1. David okwa popya shike shi na sha nelininipiko laJehova?

OHATU dulu ngoo kutya Jehova omulininipiki? Heeno, ohatu dulu. David okwa popya a ti: “Omwene owa amena nge nowa xupifa nge; ekwafo [elininipiko] loye ola nenepeka nge.” (2 Sam. 22:36; Eps. 18:35) Otashi dulika David a li ta diladila kefiku olo eshi omuprofeti Samuel a li e uya meumbo laxe opo a vaeke oo a li ta ka kala ohamba yOvaisrael. David oye a li munini kovamati vahetatu, na Jehova oye a li a hoolola a pingene po ohamba Saul. — 1 Sam. 16:1, 10-13.

2. Oshike hatu ka kundafana moshitukulwa eshi?

² David ota tu kumwe neendjovo odo da popiwa komupsalme oo a popya shi na sha naJehova a ti: ‘Ota tale mokule mwi, meulu nokombada yedu. Ohepele ote i tumbu mo mondwi yedu, nomufyoona ote mu toola mo e mu kaleke omutumba pamwe noidale.’ (Eps. 113:6-8) Moshitukulwa eshi, ohatu ka konakona tete oilihongomwa ya fimana oyo hatu lihongo monghedi omo Jehova a ulika elininipiko. Opo nee, ohatu ka konakona osho hatu lihongo kohamba Saul, komuprofeti Daniel nosho yo kuJesus shi na sha noukwatya wondjele.

3. Jehova oha ungaunga ngahelipi nafye, naasho otashi ulike shike?

³ Jehova okwa ulika kutya omulininipiki okutala konghedi omo a ungaunga novapiya vaye vopanhu inava wanenena. Jehova iha tambula ko ashike onghedi omo hatu mu longele, ndele okwe tu tala ko yo tu li ookaume kaye. (Eps. 25:14) Opo tu dule okupanga oukaume naye, Jehova okwa katuka onghatu ya fimana eshi a yandja Omona waye a ninge eyambo lomatimba etu. Jehova ine tu ulikila tuu onghenda nosho yo olukeno!

4. Jehova okwe tu pa shike, nomolwashike?

 ⁴ Diladila yo konghedi imwe omo Jehova a ulika kutya omulininipiki. Jehova e li Omushiti wetu, okwa li ta dulu oku tu shita tuhe na emanguluko lokuninga omatokolo. Ashike hasho a li a ninga ngaho. Okwe tu shita oshifeka shaye nokwe tu pa emanguluko. Okwa hala tu mu longele tashi di komutima hatu linyengifwa kohole nosho yo okukala tu shii kutya ohatu mono ouwa ngeenge hatu dulika kuye. (Deut. 10:12; Jes. 48:17, 18) Inatu hafa tuu eshi Jehova e li omulininipiki!

5. Jehova okwe tu honga ngahelipi tu kale ovalininipiki? (Tala efano kombada yoshifo.)

⁵ Jehova ote tu hongo elininipiko monghedi omo a ungaunga nafye. Jehova oye Omunaendunge elela meshito alishe. Ashike nande ongaho, oha tambula ko omaetepo avamwe. Pashihopaenenwa, okwa li a efa Omona waye e mu kwafele mokushita oinima aishe. (Omayel. 8:27-30; Kol. 1:15, 16) Nonande Jehova oye omunaenghono adishe, okwa pa yo vamwe oinakuwanifwa. Pashihopaenenwa, okwa nangeka po Jesus a kale Ohamba yOuhamba waye, nokwa yandja yo oufemba kovanhu 144 000, ovo tava ka pangela pamwe naJesus. (Luk. 12:32) Oshoshili kutya Jehova okwa deula Jesus a kale Ohamba nOmupristeri Munene. (Heb. 5:8, 9) Okwa deula yo ovo tava ka pangela pamwe naJesus opo va wanifa po oshinakuwanifwa shavo, ashike Jehova iha kala ta konenena okanima keshe oko tava longo. Ponhele yaasho, oku na elineekelo kutya otava ka longa ehalo laye. — Eh. 5:10.

6-7. Oshike hatu lihongo kuTate yetu womeulu ngeenge hatu yandje oinakuwanifwa kuvamwe?

