1. Oparadisa yopamhepo oshike, notwa tokola toko okuninga shike?

 KUNENA, kombada yedu oku na oparadisa omo mu yadi ovanhu ve lipyakidila nokulonga oinima iwa. Oi yadi ovanhu omamiliyona ovo ve na ombili yashili. Ovo ve li nale moparadisa oyo ova tokola toko okuhadja mo nandenande. Ova hala yo ovanhu vahapu ngaashi tashi dulika ve va waimine momudingonoko oo we likalekelwa. Omudingonoko oo oshike? Oo oparadisa yopamhepo. a

2. Oshike shididilikwedi shi na sha noparadisa yopamhepo?

² Jehova okwa shita onhele yopafaneko omo oshiwana shaye she lipyakidila tashi longo oilonga iwa, nonande oshi li mounyuni waSatana woukolokoshi nowa nyika oshiponga, omo ovanhu ve tondafane. (1 Joh. 5:19; Eh. 12:12) Kalunga ketu oku wete nghee ounyuni hau nyemateke ovanhu, ashike okwa ningifa oshiwana shaye shi kale shi udite shi li meameno, opo shi dule okutwikila oku mu longela nehafo. Eendjovo daye oda popya oparadisa yopamhepo i li ‘eameno’ nosho yo “oshikunino shitalala sha tekelwa shili.” (Jes. 4:6; 58:​11, KB-13) Kekwafo laJehova, ovo ve li moparadisa oyo ova hafa nove udite ve li meameno pefimbo eli lidjuu lomafiku axuuninwa. — Jes. 54:14; 2 Tim. 3:1.

3. Ongahelipi exunganeko olo li li muJesaja etukulwa 65 la li la wanifwa oshikando shotete?

³ Okupitila momuprofeti Jesaja, Jehova okwa li a popya kutya oparadisa yopamhepo otai ka kala ya tya ngahelipi. Oto dulu okumona eendjovo odo muJesaja etukulwa 65, odo da li da wanifwa  oshikando shotete mo 537 K.O.P. Pefimbo opo, Ovajuda ovo ve livela ombedi ova li va mangululwa moukwatwa waBabilon nova li va shuna keduumbo lavo. Jehova okwa li a nangeka noupuna oshiwana shaye noku shi kwafela shi wapekulule vali oshilando Jerusalem, osho sha li sha hanaunwa po, nokutungulula otembeli yasho, oyo ya li ondingandinga yelongelokalunga muIsrael. —Jes. 51:11; Sak. 8:3.

4. Ongahelipi exunganeko olo li li muJesaja 65 tali wanifwa kunena?

⁴ Ewanifo etivali lexunganeko laJesaja ola li la hovela okuwanifwa mo 1919 O.P., eshi oshiwana shaJehova shokunena sha li sha mangululwa moukwatwa waBabilon Shinene. Konima yaasho, oparadisa yopamhepo oya li ya enda tai lihanene kombada yedu alishe. Ovaudifi ovaladi vOuhamba ova li va tota po omaongalo mahapu nokuulika omaukwatya opaKriste. Ovalumenhu novakainhu ova li va efa po elihumbato inali koshoka nosho yo elongifo leenghono nova li va djala “omunhu mupe oo a shitwa metwokumwe nehalo laKalunga.” (Ef. 4:24) Omanangeko noupuna mahapu oo Jesaja a popya otaa ka wanifwa paulelalela mounyuni mupe. Ashike nokuli nopaife ohatu mono ouwa meenghedi dihapu mokukala moparadisa yopamhepo. Natu ka taleni nghee oparadisa yopamhepo ye tu kuma nosho yo kutya omolwashike tuhe na okudja mo muyo nandenande.

NGHEE OVO VE LI PARADISA YOPAMHEPO VE UDITE

5. Ngaashi sha udanekwa muJesaja 65:​13, oshike hatu hafele moparadisa yopamhepo?

⁵ Ova palulwa nawa oku shi popya pafaneko nova talalekwa. Exunganeko laJesaja ola ulika eyooloko la kula olo li li pokati kaavo ve li meni loparadisa yopamhepo nosho yo ovo ve li kondje yayo. (Lesha Jesaja 65:​13, KB-13.) Jehova oha pe ovalongeli vaye ashishe osho va pumbwa, opo va kale popepi naye. Otu na omhepo yaye iyapuki, Eendjovo daye nosho yo eendja dopamhepo da henena, opo tu dule ‘okulya, okunwa nokukala twa hafa.’ (Yelekanifa Ehololo 22:17.) Ashike onghalo oya yooloka ko filufilu kwaavo vehe li moparadisa yopamhepo. ‘Ova fya ondjala, va fya enota notava ka fifwa ohoni.’ Kave na ekwatafano naKalunga. — Amos 8:11.

