1. Omolwashike hatu yandje omatyekosha pokwoongala?

 OMOLWASHIKE hatu kala pokwoongala kweongalo? Ohatu kala po, opo tu tange Jehova. (Eps. 26:12; 111:1) Ohatu kala yo pokwoongala, opo tu twaafane omukumo momafimbo aa madjuu. (1 Tes. 5:11) Ngeenge otwa aneke nokuyandja etyekosha, kungaho ohatu wanifa po oinima oyo yopavali.

2. Eemhito dilipi tu na dokuyandja omatyekosha pokwoongala?

² Oshivike keshe ohatu kala tu na eemhito dokuyandja omatyekosha pokwoongala kwetu. Pashihopaenenwa, momaxuliloshivike ohatu dulu okukufa ombinga mekonakono lOshungonangelo. Pokwoongala kwetu kwomokati koshivike, otashi dulika tu yandje omatyekosha pefimbo leenghundafana domamona opamhepo, pEkonakonombiibeli lEongalo nosho yo moitukulwa vali ikwao yeenghundafana novapwilikini.

3. Omashongo elipi tashi dulika tu shakeneke, nongahelipi Ovaheberi 10:24, 25 tava dulu oku tu kwafela?

³ Atusheni otwa hala okutanga Jehova nokutwa ovaitaveli vakwetu omukumo. Ashike ngeenge hatu yandje etyekosha, otashi dulika tu shakeneke omashongo. Otashi dulika tu kale twa tila okuyandja etyekosha. Ile otashi dulika tu kale twa halelela okukufa ombinga luhapu, ashike omafimbo amwe ihatu tumbulwa. Ongahelipi hatu dulu okuungaunga nomashongo oo? Osho omuyapostoli Paulus a shangela Ovaheberi otashi tu kwafele tu mone enyamukulo kepulo olo. Eshi a li ta kundafana nghee sha fimana okwoongala pamwe, okwa ti kutya otu na okuyandja elitulemo ‘kokutwaafana omukumo.’ (Lesha Ovaheberi 10:24, 25.) Itatu ka kala twa tila unene okuyelula eke letu, ngeenge otwa dimbuluka kutya ohatu dulu okutwa vamwe omukumo netyekosha letu li li paunafangwa, olo tali ulike eitavelo letu. Ngeenge ihatu tumbulwa luhapu, ohatu dulu okukala twa hafa, eshi vamwe meongalo va mona omhito yokuyandja etyekosha. — 1 Pet. 3:8.

4. Oitwa itatu ilipi tai ka kundafanwa moshitukulwa eshi?

 ⁴ Moshitukulwa eshi, tete ohatu ka kundafana nghee hatu dulu okutwaafana omukumo meongalo linini, omo mu na omuvalu wovakufimbinga wa ngabekwa. Opo nee ohatu ka kundafana nghee hatu dulu okutwaafana omukumo meongalo la kula, omo mu na ovakufimbinga vahapu. Xuuninwa, ohatu ka kundafana nghee hatu dulu okutwa vamwe omukumo okupitila mwaasho hatu popi, ngeenge hatu yandje etyekosha.

5. Ongahelipi hatu dulu okutwaafana omukumo, ngeenge meongalo omu na ovanhu vanini?

⁵ Meongalo linini, ile mongudu, ihamu kala ovanhu vahapu va yelula omake, opo oo ta kwatele komesho a dule okuhoolola po umwe. Omafimbo amwe, otashi dulika a pumbwa okuteelela efimbo lile, opo umwe a yelule eke laye a yandje etyekosha. Okwoongala otashi dulika ku kale taku monika kufifa oudja noitaku tu omukumo nandenande. Oshike to dulu okuninga po? Kala u na ehalo okuyelula eke loye luhapu. Ngeenge owa ningi ngaho, otashi dulika u linyengife vamwe navo va kufe ombinga luhapu.

6-7. Ongahelipi hatu dulu okuninipika oshisho keshe osho tu na shi na sha nokuyandja omatyekosha?