⁶ Ngeenge Tate yetu womeulu, oo ina pumbwa nande ekwafo laumwe oha yandje oinakuwanifwa kuvamwe, mbela ongahelipi shi na sha nafye? Pashihopaenenwa, mbela ou li omutwe woukwaneumbo ile omukulunhuongalo? Shikula oshihopaenenwa shaJehova mokupa  vamwe oinakuwanifwa nokuhenuka okukonenena okanima keshe tava longo. Ngeenge owa hopaenene Jehova, ito ka yandja ashike oinakuwanifwa, ndele oto ka deula yo vamwe nokukala we ve lineekela. (Jes. 41:10) Ovo ve na oinakuwanifwa oshike vali tave lihongo kuJehova?

⁷ Ombiibeli otai ulike kutya Jehova okwa li e na ohokwe okupwilikina komaetepo ovaengeli. (1 Eeh. 22:19-22) Ovadali, ongahelipi tamu dulu okushikula oshihopaenenwa shaJehova? Ngeenge otashi shiiva, pula ounona va ninge omaetepo e na sha nanghee oshilonga shi na okulongwa. Opo nee apa tashi shiiva, to a tula moilonga.

8. Jehova okwa ulika ngahelipi kutya oku na elididimiko eshi a li ta ungaunga naAbraham naSara?

⁸ Jehova okwa ulika kutya omulininipiki eshi e lididimika. Pashihopaenenwa, ohe lididimike ngeenge ovo tave mu longele tave mu pula nefimaneko shi na sha nomatokolo oo a ninga. Okwa li a pwilikina eshi Abraham a li te mu pula ngeenge okwa ninga ngoo etokolo la yuka li na sha nokuhanauna po Sodom naGomorra. (Gen. 18:22-33) Diladila nghee a li a ungaunga nomukulukadi waAbraham, Sara. Jehova ka li a uda nai ile a handuka eshi Sara a yola konima eshi a lombwelwa kutya ota ka ninga oufimba moukulupe. (Gen. 18:10-14) Ponhele yaasho, Jehova okwa li a ungaunga naSara nefimaneko.

9. Oshike ovadali novakulunhuongalo tave lihongo koshihopaenenwa shaJehova?

⁹ Oshike ovadali novakulunhuongalo tave lihongo koshihopaenenwa shaJehova? Mbela oho linyenge ngahelipi ngeenge ovo ve li koshi yewiliko loye tave ku pula shi na sha nomatokolo oo wa ninga? Mbela oho kendabala tete okupopila etokolo loye? Ile oho kendabala okuuda ko omataleko avo? Omaukwaneumbo nosho yo omaongalo otaa ka mona ouwa ngeenge ovo ve na eenghonopangelo ohava hopaenene Jehova. Fiyo opapa, otwa kundafana osho hatu dulu okulihonga koshihopaenenwa shaJehova shi na sha nelininipiko. Paife, ohatu ka tala osho hatu lihongo kombinga yondjele mokukonakona oihopaenenwa oyo tai hangwa mEendjovo daKalunga.

10. Jehova okwa longifa ngahelipi oihopaenenwa yavamwe opo e tu honge?

¹⁰ Jehova e li ‘Omuhongi wetu Munenenene,’ okwa shangifa oihopaenenwa mEendjovo daye opo e tu honge. (Jes. 30:20, 21) MOmbiibeli omu na omahokololo ovanhu vamwe ovo va li va ulika omaukwatya opakalunga, mwa kwatelwa ondjele. Ohatu ke lihonga yo osho sha li sha ningilwa ovo va li va dopa okuulika omaukwatya opakalunga. — Eps. 37:37; 1 Kor. 10:11.

