1. Oshiwana shaJehova osha li sha unganekwa ngahelipi pefimbo lovayapostoli?

 ALUSHE ngeenge Jehova a pa oshiwana shaye oshinakuwanifwa, okwa teelela shi shi wanife po monghedi ya unganekwa. (1 Kor. 14:33) Pashihopaenenwa, Kalunga okwa hala onghundana iwa i udifilwe ovanhu aveshe kombada yedu. (Mat. 24:14) Jehova okwa pa Jesus oshinakuwanifwa shokuwilika oilonga oyo. Jesus okwa shilipaleka kutya oilonga oyo otai longwa monghedi ya unganekwa. Pefimbo lovayapostoli, eshi omaongalo a totwa po meenhele di lili noku lili, opa li pa nangekwa ovakulunhuongalo va wilike nova kwatele komesho. (Oil. 14:23) Olutu lovakulunhuongalo muJerusalem, olo la li la kwatela mo ovayapostoli novakulunhu, ola li la ninga omatokolo onhumba oo a li e na okushikulwa koilyo aishe yeongalo. (Oil. 15:2; 16:4) Molwaashi ovamwatate novamwameme ova li va dulika, “eitavelo lovamwatate momaongalo oo ola li la pamekwa, nomuvalu wavo owa enda tau hapupala.” — Oil. 16:5.

2. Okudja mo 1919, ongahelipi Jehova a kala ta wilike oshiwana shaye noku shi pa eendja dopamhepo?

² Jehova ota twikile okuunganeka oshiwana shaye fiyo okunena. Okudja mo 1919, Jesus okwa kala ta longifa okangudu kanini kovalumenhu ovavaekwa ka unganeke oilonga yokuudifa nokuyandja eendja dopamhepo kehangano laye. a (Luk. 12:42) Osha yela kutya Jehova ota nangeke noupuna oilonga yavo. — Jes. 60:22; 65:​13, 14.

3-4. (a) Yandja oshihopaenenwa osho tashi ulike nghee hatu mono ouwa, molwaashi twa unganekwa. (b) Oshike hatu ka kundafana moshitukulwa eshi?

 ³ Ngeno katwa li twa unganekwa, ngeno itatu dulu okuwanifa po oilonga oyo Jesus e tu pa. (Mat. 28:​19, 20) Pashihopaenenwa, natu tye nee ngeno ovamwatate inave tu pa oitukulwa oko hatu udifile, keshe umwe oha ka udifila koshitukulwa oko a hala. Otashi dulika oitukulwa imwe tai kala hai udifilwa lwoikando kovaudifi va yoolokafana, ofimbo imwe tai dulu okukala inai longwa nandenande. Omeenghedi vali dimwe dilipi hatu mono ouwa, molwaashi twa unganekwa?

⁴ Ngaashi ashike Jesus a li a unganeka ovashikuli vaye, eshi a li kombada yedu, natango ota twikile okuunganeka oshiwana shaKalunga kunena. Moshitukulwa eshi, ohatu ka kundafana oshihopaenenwa osho Jesus a tula po, nanghee ehangano hali shikula oshihopaenenwa shaye. Ohatu ka kundafana yo nghee hatu dulu okuulika kutya otwe lineekela ehangano laJehova.

EHANGANO LETU OHALI SHIKULA OSHIHOPAENENWA SHAJESUS

5. Omonghedi imwe ilipi hatu shikula oshihopaenenwa shaJesus? (Johannes 8:28)

⁵ Jesus okwe lihonga kuXe womeulu osho e na okuninga naasho e na okupopya. Ehangano laJehova ohali shikula oshihopaenenwa shaJesus, mokulongifa Eendjovo daKalunga, li tu kwafele tu shiive osho shi li mondjila naasho sha puka noku tu wilika. (Lesha Johannes 8:28; 2 Tim. 3:​16, 17) Ohatu dimbulukifwa pandjikilile tu leshe nokutula moilonga Eendjovo daKalunga. Ongahelipi hatu mono ouwa mokushikula omayele oo?