⁶ Ongahelipi ngeenge ohatu kala twa tila, ngeenge hatu diladila okuyandja etyekosha? Ovanhu vahapu ohava kala ve udite ngaho. Ashike opo tu twe ovamwatate novamwameme omukumo neenghono, otwa pumbwa okutala eenghedi omo hatu dulu okuninipika oshisho shetu shi na sha nokuyandja omatyekosha. Ongahelipi hatu dulu okuninga ngaho?

⁷ Otashi dulika u mone tashi kwafele okutalulula omaetepo amwe, oo e li moitukulwa yOshungonangelo ya tetekela. b Pashihopaenenwa, lilongekida nawa. (Omayel. 21:5) Ngeenge owa kala u shii nawa oshikundafanwa, otashi ka kala shipu kwoove okuyandja etyekosha. Shikwao vali, omatyekosha oye naa kale e li pauxupi. (Omayel. 15:23; 17:27) Ito ka kala wa tila unene, ngeenge owa yandje enyamukulo li li pauxupi. Enyamukulo li li pauxupi, tashi dulika la kwatela mo etumbulo limwe, ile avali, otashi dulika li udiwe ko nawa kovamwatate novamwameme li dulife enyamukulo lile nola kwatela mo omadiladilo mahapu. Ngeenge owa yandje enyamukulo li li pauxupi to longifa oitya yoye mwene, oto ka ulika kutya owe lilongekida nawa nou udite ko nawa oshikundafanwa.

8. Jehova oha tale ko ngahelipi eenghendabala detu da mana mo?

⁸ Ongahelipi ngeenge owa kendabala amwe omomaetepo oo, ndele natango oho kala wa tila okuyandja etyekosha lumwe, ile luvali? Kala u na oushili kutya Jehova okwa lenga eenghendabala doye tadi di komutima dokuninga ngaashi to dulu. (Luk. 21:1-4) Okuyandja osho sha denga mbada inashi hala okutya ou na okulidipaela po. (Fil. 4:5) Tala kutya oshike to dulu okuninga, litulila po elalakano loku shi ninga nokwiilikana, opo u kale wa ngungumana. Elalakano olo nali kale okuninga etyekosha li li pauxupi.

9. Eshongo lilipi tashi dulika li holoke po meongalo la kula?

⁹ Ngeenge eongalo leni oli na ovaudifi vahapu, otashi dulika wa taalela eshongo li lili. Otashi dulika ovamwatate novamwameme vahapu hava ulike, opo va yandje omatyekosha, naasho ohashi ningifa uha tumbulwe luhapu. Pashihopaenenwa, Danielle, okwa li ha hafele okuyandja omatyekosha pokwoongala. c Okwa li e shi  tala ko shi li oshitukulwa shelongelokalunga laye, onghedi yokutwa vamwe omukumo nosho yo onghedi yokufindila momadiladilo aye oshili yOmbiibeli. Ndele eshi a li a tembukila keongalo la kula, ka li vali ha tumbulwa naanaa, nomafimbo amwe, okwoongala ohaku lipwile ko ina pewa omhito. Okwa ti: “Osha li hashi udifa nge nai. Onda li ndi udite nda kufwa oufembanghenda. Ngeenge otashi ningwa lwoikando, oho hovele okulipula ngeenge otashi ningilwa owina.”

10. Ongahelipi hatu dulu okuhapupalifa eemhito detu dokuyandja etyekosha?

¹⁰ Mbela naave oho kala u udite ngaashi Danielle a li ha kala e udite? Ngeenge osho, otashi dulika u kwatwe keamo lokweefa po okukufa ombinga pokwoongala nokukala ashike to pwilikine. Ashike ino efa po okukendabala okuyandja etyekosha. Oshike to dulu okuninga po? Oto dulu okukala ho lilongekida omatyekosha mahapu pokwoongala keshe. Opo ngeenge ino tumbulwa pehovelo loshitukulwa, natango ou na omhito yokuyandja omatyekosha momukokomoko wokwoongala. Ngeenge to lilongekidile ekonakono lOshungonangelo, diladila nghee okatendo keshe ka pambafana nenenediladilo loshitukulwa. Ngeenge owa ningi ngaho, oto ka kala u na omatyekosha mawa, oo to dulu okuyandja. Shikwao vali, oto dulu okulilongekida omatyekosha poutendo ovo va kundafana oshili yomoule oyo idjuu okuyelifa. (1 Kor. 2:10) Omolwashike? Omolwaashi poutendo ovo, otashi dulika ovanhu ashike vanini va ulike. Ongahelipi ngeenge owa tula moilonga omaetepo aeshe oo, ndele owa mona kutya natango opa pita omakwoongala mahapu, ashike ino mona omhito yokuyandja etyekosha? Oto dulu okupopya naao ta kwatele komesho ofimbo okwoongala inaku hovela noku mu lombwela epulo olo wa hala oku ka nyamukula.