11. Oshike hatu lihongo koshihopaenenwa shii shaSaul?

¹¹ Diladila kwaasho sha ningilwa ohamba Saul. Eshi a li omulumenhu omunyasha okwa li e na ondjele. Okwa li e shii omangabeko aye nokwa li ta ongaonga okutambula ko oinakuwanifwa ihapu. (1 Sam. 9:21; 10:20-22) Ashike mokweendela ko kwefimbo, Saul okwa ka kwatwa kounhwa. Okwa li a holola omaukwatya oo mai diva konima eshi a ninga ohamba. Pomhito imwe, ka li a ulika elididimiko eshi a li a teelela omuprofeti Samuel. Ponhele yokuulika ondjele nokulineekela Jehova a katuke onghatu ponhele yoshiwana, Saul okwa li a ninga omaxwikiloyambo nonande ka li eshi lombwelwa e shi ninge. Oshidjemo, Jehova ka li vali e mu hokwa nokwa li a kanifa eenghonopangelo dokukala ohamba. (1 Sam. 13:8-14) Otashi ka kala pandunge ngeenge otwe lihongo koshihopaenenwa osho shelondwelo nokuhenuka okuninga oinima oyo tuhe na oufemba woku i ninga.

12. Daniel okwa ulika ngahelipi kutya oku na ondjele?

 ¹² Mepingafano noshihopaenenwa shii shaSaul, diladila koshihopaenenwa shiwa shomuprofeti Daniel. Daniel okwa kala omulininipiki noku na ondjele nokwa kala ha kongo ewiliko kuJehova monghalamwenyo yaye aishe, e li omupiya waye. Pashihopaenenwa, eshi a li a longifwa kuJehova a fatulule ondjodi yaNebukadnesar, Daniel ka li a yukifa olupandu kuye mwene. Ponhele yaasho, okwa li a yukifa olupandu alishe kuJehova molwaashi oku na ondjele. (Dan. 2:26-28) Osho otashi tu hongo shike? Ngeenge ovamwatate tave tu pandula omolwoipopiwa yetu oyo twa yandja ile eshi twa pondola moukalele, natu kale tu shii kutya otwa pumbwa okuyandja efimano alishe kuJehova. Ondjele otai ke tu kwafela tu mone kutya itatu dulu okulonga oilonga ya tya ngaho nopehe na ekwafo laJehova. (Fil. 4:13) Ngeenge otwa ningi ngaho, ohatu ka shikula oshihopaenenwa shiwa shaJesus. Ngahelipi mbela?

13. Oshike hatu lihongo shi na sha nondjele meendjovo daJesus odo tadi hangwa muJohannes 5:19, 30?

¹³ Nonande Jesus okwa kala Omona waKalunga a wanenena, okwa kala e lineekela muJehova. (Lesha Johannes 5:19, 30.) Ka li a kendabala okukufa ko eenghonopangelo kuXe womeulu. Ovafilippi 2:6 otave tu lombwele kutya Jesus “ka li a diladila a kale e fike puye ile a kufe po ondodo yaye.” Molwaashi Jesus okwa li Omona omuduliki, okwa li e shii omangabeko aye nokwa li a fimaneka eenghonopangelo daXe.

14. Jesus okwa li e linyenga ngahelipi eshi a li a pulwa a ninge oshinima osho ehe na oufemba woku shi ninga?

¹⁴ Diladila nghee Jesus a li e linyenga eshi ovahongwa vaye, Jakob naJohannes pamwe naina yavo, va li ve uya kuye, ndele tave mu pula oshinima osho a li ehe na oufemba woku shi ninga. Jesus okwa li e va lombwela sha yela kutya Xe womeulu oye aeke ta dulu okutokola kutya olyelye ta ka kala kolulyo nokolumosho laye mOuhamba. (Mat. 20:20-23) Jesus okwa ulika kutya oku shii omangabeko aye. Okwa li e na ondjele. Ka li ha longo oilonga oyo ina pewa kuXe. (Joh. 12:49) Ongahelipi hatu dulu okushikula oshihopaenenwa shiwa shaJesus?

15-16. Ongahelipi hatu dulu okutula moilonga omayele opaMbiibeli oo taa hangwa mo 1 Ovakorinto 4:6?