6. Omonghedi imwe ya fimana ilipi hatu mono ouwa mokukonakona Ombiibeli?

⁶ Ohatu mono ouwa pauyadi, ngeenge hatu konakona Ombiibeli hatu longifa oishangomwa yetu. Pashihopaenenwa, ohatu yelekanifa osho Ombiibeli tai hongo newiliko olo hatu mono okudja kehangano. Ngeenge otwa mono kutya ewiliko olo hatu pewa ola kanghamena kOmishangwa, ohashi pameke elineekelo letu mehangano laJehova. — Rom. 12:2.

7. Etumwalaka lilipi Jesus a li a udifa, nongahelipi ehangano hali shikula oshihopaenenwa shaye?

⁷ Jesus okwa li ha udifa “onghundana iwa yOuhamba waKalunga.” (Luk. 4:​43, 44) Jesus okwa li yo a lombwela ovahongwa vaye va udife kombinga yOuhamba. (Luk. 9:​1, 2; 10:​8, 9) Kunena, Eendombwedi daJehova adishe ohadi udifa etumwalaka li na sha nOuhamba kashi na nee mbudi kutya odi li peni node lipyakidila shi fike peni.

8. Oufembanghenda ulipi tu na?

⁸ Oshi li oufembanghenda kufye okulombwela vamwe kombinga yOuhamba waKalunga. Hakeshe umwe e na oufembanghenda wa tya ngaho. Pashihopaenenwa, eshi Jesus a li kombada yedu, ka li a pitika oishitwa yopamhepo ikolokoshi i popye kombinga yaye. (Luk. 4:41) Kunena, opo umwe a dule okuya pamwe noshiwana shaJehova moukalele, oku na okukala metwokumwe nonghedi oyo tai hafifa Jehova. Ohatu ulike kutya otwa pandula, eshi tu na oufembanghenda wokuudifa hatu lombwele ovanhu kombinga yOuhamba waKalunga. Ngaashi Jesus, elalakano letu okutwika nokutekela eembuto doshili yOuhamba momitima dovanhu. — Mat. 13:​3, 23; 1 Kor. 3:6.

9. Ongahelipi ehangano la shiivifa edina laKalunga?

⁹ Jesus okwa shiivifa edina laKalunga. Jesus okwa ilikana kuXe womeulu, a ti: “Onde va shiivifila edina loye.” (Joh. 17:26) Ehangano laJehova ohali shikula oshihopaenenwa shaJesus mokuninga ngaashi tali dulu li kwafele ovanhu va shiive edina  laKalunga. Ombiibeli — Etoloko lOunyuni mupe lOmishangwa Diyapuki oya dana onghandangala ya fimana mokushuna edina laKalunga ponhele keshe opo la li la holoka. Paife Ombiibeli oyo oya tolokwa momalaka e dulife 270 ye lixwa po, ile inai li xwa po. Moshiwedelwako A4 nosho yo A5 shetoloko olo, oto ke lihonga shihapu kutya omolwashike nongahelipi edina laKalunga la shunwa mo mOmbiibeli. Oshiwedelwako C, osho tashi hangwa mOmbiibeli yokukonakonwa, osha yandja oumbangi muhapu kutya edina laKalunga oli na okuholoka mOmishangwa dopaKriste dOshigreka lwoikando 237.

10. Oshike hatu lihongo moshimoniwa shomukainhu wokoMyanmar?

¹⁰ Ngaashi Jesus, otwa hala okukwafela ovanhu vahapu ngaashi tashi dulika va shiive edina laKalunga. Omukainhu umwe wokoMyanmar, oo a li e na omido 67, eshi e lihonga kombinga yedina laKalunga, okwa li a lila nokupopya ta ti: “Eshi osho oshikando shange shotete nda uda kutya edina laKalunga oJehova. . . . Owa honga nge oshinima sha fimana osho inandi hongwa nande onale.” Ngaashi twe shi mona moshimoniwa osho, okulihonga kombinga yedina laKalunga otashi dulu okukuma ovanamitimadiwa.