11. Ovafilippi 2:4, otave tu ladipike tu ninge shike?

¹¹ Lesha Ovafilippi 2:4. Omuyapostoli Paulus okwa nwefwa mo a ladipike Ovakriste va lalakanene ouwa wavamwe. Ongahelipi hatu dulu okutula moilonga omayele oo pefimbo lokwoongala? Dimbuluka kutya vamwe navo ova hala okukufa ombinga ngaashi ashike ove.

12. Omonghedi ya denga mbada ilipi hatu dulu okutwa vamwe omukumo pokwoongala? (Tala yo efano.)

¹² Shi talela mefano eli. Ngeenge to ningi eenghundafana nookaume koye, mbela oho kala to popi unene noiho va pe omhito yokupopya?  Hasho nandenande! Owa hala navo va kufe ombinga meenghundafana. Sha faafana, otwa hala ovanhu vahapu va yandje omatyekosha pokwoongala ngaashi tashi dulika. Naasho oshi li onghedi ya denga mbada yokutwa omukumo ovamwatate novamwameme moku va pa omhito va hepaulule eitavelo lavo. (1 Kor. 10:24) Natu ka taleni kutya ongahelipi hatu dulu okuninga ngaho.

13. Ongahelipi hatu dulu okupa ovapwilikini vahapu omhito va yandje omatyekosha?

¹³ Shotete, ohatu dulu okukaleka omatyekosha etu e li pauxupi, nokungaho, ohatu ka pa vahapu omhito va kufe ombinga. Ovakulunhuongalo nosho yo ovaudifi ovo va pyokoka otava dulu okutula po oshihopaenenwa shi na sha naasho. Nokuli nongeenge to yandje etyekosha lixupi, henuka okupopya oitwa ihapu. Ngeenge owa popi ashishe osho shi li mokatendo, vakweni itava ka kala ve na sha shokutya. Pashihopaenenwa, mokatendo omu omwa etwa omaetepo avali, okukaleka omatyekosha etu pauxupi nosho yo okuhenuka okupopya oitwa ihapu. Ngeenge oove wa pewa tete omhito u yandje etyekosha mokatendo omu, omolwashike ito tumbula po ashike oshitwa shimwe shomuyo?

14. Oshike tashi dulu oku tu kwafela tu tokole kutya olungapi tu na okwaaneka? (Tala yo efano.)

¹⁴ Longifa eendunge dokuyoolola, ngeenge to tokola kutya olungapi u na okuyandja etyekosha. Ngeenge otwa kala hatu aneke unene luhapu, otashi dulika tu ningife oo ta kwatele komesho a diladile kutya okwa pumbwa oku tu tumbula luhapu, nokuli nonande vamwe inava mona natango omhito yokutyasha. Osho otashi dulu okuteya vamwe omukumo vaha yelule vali omake avo. — Omuud. 3:7.

15. (a) Otu na okulinyenga ngahelipi, ngeenge otwa aneke, ndele inatu tumbulwa tu yandje etyekosha? (b) Ongahelipi ovo hava kwatele komesho tava dulu okuyandja elitulemo kovanhu aveshe? (Tala oshimhungu “ Ngeenge to kwatele komesho.”)

¹⁵ Ngeenge ovaudifi vahapu ova yelula omake avo pefimbo lekonakono, otashi dulika tuha mone eemhito dihapu tu yandje omatyekosha ngaashi twa hala. Omafimbo amwe, oo ta kwatele komesho otashi dulika ehe tu tumbule  nandenande. Osho otashi dulu oku tu udifa nai, ashike otu na okukendabala tuha ude nai, ngeenge inatu tumbulwa. — Omuud. 7:9.