¹⁵ Ohatu ka shikula oshihopaenenwa shaJesus shi na sha nondjele ngeenge otwa kala hatu tula moilonga omayele Ombiibeli oo taa hangwa mo 1 Ovakorinto 4:6. Omushangwa oo otau ti: “Inamu koyelela osho sha shangwa.”  Ngeenge otwa pulwa omayele, inatu hala okuninga omaetepo etu vene ile okufikila hatu popi ofimbo inatu diladila nawa. Ponhele yaasho, otwa hala okukala hatu yandje elitulemo komayele oo taa hangwa mOmbiibeli nosho yo mOishangomwa yetu ya kanghamena kuyo. Kungaho, ohatu ka ulika kutya otu shii omangabeko etu. Ngeenge otu na ondjele, ohatu ka yukifa olupandu alishe kOmunaenghono adishe, oo ha “tokola pauyuki.” — Eh. 15:3, 4.

¹⁶ Kakele kokufimanekifa Jehova, otu na omatomheno mawa okuulika ondjele. Paife, ohatu ka tala nghee elininipiko nosho yo ondjele tai dulu oku tu etela ehafo noku tu kwafela tu kale hatu udafana navakwetu.

17. Omolwashike ovanhu ovo ve na elininipiko nondjele hava kala va hafa?

¹⁷ Ngeenge otwa kala tu na elininipiko nondjele ohatu ka kala twa hafa. Omolwashike mbela? Ngeenge otu shii omangabeko etu ohatu ka pandula ekwafo olo hatu pewa kuvamwe. Pashihopaenenwa, diladila ashike eshi Jesus a li a velula ovanaudu voshilundu omulongo pomhito imwe. Umwe womuvo oye ashike a li a aluka nokupandula Jesus eshi e mu velula komukifi oo wa li tau dulu oku mu twala mefyo, oshinima osho itashi dulu okulongwa kovanhu. Omulumenhu oo omulininipiki noku na ondjele okwa li a pandula ekwafo olo a li a pewa kuJesus nokwa li a tumbaleka Jehova eshi a velulwa. — Luk. 17:11-19.

18. Ongahelipi elininipiko nondjele hai tu kwafele tu kale hatu udafana navakwetu? (Ovaroma 12:10)

¹⁸ Ovanhu ovalininipiki nosho yo ovo ve na ondjele ohava longele kumwe navakwao nohashi va kwafele va kale ve na ookaume vopofingo. Omolwashike mbela? Omolwaashi ohava kala ve shii kutya ovanhu vakwao ove na omaukwatya mawa nohava kala ve ve lineekela. Ovanhu ovalininipiki nove na ondjele ohava  kala va hafa ngeenge vamwe va pondola moinakuwanifwa oyo va pewa, have va pandula diva nohava kala ve va fimaneka. — Lesha Ovaroma 12:10.

19. Otu na okuhenuka ounhwa omolwomatomheno amwe elipi?

¹⁹ Mepingafano naasho, ovo ve na ounhwa ohava mono shidjuu okupandula vamwe, tava diladila kutya ovo va wana okupandulwa. Ohave liyelekanifa navamwe nokuxumifa komesho omhepo yefiyafanepo. Ponhele yokudeula vamwe noku va pa omaufembanghenda ohava ti, “Ngeenge owa hala oshilonga shi kale sha wapala, shi longa ove mwene.” Omunhu oo e na ounhwa alushe oha kala e na ondubo. (Gal. 5:26) Ovo ve na oikala ya tya ngaho ihava kala ve na ookaume tava kalelele. Ngeenge otwa mono kutya otu na ounhwa, otu na okukonga ekwafo kuJehova twa mana mo opo tu ‘lundulule onghedi yetu yokudiladila,’ tu efa po oikala oyo ii ofimbo inai mena omidi mufye. — Rom. 12:2.

20. Omolwashike tu na okukala ovalininipiki notu na ondjele?

²⁰ Inatu pandula tuu Jehova eshi e tu tulila po oshihopaenenwa shiwa! Ohatu mono kutya omulininipiki monghedi omo ha ungaunga novapiya vaye, notwa hala oku mu hopaenena. Kakele kaasho, otwa hala okushikula oihopaenenwa iwa yaavo va tumbulwa mOmbiibeli, ovo va li ve na ondjele nova li ve na ekwatafano liwa naKalunga. Alushe natu kale hatu yandje efimano netumbalo kuJehova molwaashi okwe li lilongela. (Eh. 4:11) Opo nee, nafye ohatu ka kala tu na ekwatafano lopofingo naTate yetu womeulu, oo e hole ovanhu ovo ve na elininipiko nondjele.