1, 2. Omolwashike tu na okudeula vamwe va kale tava wanifa po oinakuwanifwa yavo?

OKUUDIFA onghundana iwa osha li oshilonga osho sha fimanenena kuJesus. Ashike okwa li ha deula vamwe va ninge ovafita nosho yo ovahongi. (Mat. 10:5-7) Nonande Filippus okwa li e lipyakidila nokuudifa, okwa li a dula okukwafela ovanakadona vaye vane va kale hava pondola ngeenge tava udifile vamwe oshili yopamishangwa. (Oil. 21:8, 9) Mbela edeulo la tya ngaho ola fimana shi fike peni kunena?

² Omuvalu wovanhu ovo tava tambula ko onghundana iwa otau ende tau hapupala mounyuni aushe. Ovanhu ovo vape inava ninginifwa natango ova pumbwa okumona efimano lokukonakona Ombiibeli paumwene. Ova pumbwa yo okuhongwa nghee tava dulu okuudifila vamwe onghundana iwa noku va honga oshili. Ovamwatate momaongalo etu ova pumbwa okutuwa omukumo va longe noudiinini opo va dule okukala va wana okunangekwa po ve li ovayakuliongalo nosho yo ovakulunhuongalo. Ovakriste va pyokoka otava dulu okukwafela  ovo vape va ninge exumokomesho lopamhepo okupitila ‘moku va pukulula nawa.’ — Omayel. 4:2.

3, 4. (a) Ongahelipi Paulus a kwatakanifa okukonakona Omishangwa nokupondola moukalele? (b) Oshike tu na okuninga fimbo inatu ladipika ovakonakoni vetu va kale hava konakona Ombiibeli paumwene?

³ Osha fimana shi fike peni okukonakona Omishangwa paumwene? Enyamukulo ohatu li hange meendjovo domuyapostoli Paulus odo a shangela Ovakriste vomuKolossi. Okwa shanga a ti: “Inatu efa oku mu ilikanena noku mu indilila mu yadifwe okushiiva ehalo laye meendunge adishe nomounongo wopamhepo, okweenda kweni opo ku wapalele Omwene, mu mu hafife muaishe shili nokwiimika oiimati moshilonga keshe shiwa, nokukula mokushiiva Kalunga.” (Kol. 1:9, 10) Eshiivo lashili ola li tali ka kwafela Ovakolossi opo ‘okweenda kwavo ku wapalele Omwene.’ Osho osha li tashi ke va kwafela va dule “okwiimika oiimati moshilonga keshe shiwa,” unene tuu moilonga yokuudifa onghundana iwa. Opo omulongeli waJehova a pondole moilonga yaye, oku na okukala e na onghedindjikilile yokukonakona Ombiibeli. Otwa pumbwa okukwafela ovakonakonimbiibeli vetu va ude ko oshili oyo.

⁴ Fimbo inatu kwafela vamwe va mone ouwa mekonakonombiibeli lopaumwene, otwa pumbwa okukala twa tomhwa kutya osha fimana. Onghee hano, otu na okukala tu na onghedindjikilile iwa yokukonakona Ombiibeli. Oto dulu okulipula kutya: ‘Ngeenge ovaneumbo ova holola omadiladilo avo oo eli omhinge nomahongo opamishangwa ile tava pula omapulo madjuu, mbela ohandi dulu ngoo okuyandja omanyamukulo a kanghamena kOmbiibeli? Ngeenge handi lesha kombinga ya nghee Jesus, Paulus nosho yo vamwe ovo va li ovadiinini moilonga yokuudifa, mbela ohandi dilonga ngoo kunghee oudiinini wavo tau dulu okunwefa mo okulongela kwange Jehova?’ Atusheni otwa pumbwa eshiivo nomayele oo haa di mEendjovo daKalunga. Nongeenge otwa lombwele vamwe nghee twa mona ouwa mekonakonombiibeli lopaumwene, otashi dulika tu va ladipike navo va mone ouwa mokukala hava konakona Omishangwa noukeka.

