1. Jehova okwa hala tu ninge shike?

 OMUSHAMANE nomukulukadi ohava kala va hafa neenghono, ngeenge okaana kavo ka dalwa. Ndele nonande ovadali ove hole okahanana kavo, inava hala ka kale okahanana fiyo alushe. Otava ka kala tave lipula neenghono, ngeenge okaana kavo itaka kulu. Sha faafana, Jehova oha kala a hafa, ngeenge hatu katuka eenghatu dotete tu ninge ovashikuli vaJesus. Ashike ina hala tu kale ouhanana vopamhepo. (1 Kor. 3:1) Ponhele yaasho, okwa hala tu ninge Ovakriste “ovakulunhu.” — 1 Kor. 14:20.

2. Oshike hatu ka kundafana moshitukulwa eshi?

² Osha hala okutya shike okukala Omukriste a kula pamhepo? Oshike tu na okuninga, opo tu kale Ovakriste va pyokoka? Ongahelipi okukonakona oshili yOmbiibeli yomoule taku tu kwafele tu pameke ekwatafano letu naJehova? Omolwashike tu na okuhenuka okukala tu udite kutya ohatu shi endifa nawa? Ohatu ka kundafana omanyamukulo omapulo oo moshitukulwa eshi.

OSHA HALA OKUTYA SHIKE OKUKALA OMUKRISTE A KULA PAMHEPO?

3. Osha hala okutya shike okukala Omukriste a kula pamhepo?

³ MOmbiibeli, oshitya shOshigreka osho sha tolokwa ‘omukulunhu’ otashi dulu yo okutya “okupyokoka,” “okuwanenena” nosho yo “oshinima she lixwa po.” a (1 Kor. 2:6) Ngaashi ounona hava twikile okukula fiyo osheshi va ninga ovakulunhu, nafye ohatu twikile okupameka ekwatafano letu naJehova, nokungaho ohatu  ningi Ovakriste va pyokoka. Nokuli nonande otwa hanga elalakano olo, otu na okutwikila okukula pamhepo. (1 Tim. 4:15) Atusheni, mwa kwatelwa naavo ve na omido dinini, ohatu dulu okukula pamhepo. Ndele oshike hashi ulike kutya Omukriste okwa kula pamhepo?

4. Oshike hashi didilikifa mo Omukriste, oo a pyokoka?

⁴ Omukriste a pyokoka oha ningi keshe osho Jehova te mu pula a ninge; iha ningi ashike osho a hala okuninga. Ndele molwaashi ina wanenena, oha ningi omapuko. Ashike nande ongaho, efiku keshe oha ningi ngaashi ta dulu, opo a diladile nokukatuka metwokumwe nehalo laKalunga. Oha djala omunhu mupe, noha kendabala okudiladila ngaashi Jehova. (Ef. 4:​22-24) Okwe lihonga okuninga omatokolo opandunge mokudiladila keemhango nosho yo komafinamhango aJehova. Onghee ina pumbwa eemhango dihapu odo di mu lombwele osho e na okuninga. Ngeenge okwa ningi etokolo, oha longo noudiinini, opo a ninge ngaashi a tokola. — 1 Kor. 9:​26, 27.

5. Oshike tashi dulu okuningilwa Omukriste, oo ina pyokoka? (Ovaefeso 4:​14, 15)

⁵ Mepingafano naasho, Omukriste, oo ina pyokoka, ota dulu okupukifwa noupu komahongo “opanhu oipupulu,” ‘okuyulwa komapukifo’ nosho yo okupukifwa komahongo ovashunimonima. b (Lesha Ovaefeso 4:​14, 15.) Ota dulu okukala a twila vamwe ondubo, ha etifa eenhamanana, ha udu nai diva, ile e liyandje komayeleko. — 1 Kor. 3:3.

6. Omolwashike hatu dulu okufaafanifa okupyokoka pamhepo nokukula kwokaana? (Tala yo efano.)

⁶ Ngaashi sha popiwa metetekelo, Omishangwa oda faafanifa okukula kwetu kwopamhepo nokukula kwokaana ka ninge omukulunhu. Ope na oinima ihapu oyo okaana kehe shii, onghee oka pumbwa omukulunhu e ka amene noku ka wilike. Natu shi faneke ngaha, omudalakadi otashi dulika a kwate okamonakadona mokwooko, ofimbo tava tauluka opate. Eshi okakadona oko taka ende taka kulu, ina otashi dulika e ka efe ka tauluke opate kuko vene, ashike otashi dulika natango a dimbulukife okamonakadona ka tale keembinga adishe, ofimbo inaka tauluka. Ngeenge okaana oko oka ningi omukulunhu, otaka ka henuka oiponga oyo kuko vene. Ngaashi ashike ounona va pumbwa ekwafo lovakulunhu, opo va henuke oshiponga, Ovakriste,  ovo inava pyokoka, luhapu ohava pumbwa ekwafo lOvakriste, ovo va pyokoka, opo va henuke oiponga yopamhepo nokuninga omatokolo e li pandunge. Mepingafano naasho, ngeenge Ovakriste, ovo va pyokoka, tava ningi omatokolo, ohava diladila moule kwaasho Ombiibeli ya popya, opo va mone kutya Jehova ota diladila ngahelipi. Opo nee ohava tula moilonga osho ve lihonga.