6. Ongahelipi Joel 2:​21-24 a yelifa omafiloshisho etu opamhepo, nongahelipi taa dulu oku tu etela ouwa?

⁶ Mexunganeko laye, Joel okwa longifa oinima oyo ya pumbiwa ngaashi oilya, omaviinyu nosho yo omaadi eemono, opo a ulike nghee Jehova ha pe oshiwana shaye osho sha pumbwa, mwa kwatelwa eendja dopamhepo. (Joel 2:​21-24) Pashihopaenenwa, okwe tu pa Ombiibeli nosho yo oishangomwa oyo ya kanghamena kuyo, epandja letu lokointaneta, okwoongala, oyoongalele inini naayo ya kula. Ohatu dulu okumona ouwa momafiloshisho oo efiku keshe, noshidjemo, otwa palulwa nawa, oku shi popya pafaneko, notwa talalekwa.

7. Oshike hashi tu pe “ehafo lokomutima”? (Jesaja 65:​14, KB-13)

⁷ Ova hafa nova wanenwa. Oshiwana shaKalunga otashi dulu ‘okukuwilila kehafo,’ molwaashi omitima dasho otadi xunga kolupandu. (Lesha Jesaja 65:​14, KB-13.) Oshili tai pameke eitavelo, omaudaneko taa hekeleke, oo e li mEendjovo daKalunga, neteelelo la twa, olo la kanghamena kekuliloyambo laKristus, ohai tu pe “ehafo lokomutima.” Ngeenge hatu popi oinima oyo novamwatate novamwameme, ohashi tu hafifa lela. — Eps. 34:8; 133:​1-3.

8. Oinima ivali ya fimanenena ilipi i li moparadisa yopamhepo?

⁸ Ohole nosho yo oukumwe, oo u li mokati koshiwana shaJehova, oi li oinima ivali ya fimanenena oyo i li moparadisa yopamhepo. ‘Okuhangana’ kwa tya ngaho ohaku tu  kwafele tu diladile kunghee ounyuni mupe tau ka kala, omo oshiwana shaJehova tashi ka hafela nokuli ohole inene nosho yo oukumwe u dule oo tashi hafele kunena. (Kol. 3:14) Omumwameme umwe okwa popya osho a didilika kombinga yoshiwana shaJehova, eshi a shakena nasho oshikando shotete, a ti: “Kanda li handi kala nda hafa, nokuli nomoukwaneumbo wetu inandi mona mo nale ehafo. Oshikando shotete nda li nda mona ovanhu tava ulikilafana ohole, osheshi nda li nda shakena nEendombwedi daJehova.” Keshe oo a hala okukala a hafa shili nokwa wanenwa, okwa pumbwa okukala moparadisa yetu yopamhepo. Kashi na nee mbudi kutya ounyuni otau diladila ngahelipi kombinga yovapiya vaJehova, ove liningila edina liwa kuJehova nokwaaveshe ovo have mu longele. — Jes. 65:15.

9. Jesaja 65:​16, 17 okwa udaneka shike shi na sha noinima oyo hai tu ehameke noku tu monifa oixuna kunena?

⁹ Ova ngungumana. Jesaja 65:14 okwa popya kutya ovo va hoolola okukala kondje yoparadisa yopamhepo otava “kuwaana komahepeko omomutima [notava] kwena molwomhepo ya teyauka.” Ndele ongahelipi shi na sha noinima aishe oyo hai yahameke nokumonifa oixuna oshiwana shaKalunga? Mokweendela ko kwefimbo, oinima oyo otai ka ‘dimbuwa nokuholekwa omesho aKalunga.’ (Lesha Jesaja 65:​16, 17, KB-13.) Jehova ota ka kufa po omaupyakadi etu, nokungaho, itatu ka dimbuluka nokuli nghee omaupyakadi oo a li e tu kuma.

10. Omolwashike u udite kutya oshi li enangeko noupuna okweendafana novamwatate novamwameme? (Tala yo efano.)

¹⁰ Nokuli nopaife ohatu kala tu udite twa ngungumana, ngeenge tu li pokwoongala kwopaKriste noihatu yandje elitulemo koinima oyo tai dulu oku tu etela oisho mounyuni ou woukolokoshi. Ohatu kwafele yo ovamwatate novamwameme va kale va ngungumana, ngeenge hatu ulike omaukwatya oo e li oshiimati shomhepo, ngaashi ohole, ehafo, ombili, onheni nosho yo omwenyo muwa. (Gal. 5:​22, 23) Otwa pandula neenghono, eshi tu li mehangano laJehova. Ovo ve li moparadisa yopamhepo otava ka mona ewanifo le lixwa po leudaneko laKalunga li na sha ‘neulu lipe nedu lipe.’