5. Ongahelipi to dulu okukwafela ovo vape va kale ve na onghedindjikilile yokukonakona Ombiibeli paumwene?

⁵ Oto dulu okulipula kutya, ‘Ongahelipi handi dulu okudeula omukonakonimbiibeli wange a kale ta konakona Ombiibeli pandjikilile?’ Otashi ka kala shiwa okuhovela oku mu ulikila nghee ta dulu okulilongekidila ekonakono olo hamu ningi naye. Oto dulu oku mu lombwela a kale ha lesha oitukulwa yoiwedelwako oyo i li membo Ombibeli otai hongo lela shike? nokukala ha lesha omishangwa odo da tofwa mo. Mu kwafela a kale he lilongekidile okwoongala nelalakano lokuyandja omatyekosha. Mu ladipika a kale ha lesha oifo aishe yOshungonangelo no-Awake! oyo opo ya piti. Ngeenge o-Watchtower Library ile ONGULUMAMBO YOKOINTANETA oi li melaka laye, oto dulu  oku mu ulikila nghee ta dulu oku i longifa a mone omanyamukulo komapulo Ombiibeli. Ngeenge owa ningi ngaho, oshi na oupu omukonakonimbiibeli woye a kale ta hafele okukonakona paumwene Eendjovo daKalunga.

6. (a) Ongahelipi to dulu okukwafela omukonakoni woye a kulike ohole yokuhola Ombiibeli momutima waye? (b) Oshi na oupu omukonakonimbiibeli a ninge shike ngeenge okwa kulike ohole yokuhola omishangwa?

⁶ Oshoshili kutya katu na okufininika ovanhu va leshe nokukonakona Ombiibeli. Ponhele yaasho, natu kale hatu longifa oilongifo oyo twa longekidilwa kehangano laJehova opo tu kwafele ovakonakoni vetu va kulike ohole yavo yokuhola Ombiibeli. Mokweendelako kwefimbo, ovakonakoni ovo ve na omitima diwa otava ka kala ve udite ngaashi omupsalme oo a imba ta ti: “Okukala popepi naKalunga, osho elao lange; elineekelo lange onde li tula mOmwene Kalunga.” (Eps. 73:28) Omhepo yaJehova otai ka wilika omukonakoni oo ha dulika noku na olupandu.

7. Ongahelipi Jesus a li a deula ovaudifi vonghundana iwa? (Tala efano pehovelo loshitukulwa.)

⁷ MuMateus etukulwa 10, omu na omalombwelo oo Jesus a yandja kovayapostoli vaye 12. Ponhele yokupopya monghedi ya mbwalangadja, okwa li a popya oitwa kondadalunde. ^[1] Ovayapostoli ova li hava pwilikine eshi Jesus te va hongo nghee ve na okuudifa nomupondo nokonima yaasho ohava i va ka udife. Ova ka kala ovahongi ovanekeka vEendjovo doshili eshi va kala hava tale eenghedi daJesus dokuhonga. (Mat. 11:1) Ohatu dulu okudeula ovakonakonimbiibeli vetu va kale ovaudifi vonghundana iwa hava pondola. Paife natu ka kundafaneni eenghedi mbali nghee hatu dulu oku va kwafela.

8, 9. (a) Jesus okwa li ha popi novanhu ngahelipi moukalele? (b) Ongahelipi to dulu okukwafela ovaudifi vape va kale hava kundafana novanhu ngaashi Jesus?

⁸ Okukundafana novanhu. Jesus okwa kala ha popi novanhu kombinga yOuhamba. Pashihopaenenwa, okwa li a kundafana monghedi iwa notai ti sha nomukainhu pomufima waJakob popepi noshilando shaSikar. (Joh. 4:5-30) Okwa li yo a popya naMateus Levi, omufendelifi. Omavangeli inaa popya shihapu kombinga yeenghundafana davo, ashike Mateus okwa li a tambula ko eshivo laJesus lokuninga omushikuli waye. Mateus nosho yo vamwe ova li va uda Jesus eshi ta popi pefimbo loshivilo meumbo laMateus. — Mat. 9:9; Luk. 5:27-39.

⁹ Pomhito imwe vali, Jesus okwa li a popya nonghenda naNatanael, oo a li e na etaleko lii li na sha novanhu ovo va dja kuNasaret. Nonande ongaho, Natanael okwa li e linyengifwa a lundulule etaleko laye. Okwa li a tokola okulihonga shihapu kombinga yaasho Jesus omulumenhu a dja kuNasaret a li ta hongo. (Joh. 1:46-51) Onghee hano, otu na omatomheno mawa okudeula ovaudifi vape va dule okukundafana novanhu monghedi iwa noyengungumano. ^[2] Ovo hatu kwafele otava ka kala va hafa okumona nghee ovanamitimadiwa tave ke linyenga nawa kokunakonasha kwavo nokeendjovo donghenda.