TWIKILA OKUKALA WE LINEEKELA MEHANGANO LETU

11. Ongahelipi ovakulunhuongalo tava dulu okuulika kutya ove lineekela mehangano laJehova? (Tala yo efano.)

¹¹ Omonghedi imwe ilipi ovakulunhuongalo tava dulu okuulika kutya ove lineekela mehangano laKalunga? Ngeenge ovakulunhuongalo va pewa omalombwelo, ova pumbwa oku a lesha noukeka noku a tula moilonga ngaashi tava dulu. Pashihopaenenwa, ihava pewa ashike ewiliko li na sha nanghee tava dulu okukwatela komesho oitukulwa pokwoongala nosho yo nghee ve na okwiilikana meongalo, ndele ohava lombwelwa yo nghee ve na okufila oshisho eedi daKristus. Ngeenge ovakulunhuongalo ova shikula ewiliko olo tava pewa kehangano, otashi ka kwafela ovo ve li koshi yewiliko lavo va kale ve udite va amenwa nove holike.

12. (a) Omolwashike twa pumbwa okulongela kumwe naavo tava kwatele komesho? (Ovaheberi 13:​7, 17) (b) Omolwashike twa pumbwa okuyandja elitulemo komaukwatya mawa aavo tava kwatele komesho?

¹² Ngeenge otwa pewa ewiliko okudja kovakulunhuongalo, otwa pumbwa oku li tambula ko nehalo liwa. Ngeenge otwa ningi ngaho, otashi ka kala shipu kwaavo tava kwatele komesho va wanife po oilonga yavo. Ombiibeli otai tu ladipike tu dulike nokuliyandja nehalo liwa kwaavo tava kwatele komesho. (Lesha Ovaheberi 13:​7, 17.) Osho ohashi kala shidjuu omafimbo amwe. Omolwashike? Omolwaashi ovalumenhu ovo inava wanenena. Ashike ngeenge otwa kala hatu yandje elitulemo komaukwatya avo mai, ponhele yomaukwatya avo mawa, kungaho ohatu yambidida ovatondi vetu. Omolwashike hatu tile ngaho? Itatu ka kala twe lineekela mehangano laKalunga, naasho osho ovatondi vetu va hala tu ninge. Oshike tu na okuninga kondadalunde, opo tu didilike mo nokuhenuka oipupulu yovatondi vetu?

INO EFA VAMWE VE KU NINGIFE UHA KALE VALI WE LINEEKELA EHANGANO

13. Ongahelipi ovatondi vaKalunga hava popile mowii ehangano laye?

¹³ Ovapataneki vaKalunga ohava kendabala okuningifa oinima iwa i na sha nehangano laye i monike ii. Pashihopaenenwa, otwe lihonga mOmbiibeli kutya Jehova okwa hala ovalongeli vaye va kale va koshoka palutu, paenghedi nopamhepo. Jehova okwa ti kutya keshe oo ta twikile okulonga owii noina  hala okulundulula elihumbato laye oku na okukondwa mo meongalo. (1 Kor. 5:​11-13; 6:​9, 10) Ohatu dulika koshipango osho shopaMishangwa. Ashike ovapataneki vetu ohava ti kutya katu hole ovanhu, hatu va tokola noihatu va tambula ko ve li ngaashi ve li.

14. Olyelye ha xumifa komesho oipupulu i na sha nehangano?

¹⁴ Natu kale tu shii kutya olye lela ta ponokele ehangano. Satana Ondiaboli oye e kwetele oshinima osho komesho. Oye ‘xe yoipupulu.’ (Joh. 8:44; Gen. 3:​1-5) Onghee natu kale tu shii kutya Satana oha longifa ovayambididi vaye va xumife komesho oipupulu i na sha nehangano laJehova. Osho osho sha li sha ningwa pefimbo lovayapostoli.