7. Mbela Ovakriste ovo va pyokoka ova pumbwa ngoo ekwafo lavamwe?

⁷ Mbela osho osha hala okutya Ovakriste, ovo va pyokoka, inava pumbwa nandenande ekwafo laumwe? Ahowe. Ovo va pyokoka navo ohava kala va pumbwa ekwafo omafimbo amwe. Ndele ovo tava kulu pamhepo, otashi dulika va kale va teelela vamwe ve va lombwele osho ve na okuninga, ile ve va ningile ko etokolo, olo ve na okuninga kuvo vene. Eyooloko oli li apa kutya Omukriste, oo a pyokoka, oha pula ekwafo kwaavo ve na owino nosho yo ounongo muhapu. Ashike oku shii kutya oye e na oshinakuwanifwa shokuninga omatokolo nosho yo kutya “oku na okuhumbata omutengi waye mwene.” — Gal. 6:5.

8. Omeenghedi dilipi ovo va pyokoka va yoolokafana?

⁸ Ngaashi ashike ovakulunhu aveshe ve na eholokepo la yoolokafana, havaKriste aveshe ve na omaukwatya a faafana. Pashihopaenenwa, vamwe ove na ounongo, vamwe ove na ouladi, vamwe ohava yandje nehalo liwa, ofimbo vamwe ove na oukwao wananghali. Shikwao vali, ngeenge Ovakriste vavali va pyokoka va taalela onghalo ya faafana, ohava ningi omatokolo a yoolokafana, ashike aeshe oku li metwokumwe nomifikamhango daKalunga. Osho ohashi ningwa luhapu, ngeenge Ovakriste tava ningi omatokolo a kanghamena komaliudo. Ihava tokolafana, ngeenge va ninga omatokolo a yoolokafana. Ponhele yaasho, ohava yandje elitulemo kokukala va hangana. — Rom. 14:10; 1 Kor. 1:10.

OSHIKE TU NA OKUNINGA, OPO TU KALE OVAKRISTE VA KULA PAMHEPO?

9. Mbela ohatu kulu pamhepo nopehe na okuninga eenghendabala da sha? Shi yelifa.

⁹ Otashi dulika mokweendela ko kwefimbo tu kule palutu nokuninga ovakulunhu, ndele ihatu kulu ashike ngahenya pamhepo nopehe na eenghendabala da sha. Pashihopaenenwa, ovamwatate novamwameme vomuKorinto ova li va tambula ko onghundana iwa, va ninginifwa, va pewa omhepo iyapuki nova li ve lihonga shihapu kwaasho omuyapostoli Paulus e va honga. (Oil. 18:​8-11) Ashike omido donhumba konima eshi va ninginifwa, vahapu ova li natango inava pyokoka. (1 Kor. 3:2) Ongahelipi hatu dulu okushilipaleka kutya osho inashi tu ningilwa?

10. Oshike tu na okuninga, opo tu kale twa pyokoka? (Judas 20)

¹⁰ Opo tu kale twa pyokoka, tete otu na okukala twa hala okukala twa pyokoka. Ovo ve “hole oushima,” va hala ashike okukala ouhanana pamhepo, itava ka ninga exumokomesho. (Omayel. 1:22) Inatu hala okukala twa fa omukulunhu oo ina hala okukala e na oshinakuwanifwa, nokwa teelela ovadali vaye ovo ve mu ningile ko omatokolo. Ponhele yaasho, otwa hala okukala tu na oshinakuwanifwa, nokushilipaleka kutya ohatu twikile okupameka ekwatafano letu naJehova. (Lesha Judas 20.) Ngeenge natango ohatu longo noudiinini, opo tu kale twa pyokoka, natu ilikane kuJehova ‘tu kale twa hala okulonga ehalo laye.’ — Fil. 2:13.

