouyehame weengolo ile iho mono ko nawa? Ngeenge osho, mbela ito dulu okutondoka pamwe novanyasha nosho yo naavo ve na oukolele? Oto dulu! Ovakulupe vahapu noingudu otava tondoka mondjila oyo tai twala komwenyo waalushe. Itava ningi ngaho keenghono davo vene. Ndele ponhele yaasho, ohava pamekwa kuJehova okupitila mokwoongala oko kwa kwata momawi nosho yo mouvidio. Ohava kufa yo ombinga moilonga yokuninga ovanhu ovahongwa mokuudifila eendokotola, ovapangi novapambele.

17. Jehova oha kala e uditile ngahelipi ovo vehe na oukolele palutu?

¹⁷ Ino efa okuhe na oukolele ku ku teye omukumo noku ku diladilife kutya ito dulu okutondoka mondjila oyo tai twala komwenyo  waalushe. Jehova oku ku hole omolweitavelo loye, naashishe osho we mu longela momukokomoko womido adishe odo. Owa pumbwa ekwafo laye shi dulife nale noite ke ku efa nandenande. (Eps. 9:10) Ponhele yaasho, ota ka ehena popepi elela naave. Didilika osho omumwameme umwe, oo a li ta ungaunga neshongo li sha na noukolele, a ti: “Molwaashi onda li nda nyika panga apa, kanda li naanaa handi mono omhito yokuudifila vakwetu. Ashike ondi shii kutya nokuli neenghendabala dinini ohadi hafifa Jehova, naasho ohashi hafifa nge.” Ngeenge owa teka omukumo, dimbuluka kutya haave auke. Dimbuluka oshihopaenenwa osho sha tulwa po kuPaulus nosho yo eendjovo daye detwomukumo odo tadi ti: “Ohandi kala nda hafa ngeenge ndi na oungone, . . . Osheshi ngeenge ndi li oshingone, ohandi kala omunaenghono.” — 2 Kor. 12:10.

18. Eshongo limwe la kwata moiti lilipi vamwe va taalela?

¹⁸ Vamwe ovo tava tondoka mondjila oyo tai twala komwenyo waalushe ova taalela eshongo limwe vali. Otashi dulika tava ungaunga neenghalo dopaumwene odo vamwe vehe wete novehe udite ko. Pashihopaenenwa, otashi dulika tava ungaunga nepolimano ile va wililwa po koisho. Omolwashike ovapiya vaJehova va tya ngaho va taalela omashongo a kwata moiti? Omolwaashi ngeenge umwe a teka okwooko ile e li kokatemba keshe umwe oha kala e wete oupyakadi waye notashi dulika shi ve linyengife ve mu kwafele. Ashike ovo tava ungaunga nomukifi wopamaliudo ile wopamadiladilo ihava kala ve na omadidiliko e wetike. Ove li monghalo idjuu ngaashi ashike omunhu oo a teka okwooko ile okuulu. Molwaashi ovanhu kave wete kutya otava mono oixuna, otashi dulika vehe va ulikile ohole ile vehe va file oshisho.

19. Oshike hatu lihongo moshihopaenenwa shaMefiboset?

¹⁹ Ngeenge ou na omangabeko nou udite kutya vamwe kave udite ko onghalo yoye, oto dulu okupamekwa koshihopaenenwa shaMefiboset. (2 Sam. 4:4) Okwa li oshingudu nokwa li a ungaungiwa naye nai kohamba David. Mefiboset ka li e na epuko eshi a ningilwa oinima oyo. Ka li a efa a kale e na etaleko lii li na sha naasho, ndele okwa li e na olupandu omolwoinima iwa oyo a ningilwa monghalamwenyo yaye. Okwa li a ulika olupandu omolwolukeno olo a ulikilwa kuDavid monakudiwa. (2 Sam. 9:6-10) Eshi David a ungaunga naye nai, Mefiboset okwa li a diladila kwaashishe osho sha kwatelwa mo. Ka li a pitika epuko laDavid li mu handukife. Ina pa Jehova ombedi omolwepuko laDavid. Mefiboset okwa li a yandja elitulemo kwaasho ta dulu okuninga opo a yambidide ohamba oyo ya nangekwa po kuJehova. (2 Sam. 16:1-4; 19:24-30) Jehova okwa shangifa oshihopaenenwa sha denga mbada shaMefiboset mEendjovo daYe omolwouwa wetu. — Rom. 15:4.

20. Oisho ohai kumu vamwe ngahelipi, ndele otava dulu okukala ve na elineekelo lilipi?

 ²⁰ Ovamwatate novamwameme vamwe ohava kala va tila noihava kala va manguluka omolwoisho ngeenge ve li navamwe. Otashi dulika hava mono shidjuu okukala mongudu yovanhu vahapu, ashike nande ongaho ohava twikile okukala pokwoongala nosho yo poyoongalele inini naai ya kula. Ohashi kala eshongo kuvo okupopya novanhu ovo vehe shii, ashike ohava popi novanhu moukalele. Ngeenge naave ou li monghalo ya tya ngaho, shilipalekwa kutya haave auke. Vahapu otava kondjo nonghalo ya tya ngaho. Dimbuluka kutya eenghendabala odo to ningi nomutima aushe ohadi hafifa Jehova. Molwaashi ino sholola, osho otashi ulike kutya Jehova ote ku nangeke noupuna note ku pe eenghono odo wa pumbwa. * (Fil. 4:6, 7; 1 Pet. 5:7) Ngeenge oto longele Jehova nonande oto lididimikile ouyehame wopalutu ile owopamaliudo, oto dulu okukala nelineekelo kutya oto hafifa Jehova.

21. Oshike osho atushe hatu dulu okuninga kekwafo laJehova?

²¹ Ope na eyooloko pokati kokutondoka kwovenevene naako kwa popiwa kuPaulus. Okutondoka kwovenevene oko kwa li haku ningwa pefimbo Ombiibeli ya li tai shangwa, omunhu ashike umwe ha mono ondjabi. Mepingafano naasho, keshe oo te lididimike noudiinini mefiyafano lOvakriste loku ka mona omwenyo ota ka mona ondjabi yomwenyo waalushe. (Joh. 3:16) Mefiyafano lokutondoka lo venevene, ovatondoki aveshe ove na okukala ve na oukolele wopalutu, nongeenge hasho, itava ka findana nandenande. Mepingafano naasho, vahapu vomufye ove na omangabeko opalutu, ashike ohatu lididimike. (2 Kor. 4:16) Kekwafo laJehova, atushe ohatu dulu okutondoka mefiyafano olo fiyo okefikilo.