15. Oshike ovawiliki vomalongelokalunga va ningila Jesus nosho yo ovashikuli vaye?

¹⁵ Nonande Omona waKalunga, Jesus, okwa li a wanenena nokwa longa oikumwifilonga, Satana okwa longifa ovanhu va tandavelife oipupulu kombinga yaye. Pashihopaenenwa, ovawiliki vomalongelokalunga ova li va lombwela ovanhu kutya eenghono odo Jesus a li ta tefa mo eendemoni okwe di pewa ‘komupangeli weendemoni.’ (Mark. 3:22) Eshi Jesus a li ta yelekwa, ovawiliki vomalongelokalunga ova li ve mu lundila nova li va lombwela ovanhu ve mu dipae. (Mat. 27:20) Lwanima, eshi ovashikuli vaKristus va li tava udifa onghundana iwa, ovo va li have va pataneke ova li va “xwaxwameka ovanhu” ve va hepeke. (Oil. 14:​2, 19) Oshungonangelo yOshiingilisha ye 1 Desemba 1998, oya popya shi na sha nOilonga 14:​2, ya ti: “Ovo va li hava yambidida Satana kava li va tambula ko etumwalaka olo Ovakriste va li hava udifa nova li va popya oinima ii kombinga yavo, opo ovanhu vaha pwilikine kuvo nova kale ve va tonde.”

16. Oshike twa pumbwa okudimbuluka, ngeenge otwa udu omahokololo oipupulu?

 ¹⁶ Satana okwa kala nokupopya oipupulu okudja pefimbo lovayapostoli. Nokunena, ota twikile ‘okuhongaula ounyuni aushe.’ (Eh. 12:9) Ngeenge owa udu omahokololo mai e na sha nehangano, ile novamwatate ovo tava kwatele komesho, dimbuluka nghee ovatondi vaKalunga va li hava ungaunga naJesus nosho yo ovahongwa vopefimbo lovayapostoli. Kunena, oshiwana shaJehova otashi patanekwa nokuhepekwa ngaashi naanaa Ombiibeli ya xunganeka. (Mat. 5:​11, 12) Itatu ka tambula ko omahokololo oipupulu, ngeenge otu shii oo te a xumifa komesho, nongeenge otwa katuka eenghatu diva tu liamene. Ongahelipi hatu dulu okuliamena?

17. Ongahelipi hatu dulu okuhenuka okupiyaanekwa komahokololo oipupulu? (2 Timoteus 1:13) (Tala yo oshimhungu “ Osho u na okuninga, ngeenge owa udu omahokololo oipupulu.”)

¹⁷ Henuka omahokololo oipupulu. Omuyapostoli Paulus okwa yelifa nawa osho tu na okuninga, ngeenge otwa udu omahokololo oipupulu. Okwa lombwela Timoteus a ‘kumaide oohandimwe vaha pwilikine komahokololo oipupulu’ nova ‘henuke omahokololo oipupulu neendjovo domasheko.’ (1 Tim. 1:​3, 4; 4:7) Nonande okaana otaka dulu okutoola sha pedu, ndele take shi tula mokanya, omukulunhu oo e shii kutya osha nyika oshiponga ite ke shi ninga. Ohatu henuka omahokololo oipupulu, molwaashi otu shii odjo yao. Ponhele yaasho, ohatu pwilikine ashike ‘keendjovo diwa’ doshili. — Lesha 2 Timoteus 1:13.

18. Ongahelipi hatu dulu okuulika kutya otwe lineekela mehangano laJehova?

¹⁸ Otwa kundafana ashike eenghedi nhatu domeenghedi dihapu omo ehangano laKalunga hali hopaenene Jesus. Eshi to konakona Ombiibeli, didilika eenghedi dimwe vali omo ehangano hali shikula oshihopaenenwa shaJesus. Kwafela vamwe meongalo leni va twikile okukala ve lineekela mehangano. Twikila okuulika kutya owe lineekela muJehova moku mu longela noudiinini nokukala popepi nehangano laye, olo ta longifa a wanife po ehalo laye. (Eps. 37:28) Natu twikileni okukala twa lenga okweendafana novanhu ovo ve hole Jehova novadiinini.