11. Jehova okwe tu pa shike, opo e tu kwafele tu kale Ovakriste va pyokoka? (Ovaefeso 4:​11-13)

¹¹ Jehova ina teelela tu pyokoke pamhepo kufye vene. Ovo tava longo ve li ovafita novahongi meongalo lopaKriste ove lilongekida oku tu kwafela tu ninge “ovakulunhu” pamhepo, “fiyo twa kulika filufilu omaukwatya a fa aKristus.” (Lesha Ovaefeso 4:​11-13.) Jehova oha yandje yo omhepo yaye iyapuki i tu kwafele tu kale tu na  “omadiladilo aKristus.” (1 Kor. 2:​14-16) Shikwao vali, Kalunga okwe tu pa Omavaengeli ane oo tae tu ulikile nghee Jesus a li ha diladila, ha popi noha katuka, eshi a li kombada yedu. Ngeenge owa hopaenene onghedi omo Jesus a li ha diladila noha katuka, oto ka hanga elalakano loye lokukala Omukriste a pyokoka.

OKUKONAKONA OSHILI YOMBIIBELI YOMOULE OHAKU TU KWAFELE

12. “Omahovelohongo e na sha naKristus” oshike?

¹² Opo tu kale twa pyokoka, otu na okulihonga shihapu shihe fi ashike “omahovelohongo e na sha naKristus.” Pashihopaenenwa, oinima oyo twe lihonga tete, omwa kwatelwa elidilululo, eitavelo, eninginifo nosho yo enyumuko. (Heb. 6:​1, 2) Oyo oimwe ashike yomomahovelohongo oo Ovakriste aveshe va itavela. Onghee, eshi omuyapostoli Petrus a li ta udifile ovanhu pOpentekoste, okwa li a popya kombinga yoinima oyo. (Oil. 2:​32-35, 38) Otu na okutambula ko omahovelohongo oo, opo tu ninge ovahongwa vaKristus. Pashihopaenenwa, Paulus okwa ulika kutya, ngeenge inatu itavela menyumuko, itatu dulu okutya otu li Ovakriste vashili. (1 Kor. 15:​12-14) Ashike otu na okukala twa hala okulihonga shihapu, shihe fi ashike omahovelohongo, opo tu kale twa pyokoka pamhepo.

13. Oshike tu na okuninga, opo tu mone ouwa meendja da pama dopamhepo, odo da popiwa mOvaheberi 5:14? (Tala yo efano.)

¹³ Mepingafano nomahovelohongo, eendja da pama dopamhepo inadi kwatela mo ashike eemhango daKalunga, ndele oda kwatela mo yo omafinamhango aye, oo hae tu kwafele tu ude ko nghee ha diladila. Opo tu mone ouwa meendja da tya ngaho, otu na okukonakona, okudilonga nokutula moilonga noukeka Eendjovo daKalunga. Eshi hatu ningi ngaho, ohatu lihonga okuninga omatokolo oo taa hafifa Jehova. c — Lesha Ovaheberi 5:14.

14. Ongahelipi Paulus a li a kwafela Ovakorinto va kule pamhepo?

¹⁴ Ovakriste, ovo inava pyokoka, ohava mono shidjuu okuninga etokolo la yuka, ngeenge kape na omhango yokondadalunde okudja mOmbiibeli. Ngeenge kape na omhango ya dja mOmbiibeli, vamwe ohava kala ve udite kutya otava dulu  okuninga keshe osho va hala. Vamwe otashi dulika va pule omhango, opo pehe na omhango. Pashihopaenenwa, osha fa li shi li ngaha kutya Ovakriste muKorinto ova li tava pula Paulus e va pe omhango i na sha nangeenge otava dulu okulya oikulya ya yambelwa oikalunga, ile hasho. Ponhele yoku va lombwela osho ve na okuninga, Paulus okwa li a ulika kutya keshe umwe womuvo oku na “emanguluko” lokuhoolola, she likolelela kwaasho eliudo laye tali mu pitike a ninge. Okwa li a tumbula omafinamhango amwe Ombiibeli, oo taa dulu oku va kwafela va ninge omatokolo oo itae va fiye ve na eliudo tali va nyenyetele, noitava pundukifa vamwe. (1 Kor. 8:​4, 7-9) Kungaho, Paulus okwa li ta kwafele Ovakorinto va kule pamhepo, opo va dule okulongifa eendunge davo dokuyoolola, ponhele yokukala ve likolelela kwaasho vamwe tava ti, ile mokukonga eemhango.