10-12. (a) Jesus okwa li a kulika ngahelipi ohokwe yaavo va li va ulika ohokwe monghundana iwa? (b) Ongahelipi hatu dulu okukwafela ovaudifi vape va xwepopaleke ounghulungu wavo wokuhonga oshili yOmbiibeli?

¹⁰ Kulika ohokwe. Jesus okwa li e na efimbo la ngabekwa lokulonga moukalele. Ndele nande ongaho, okwa li ha kufa efimbo a kulike ohokwe oyo ovanhu va ulika monghundana iwa. Pashihopaenenwa, Jesus okwa li a honga ongudu yovanhu e li mombautu. Pomhito oyo, okwa li a ningifa Petrus a kwate eeshi dihapu pashikumwifilonga ndele te mu lombwele ta ti: “Okonena tuu eli oto ningi omuyuli wovanhu.” Eendjovo nosho yo eenghatu daJesus oda eta oidjemo ilipi? Petrus nosho yo ookaume kaye “ova eta eewato davo komunghulo, va fiya po aishe, ndele ove mu [Jesus] shikula.” — Luk. 5:1-11.

¹¹ Nikodemus oo a li oshilyo shomOmhangu yoPombada yOvajuda, okwa li a ulika ohokwe  mehongo laJesus. Okwa li a hala okulihonga shihapu, ashike okwa li a tila kutya ovanhu otave ke mu tila ngahelipi ngeenge okwa popi naJesus moipafi. Jesus okwa li ha tifuka noha longifa nawa efimbo laye; okwa li a ka shakeneka Nikodemus oufiku e li kokule nongudu yovanhu. (Joh. 3:1, 2) Ohatu lihonga shike mehokololo olo? Omona waKalunga okwa li ha kufa efimbo opo a pameke eitavelo lavamwe. Mbela inatu pumbwa okukala hatu yandje elitulemo kokuninga omalishuneko nosho yo okukonakona Ombiibeli naavo ve na ohokwe?

¹² Ovaudifi vape otava ka xwepopaleka ounghulungu wavo wokuhonga oshili yOmbiibeli ngeenge otwa kala hatu longo pamwe navo moukalele. Ohatu dulu yo oku va kwafela va kaleke momadiladilo ovo inava ulika lela ohokwe. Ohatu dulu okushiva ovaudifi vape tu ye pamwe navo komalishuneko ile kovakonakonimbiibeli vetu. Ovaudifi ovo vape ngeenge otwe va deula noku va twa omukumo, nopehe na omalimbililo, otava ka kala va hala okukulika ohokwe mu vamwe nokuninga omakonakonombiibeli kuvo vene. Otave ke lihonga okukala have lididimike nokutwikila okuudifa. — Gal. 5:22; tala oshimhungu “ Okutwikila okwa fimana.”

13, 14. (a) Oshike hatu lihongo moihopaenenwa yopaMbiibeli yaavo va li va ninga omaliyambo manene? (b) Omeenghedi dilipi hatu dulu okudeula ovaudifi vape nosho yo ovanyasha va kale hava ulikile ovamwatate novamwameme ohole?

¹³ Ombiibeli oya divilika oufembanghenda owo tu na ‘wokuhola ovamwatate’ nokuyakulafana. (Lesha 1 Petrus 1:22; Lukas 22:24-27.) Omona waKalunga okwa yandja keshe shimwe, mwa kwatelwa omwenyo waye ponhele yaaveshe. (Mat. 20:28) Dorkas “okwa li ha longo oilonga iwa ihapu ndee ta yandje oikwafa ihapu.” (Oil. 9:36, 39) Maria omumwameme wokuRoma okwa li e “lihepeka” ile tu tye a longa noudiinini ponhele yavamwe meongalo. (Rom. 16:6) Ongahelipi hatu dulu okukwafela ovo vape va mone efimano lokuyakula ovamwatate novamwameme?

¹⁴ Eendombwedi odo da pyokoka otadi dulu okushiva ovo vape va ye pamwe navo ngeenge tava ka talela po ovo tava vele ile ovanamido. Ngeenge otashi shiiva, ovadali otava dulu okuya pamwe novana vavo komatalelepo a tya ngaho. Ovakulunhuongalo otava dulu okulonga navamwe mokushilipaleka kutya ovanamido vetu ovaholike ove na oikulya i na oukolele nosho yo kutya omaumbo avo okwa filwa oshisho. Monghedi ya tya ngaho, ovanyasha nosho yo ovo vape ohave lihongo okuulikila vamwe onghenda. Omukulunhuongalo umwe ngeenge e li moukalele oha talele po eendombwedi odo hadi di komikunda a tale kutya ove li po ngahelipi. Omumwatate omunyasha oo luhapu hai pamwe naye okwa li e lihonga kutya ovanhu aveshe meongalo ova pumbwa okukala ve udite kutya ove holike. — Rom. 12:10.