11. Metwokumwe naJesaja 65:​18, 19, oparadisa oyo ya totwa po kuJehova oye tu kuma ngahelipi?

¹¹ Ove na olupandu nova tunhukwa. Jesaja okwa popya kutya omolwashike tu na ‘okukuwilila nokunyakukilwa’ oparadisa yopamhepo. Oparadisa oyo oya totwa po kuJehova. (Lesha Jesaja 65:​18, 19, KB-13.) Onghee itashi kumwifa eshi he tu longifa, opo tu kwafele ovanhu va fiye po omahangano omounyuni ou,  oo ihaa hongo ovanhu oshili kombinga yaKalunga, noku va kwafela va ninge oshitukulwa shoparadisa yetu yopamhepo. Otwa tunhukwa omolwomanangeko noupuna oo hatu hafele molwaashi tu li moshili, naasho ohashi tu linyengifa tu lombwele vamwe kombinga yao. — Jer. 31:12.

12. Omaudaneko oo a popiwa muJesaja 65:​20-24, okwe ku ningifa u kale u udite ngahelipi, nomolwashike?

¹² Otwa pandula yo notwa tunhukwa omolweteelelo olo tu na, eshi tu li ovakalimo vomoparadisa yopamhepo. Diladila ashike koinima aishe oyo hatu ka mona nohatu ka ninga mounyuni mupe waKalunga! Ombiibeli oya udaneka ya ti: “Musho itamu hangika okahanana komafiku manini nomushamane ina wanifa omafiku aye.” Ohatu ka ‘dika omaumbo ndele hatu kala mo, ndele hatu twike oikokola yomiviinyu, ndele hatu li oiimati yayo.’ Itatu ke “lihepeka epwanga,” molwaashi otwa “nangekwa noupuna kOmwene.” Okwe tu udanekela onghalamwenyo ya amenwa, ihafifa noi na elalakano lashili. “Ndele fimbo inava ifana,” ota ka kala e shii omhumbwe yakeshe umwe nota ka “palula oinamwenyo aishe kohokwe” yaye. — Jes. 65:​20-24, KB-13; Eps. 145:​16, KB-13.

13. Jesaja 65:25 okwa hokolola ngahelipi omalunduluko oo ovanhu va ninga meenghalamwenyo davo, eshi va hovela okulongela Jehova?

¹³ Ove na ombili nove li meameno. Kekwafo lomhepo yaKalunga, vahapu ovo va li nale ve na omaukwatya a fa oinamwenyo ova ninga omalunduluko a didilikwedi meenghalamwenyo davo. (Lesha Jesaja 65:25.) Ova longa noudiinini, opo va efe po omaukwatya avo mai. (Rom. 12:2; Ef. 4:​22-24) Natango, oshiwana shaKalunga inashi wanenena, onghee ohatu twikile okuninga omapuko. Ashike Jehova okwa hanganifa “ovanhu vomaludi aeshe” ovo ve mu hole nove holafane, noshidjemo, otu na ombili yashili notwa hangana. (Tit. 2:11) Kalunga omunaenghono adishe oye aeke ta dulu okuninga oshinima sha tya ngaho.

14. Ongahelipi Jesaja 65:25 a wanifilwa omumwatate umwe?

¹⁴ Mbela ovanhu otava dulu ngoo shili okulundulula omaukwatya avo? Natu ka taleni koshimoniwa eshi. Omulumenhu umwe omunyasha oo a li iha pu modolongo, eshi a li e na omido 20, okwa li a kufa ombinga melihumbato inali koshoka nosho yo melongifo leenghono. Okwa li a tulwa modolongo, eshi a li a vaka otuwa, a li a teya omaumbo nokulonga ominyonena dikwao da kwata moiti. Okwa li yo ha kala e lilongekida okulwifa keshe umwe. Eshi a uda oshili oshikando shotete okudja mOmbiibeli nokuhovela okwoongala pamwe nEendombwedi daJehova, okwa li a tomhwa kutya okwa mona oshinima sha fimana, sha hala okutya, oparadisa yopamhepo. Konima eshi a ninginifwa eli Ondombwedi, luhapu okwa li ha diladila kunghee Jesaja 65:25 a yukifwa kuye. Okwa li a lundulula omaukwatya aye mai, ngaashi okulongifa eenghono nokwa li a ninga omulumenhu omunambili.