16. Ongahelipi hatu dulu okutwa omukumo ovo va yandja omatyekosha?

¹⁶ Ngeenge ino mona omhito yokuyandja omatyekosha luhapu ngaashi wa li wa hala, omolwashike ito pwilikine noukeka, eshi vamwe tava kufa ombinga, opo u dule oku va pandula konima yokwoongala omolwomatyekosha avo? Ovamwaxo otava ka tuwa omukumo, ngeenge owe va pandula, ngaashi ashike hava tuwa omukumo komatyekosha oye. (Omayel. 10:21) Okupandula vamwe oku li onghedi imwe omo hatu dulu okutwaafana omukumo.

17. (a) Ongahelipi ovadali tava dulu okukwafela ovana vavo va yandje omatyekosha taa wapalele? (b) Metwokumwe nokavidio, eenghatu dopane dilipi ve na okukatuka, opo ve lilongekidile etyekosha? (Tala yo eshangelo lopedu.)

¹⁷ Ongahelipi vali hatu dulu okutwaafana omukumo pokwoongala kwetu? Ngeenge ou li omudali, kwafela ounona voye ve lilongekidile oku ka yandja omatyekosha she likolelela komido davo. (Mat. 21:16) Omafimbo amwe, pokwoongala ohapa kundafanwa oikundafanwa ya kwata moiti, ngaashi omaupyakadi omohombo, ile oinima i na sha neenghedi, ndele otashi dulika mu kale okatendo kamwe, ile vavali  omo okaana taka dulu okuyandja etyekosha. Shikwao vali, kwafela ounona voye va ude ko kutya omolwashike tashi dulika vaha tumbulwe pomhito keshe va ulika. Ngeenge owe va yelifile ngaho, itava ka uda nai, ngeenge vamwe ovo va tumbulwa ponhele yavo. — 1 Tim. 6:18. d

18. Ongahelipi hatu dulu okuhenuka okuyukifa elitulemo kufye vene, ngeenge hatu yandje omatyekosha? (Omayeletumbulo 27:2)

¹⁸ Atusheni ohatu dulu okulilongekida omatyekosha taa ti sha, oo taa fimanekifa Jehova notaa tu omukumo Ovakriste vakwetu. (Omayel. 25:11) Nonande omafimbo amwe otashi dulika tu yandje oshimoniwa shopaumwene shi li pauxupi, otu na okuhenuka okupopya unene kombinga yetu vene. (Lesha Omayeletumbulo 27:2; 2 Kor. 10:18) Ponhele yaasho, otu na okukendabala okuyandja elitulemo kuJehova, kEendjovo daye nosho yo koshiwana shaye ashishe. (Eh. 4:11) Ashike ngeenge epulo lokatendo otali pula tu yandje oshimoniwa shetu shopaumwene, osha yuka okuninga ngaho. Oshihopaenenwa shi na sha naasho otashi hangwa mokatendo taka shikula ko moshitukulwa eshi.

19. (a) Otashi ka eta oidjemo ilipi, ngeenge otwa ulike kutya otu na ko nasha naaveshe ovo ve li pokwoongala? (Ovaroma 1:11, 12) (b) Oshike wa pandula paumwene shi na sha nokuyandja omatyekosha pokwoongala?

¹⁹ Nonande kape na eemhango tadi dengele di na sha nokuyandja omatyekosha, atusheni ohatu dulu okukendabala, opo omatyekosha etu a kale taa tu omukumo. Osho osha hala okutya okukala hatu kufa ombinga luhapu. Ile tu kale twa wanenwa keemhito odo twa mona dokuyandja omatyekosha nokukala yo twa hafa, eshi vakwetu navo va mona omhito yokuninga ngaho. Ngeenge otwa yandje elitulemo kouwa wavamwe pokwoongala kweongalo, atusheni ohatu ka “twaafaneni omukumo.” — Lesha Ovaroma 1:11, 12.