15. Omolwashike sha fimana kovakulunhuongalo va kale ve na ohokwe mexumokomesho lovalumenhu meongalo?

¹⁵ Shaashi Jehova oha longifa ovalumenhu va kale ovahongi momaongalo, osha fimana kovamwatate okulihonga okupopya nawa. U li omukulunhuongalo, mbela ito dulu okupwilikina komuyakuliongalo eshi te li deula oshipopiwa shaye? Ota dulu okuxwepopaleka ounghulungu waye wokukala omuhongi wEendjovo daKalunga ngeenge owe mu kwafele. — Neh. 8:8. ^[3]

16, 17. (a) Paulus okwa li a hokwa shike mexumokomesho laTimoteus? (b) Ongahelipi ovakulunhuongalo tava dulu okudeula nomupondo ovafita vomonakwiiwa meongalo?

¹⁶ Omhumbwe yovafita meongalo lopaKriste oinene, naavo tava ka wanifa po oilonga oyo monakwiiwa ova pumbwa edeulo tali twikile. Paulus okwa li a yandja omalombwelo e na sha nanghee edeulo olo tali dulu okuyandjwa eshi a lombwela Timoteus a ti: “Oove, . . . omumwange, likolelela mefilonghenda eli li li muKristus Jesus; ndele osho wa uda kuame mokati keendombwedi  dihapu, shi yandja kovalumenhu ve shi kulineekelwa, va wana oku shi longa vakwao yo.” (2 Tim. 2:1, 2) Timoteus okwe lihonga oinima ihapu eshi a kala pamwe naPaulus omulumenhu omunamido nokwa li a tula moilonga eenghedi daPaulus moukalele waye nosho yo moilonga imwe iyapuki. — 2 Tim. 3:10-12.

¹⁷ Paulus okwa li ha deula Timoteus. Okwa li ha ende pamwe nomulumenhu oo omunyasha. (Oil. 16:1-5) Ovakulunhuongalo otava dulu okuhopaenena Paulus mokukala hava i pamwe novayakuliongalo ovo va wana eshi tava ka ninga omatalelepo oufita, ngeenge otashi wapalele. Kungaho, ovakulunhuongalo ohava yandje omhito kovamwatate ovo opo va dule okutala koshihopaenenwa shehongo, sheitavelo, shelididimiko, nosho yo shohole oyo ya pumbiwa kovapashukili Ovakriste. Omulandu oo otau yambidida okudeula ovafita vomonakwiiwa ‘voufita waKalunga.’ — 1 Pet. 5:2.

18. Omolwashike sha fimana okudeula vamwe moilonga yaJehova?

¹⁸ Okudeula vamwe okwa fimanenena molwaashi omhumbwe nosho yo eemhito dokulongela Jehova otadi hapupala. Oihopaenenwa yaJesus naPaulus yokudeula vamwe otai longo nokunena. Jehova okwa hala ovapiya vaye vokunena va kale va deulilwa nawa oinakuwanifwa yavo yopaKriste. Kalunga okwe tu pa oufembanghenda wokukwafela ovo vehe na owino muhapu opo va kulike okudula kwavo okulonga oilonga oyo ya pumbwa okulongwa meongalo. Eshi eenghalo tadi ende tadi naipala mounyuni neemhito dipe dokuudifa tadi holoka po, edeulo la tya ngaho ola fimana nola endelela.

19. Omolwashike u na okukala wa tomhwa kutya eenghendabala doye doudiinini dokudeula vamwe moilonga yaJehova otadi ka pondola?

¹⁹ Oshoshili kutya, okudeula ovanhu ohaku kwata efimbo nohaku pula eenghendabala. Ashike Jehova nOmona waye omuholike otave ke tu yambidida noku tu pa ounongo opo tu yandje edeulo la tya ngaho. Ohatu ka kala twa hafa okumona ovo twa kwafela eshi tava twikile ‘okulihepeka nokukondja’ ile tu tye tava longo noudiinini. (1 Tim. 4:10) Natu twikileni okuninga exumokomesho lopamhepo mokulonga oilonga yaJehova iyapuki.