15. Omolwashike twa hala okushiva ovanhu vakwetu ve tu waimine moparadisa yopamhepo, nongahelipi hatu dulu okuninga ngaho?

¹⁵ Jesaja 65:​13, KB-13 okwa hovela ta ti: “Omwene, Kalunga ota ti ngaha.” Ovelishe 25 oya xula neendjovo tadi ti: “Omwene osho ta ti.” Eendjovo daye alushe ohadi wanifwa. (Jes. 55:​10, 11) Oparadisa yopamhepo oko i li nale. Jehova okwa tota po oumwainafana we likalekelwa. Molwaashi otu li oshitukulwa shoukwaneumbo oo, otu na ombili paife notu udite tu li meameno mounyuni ou wa kolokosha. (Eps. 72:7) Omolwomatomheno oo, otwa hala okukwafela ovanhu vahapu ngaashi tashi dulika ve tu waimine moumwainafana wetu wopaKriste. Ohatu dulu okuninga ngaho  mokuyandja elitulemo kokuninga ovanhu ovahongwa. — Mat. 28:​19, 20.

NGHEE HATU DULU OKUKWAFELA OVANHU VE UYE MOPARADISA YOPAMHEPO

16. Oshike tashi dulu okukwafela ovanhu ve uye moparadisa yetu yopamhepo?

¹⁶ Keshe umwe womufye ota dulu okuninga sha, opo a kwafele ovanhu ve uye moparadisa yopamhepo. Opo tu ninge ngaho, otu na okuhopaenena Jehova. Iha fininike ovanhu va ninge oshitukulwa shehangano laye. Ponhele yaasho, oha ‘nanene’ ovanhu kuye pahole. (Joh. 6:44; Jer. 31:3) Ovanamitimadiwa ovo have lihongo kombinga yohole yaJehova nosho yo omaukwatya aye a denga mbada, ohava nanenwa kuye. Ongahelipi hatu dulu okukwafela ovanhu ve uye moparadisa yopamhepo, okupitila momaukwatya nomelihumbato letu liwa?

17. Ongahelipi hatu dulu okukwafela ovanhu vakwetu ve uye moparadisa yopamhepo?

¹⁷ Onghedi imwe omo hatu dulu okukwafela vamwe ve uye moparadisa yopamhepo, omokuungaunga novaitaveli vakwetu pahole nonolukeno. Ngeenge ovo vape tava ongala pokwoongala kwetu, otwa hala va kale ve udite ngaashi ovo va li vehe na eitavelo, ovo va li pokwoongala muKorinto shonale. Ova ti: “Kalunga oku li shili mokati keni.” (1 Kor. 14:​24, 25; Sak. 8:23) Onghee otu na okutwikila okupwilikina komayele aa taa ti “kalafaneni nombili.” — 1 Tes. 5:13.

18. Oshike tashi dulu okunanena ovanhu kehangano letu?

¹⁸ Otu na alushe okukendabala okutala ko ovamwatate novamwameme ngaashi Jehova he va tale ko. Ohatu ningi ngaho, ngeenge hatu yandje elitulemo komaukwatya avo mawa, ndele hakokuhawanenena kwavo oko mafiku itaku ka kala po vali. Ohatu dulu okukandula po okuhaudafana keshe pahole, ngeenge  otwa kala alushe hatu ‘kenukilafana, hatu filafana onghenda nokudiminafana po nehalo liwa.’ (Ef. 4:32) Opo nee oparadisa yopamhepo otai ka nana ovanhu ovo navo va hala okuungaungiwa navo pahole. b

KALA MENI LOPARADISA YOPAMHEPO

19. (a) Ngaashi sha ulikwa moshimhungu “ Ova li va ya nova aluka,” vamwe ova popya shike konima eshi va alukila moparadisa yopamhepo? (b) Otu na okukala twa tokola toko okuninga shike? (Tala yo efano.)

¹⁹ Otwa pandula neenghono omolwoparadisa yetu yopamhepo. Otai monika nawa shi dulife nale nomu na ovalongelikalunga vahapu shi dulife nale. Otwa hala okutwikila okupandula omolwoparadisa oyo Jehova e tu pa. Keshe oo a hala okutalalekwa, okukala a wanenwa, a ngungumana nokwa amenwa, ne uye moparadisa yopamhepo noina dja mo muyo nandenande. Ashike otwa pumbwa okukala twa lungama neenghono, molwaashi Satana ota ningi keshe shimwe e tu yule, opo tu dje mo muyo. (1 Pet. 5:8; Eh. 12:9) Inatu mu efa a pondole. Natu longeni noudiinini tu ameneni oparadisa yetu yopamhepo oyo iwa, ya koshoka noi na ombili.