15. Ongahelipi Paulus a li a kwafela Ovakriste Ovaheberi va ninge exumokomesho lopamhepo?

¹⁵ Ohatu lihongo oshilihongomwa vali shimwe sha fimana kwaasho Paulus a li a shangela Ovakriste Ovaheberi. Vamwe kava li va twikila okukula pamhepo; ova li va ‘shuna komashini ponhele yokulya eendja [dopamhepo] da pama.’ (Heb. 5:12) Kava li ve lihonga nokutambula ko oinima ipe oyo Jehova a li te va hongo. (Omayel. 4:18) Pashihopaenenwa, ovaitaveli vahapu Ovajuda ova li natango tava xumifa komesho Omhango, oyo ya li ya yandjwa okupitila muMoses, nonande Omhango oyo oya li ya xulifwa po okupitila mekuliloyambo laJesus omido 30 lwaapo da pita. (Rom. 10:4; Tit. 1:10) Omido odo 30 oda li da pa Ovakriste efimbo la wana va ude ko kutya inava pumbwa vali okushikula Omhango. Onghee Paulus okwa li ta kendabala oku va kwafela va tambule ko oshili yomoule, oyo a li te va hongo. Onhumwafo yaye oya li ye va kwafela va mone kutya onghedi ipe yokulongela Jehova, oyo ya tulwa po okupitila muJesus, oya denga mbada. Oya li yo ye va kwafela va kale ve na ouladi, opo va twikile okuudifa, nonande ova li tava patanekwa kOvajuda. — Heb. 10:​19-23.

HENUKA OKUKALA U UDITE KUTYA OTO SHI ENDIFA NAWA

16. Kakele kokuninga exumokomesho fiyo osheshi twa pyokoka, oshike tu na okuninga?

¹⁶ Otu na okulonga noudiinini tuha lalakanene ashike oukulunhu wopamhepo, ndele otu u kaleke po yo. Osho otashi pula okuhenuka okukala tu  udite kutya ohatu shi endifa nawa. (1 kor. 10:12) Otu na ‘okulikonakona’ fye vene nokushilipaleka kutya ohatu twikile okuninga exumokomesho. — 2 Kor. 13:5.

17. Ongahelipi onhumwafo, oyo Paulus a li a shangela Ovakolossi, ya ulika kutya otwa pumbwa okukala twa pyokoka?

¹⁷ Monhumwafo yaPaulus, oyo a li a shangela Ovakolossi, okwa ulika kutya otwa pumbwa okukala twa pyokoka. Nonande Ovakolossi ova hangika nale ve li Ovakriste va pyokoka, Paulus okwa li e va lombwela kutya ove na okukala va lungama, opo vaha pukifwe komadiladilo ovanhu vomounyuni. (Kol. 2:​6-10) Epafras, oo tashi dulika a li e shii nawa ovanhu meongalo, okwa li ha ilikana luhapu, opo va kale ‘va pama,’ ile va pyokoka. (Kol. 4:12) Oshike hatu lihongo mwaasho? Paulus naEpafras ova li ve udite kutya, ngeenge otwa hala okukala twa pyokoka, otwa pumbwa ekwafo laKalunga. Otwa pumbwa yo okushilipaleka kutya ohatu twikile okupameka ekwatafano letu naJehova. Ova li va hala Ovakolossi va kale va pyokoka, ile va kale Ovakriste ovakulunhu, kashi na nee mbudi kutya ova taalela omashongo elipi.

18. Oshike tashi dulu okuningilwa Omukriste a pyokoka? (Tala yo efano.)

¹⁸ Paulus okwa londwela Ovaheberi kutya Omukriste a pyokoka, oo ina lungama, ota dulu okukala ina hokiwa vali kuKalunga fiyo alushe. Ngeenge ina hala okudulika kuJehova, ota ka ehena kokule naye noita ka dula vali okulivela ombedi nokudiminwa po kuKalunga. Shihafifa, Ovaheberi kava li monghalo i li ngaho. (Heb. 6:​4-9) Kunena, ongahelipi shi na sha naavo inave lipyakidila vali, ile ovo va kondwa, ndele lwanima tave livele ombedi? Ngeenge ove livela ombedi shili, otava ulike kutya inava fa ovo Paulus a popya kombinga yavo, ovo tava dulu okukala inava hokiwa vali kuKalunga. Ashike ngeenge ova alukile kuJehova, otava ka pumbwa ekwafo olo ha yandje. (Hes. 34:​15, 16) Ovakulunhuongalo otava dulu okupula omumwatate, ile omumwameme oo a pyokoka e va kwafele va pameke vali ekwatafano lavo naJehova.

19. Elalakano lilipi hatu dulu okulitulila po?

¹⁹ Ngeenge oto longo noudiinini u kale Omukriste a pyokoka, oto dulu okuhanga elalakano loye. Twikila okulihonga oshili yomoule okudja mOmbiibeli nokukala ho diladila filufilu ngaashi Jehova. Ngeenge ou li nale Omukriste a pyokoka, ninga ngaashi to dulu, opo u kale ngaho paife nofiyo alushe.