Omolwashike Jesus a tofa eendjovo daDavid odo tadi hangwa mEpsalme 22:1 ofimbo ina fya?

Dimwe domeendjovo daJesus daxuuninwa odo a popya ofimbo ina fya, otadi hangwa muMateus 27:46, odo tadi ti: “Kalunga kange, Kalunga kange, omolwashike wa ekela nge shi?” Eshi Jesus a popya ngaho, okwa wanifa po eendjovo domupsalme David odo tadi hangwa mEpsalme 22:1. (Mark. 15:34) Osha puka okufika pexulifodiladilo kutya eshi Jesus a tofa eendjovo odo okwa li a nyemata, ile a kanifa eitavelo pakafimbo. Jesus okwa li e shii filufilu kutya omolwashike a li e na okufya nokwa li a halelela oku shi ninga. (Mat. 16:21; 20:28) Okwa li yo e shii kutya eshi ta ka fya, Jehova ite ke mu amena “keembinga adishe.” (Job 1:10) Jehova ka li a amena Jesus, opo Jesus a dule okuulika kutya ota dulu okukala omudiinini, kashi na nee mbudi kutya okwa li a taalela efyo la fa peni. — Mark. 14:35, 36.

Omolwashike Jesus a tofa eendjovo domupsalme? Nonande itatu dulu oku shi koleka, natu ka taleni komatomheno amwe oo tashi dulika e mu ningifa. *

Mbela Jesus okwa li a tofa eendjovo odo opo a ulike kutya Jehova ita ka ya mo olunyala mefyo laye? Jesus okwa li e na okuyandja ekuliloyambo nopehe na ekwafo laJehova. Okwa li e na olutu lopanhu nokwa li e na okufya, opo “a lole efyo ponhele yaaveshe.” — Heb. 2:9.

Mbela eshi Jesus a tofa eendjovo dinini depsalme olo okwa li a hala ovanhu va yandje elitulemo kepsalme alishe? Osha li onghedindjikilile kOvajuda pefimbo opo okukala ve shii omapsalme  mahapu momutwe. Ngeenge ova udu ovelishe imwe yepsalme, ohava dimbuluka epsalme alishe. Ngeenge Jesus osho a li ta diladila ngaho, kungaho okwa kwafela Ovajuda va dule okudimbuluka omaxunganeko mahapu e na sha nepsalme olo, olo la tumbula oiningwanima imwe oyo ya li tai ka ningwa pefyo laye. (Eps. 22:7, 8, 15, 16, 18, 24) Shikwao vali, eevelishe dopexulilo lepsalme olo oda tanga Jehova noku mu popya e li Ohamba yedu alushe. — Eps. 22:27-31.

Mbela eshi Jesus a tofa eendjovo daDavid okwa li ta ulike kutya ke na ondjo? Fimbo Jesus ina fya, okwa li e lididimikila etamaneko lihe li pauyuki nokwa monika ondjo, molwaashi va ti e li omusheki. (Mat. 26:65, 66) Omhangu yoPombada oya li ya ongala mokati koufiku noku mu pangula nopehe na okushikula omifikamhango dopaveta. (Mat. 26:59; Mark. 14:56-59) Molwaashi Jesus ka li e na osho a ninga sha puka shoku mu dipaifa, okwa li a pula ta ti: “Kalunga kange, Kalunga kange, omolwashike wa ekela nge shi?”

Mbela Jesus okwa li yo ta dimbulukifa ovanhu kutya nonande David, oo a shanga epsalme olo, okwa li a efiwa a mone oixuna, osho inashi hala kutya Jehova ine mu hokwa vali? David eshi a pula epulo inashi hala kutya ka li vali e na eitavelo muKalunga. Konima eshi a pula epulo, okwa popya kutya oku na elineekelo kutya Jehova ote ke va xupifa, na Jehova okwa kala noku mu nangeka noupuna. (Eps. 22:23, 24, 27) Sha faafana, nonande Jesus, oo e li “Omona waDavid,” okwa li ta mono oixuna komuti womahepeko, osho inashi hala kutya Jehova ka li vali e mu hokwa. — Mat. 21:9.

Mbela Jesus okwa li ta popi a nyika oluhodi a ulike kutya Jehova ka li e mu amena, opo a dule okuulika filufilu kutya omudiinini? Kasha li elalakano laJehova lopehovelo opo Omona waye a mone oixuna nokufya. Osho osha etifwa po ashike kounashibofa waAdam naEva. Jesus ka li a nyona sha, ashike okwa li e na okumona oixuna nokufya, opo epulo olo la etifwa po kuSatana li nyamukulwe noku yandje ongushu yekulilo li li ofuto yokwaalulila osho sha li sha kanifwa kovanhu. (Mark. 8:31; 1 Pet. 2:21-24) Osho osha li ashike tashi dulu okuningwa ngeenge Jehova okwa kala ina amena Jesus oule wokafimbo, oshinima osho sha li inashi ningwa nande onale monghalamwenyo yaye.

Mbela Jesus okwa li ta kendabala okukwafela ovashikuli vaye va mone kutya omolwashike Jehova e mu efa a fye monghedi ya tya ngaho? * Jesus okwa li e shii kutya okudipawa e li onga omukolokoshi komuti womahepeko otashi ka pundukifa vahapu. (1 Kor. 1:23) Ngeenge ovashikuli vaye ova yandje elitulemo ketomheno lashili lefyo laye, otava ka uda ko kutya omolwashike a li e na okufya monghedi ya tya ngaho. (Gal. 3:13, 14) Osho otashi ke va kwafela ve mu tale ko e li Omuxupifi, ndele hamukolokoshi.

Kashi na nee mbudi kutya Jesus okwa tofa eendjovo odo netomheno lilipi, okwa li e shii kutya ota wanifa po ehalo laJehova okutala keenghalo odo a li ta piti mudo. Konima eshi Jesus a tofa eendjovo depsalme okwa popya a ti: “Osha wanifwa.” (Joh. 19:30; Luk. 22:37) Oshoshili kutya eshi Jehova ina amena Jesus pakafimbo, osha kwafela Jesus a wanife po filufilu ashishe osho a li a tuminwa a longe kombada yedu. Oshe mu pa yo omhito a dule okuwanifa po oinima aishe oyo ya shangwa kombinga yaye “mOmhango yaMoses, momambo Ovaprofeti nomOmapsalme.” — Luk. 24:44.